Diwali 2026 | దీపావళి ముహూర్త ట్రేడింగ్.. ఈ 6 స్టాక్స్‌పై క‌న్నేయండి..

Diwali 2026 | దీపావళి 2026 ముహూర్త ట్రేడింగ్ సందర్భంగా పెట్టుబడిదారుల కోసం ఆనంద్ రాఠీ షేర్ అండ్ స్టాక్ బ్రోకర్స్ ఆరు స్టాక్స్‌ను సిఫార్సు చేసింది. ఈ షేర్లకు 12 నెలల కాలానికి నిర్దేశించిన టార్గెట్ ధరల ప్రకారం 16 నుంచి 35 శాతం వరకు లాభాలు వచ్చే అవకాశం ఉందని అంచనా వేసింది. ఎస్‌బీఐ, హెచ్‌డీఎఫ్‌సీ ఏఎంసీ, టెక్ మహీంద్రా సహా ఆరు కంపెనీలకు బై రేటింగ్ ఇచ్చింది.

ఎస్‌బీఐ షేర్‌కు అధిక లాభం వ‌చ్చే చాన్స్‌..

దీపావళి పండుగ సమీపిస్తున్న నేపథ్యంలో స్టాక్ మార్కెట్లో పెట్టుబడులు పెట్టాలనుకునే వారికి ఆనంద్ రాఠీ బ్రోకరేజ్ సంస్థ కీలక సూచనలు చేసింది. బ్యాంకింగ్, ఐటీ, మౌలిక సదుపాయాలు, ఫార్మాసూటికల్స్, ఆర్థిక సేవల రంగాలకు చెందిన ఆరు కంపెనీలను తన దీపావళి 2026 పోర్ట్‌ఫోలియో కోసం ఎంపిక చేసింది. గ‌త సెష‌న్‌ ముగింపు ధరల ఆధారంగా ఈ షేర్లకు 12 నెలల టార్గెట్ ధరలను ప్రకటించింది. ఇందులో అత్యధికంగా స్టేట్ బ్యాంక్ ఆఫ్ ఇండియా (ఎస్‌బీఐ) షేరుకు 35 శాతం లాభం వచ్చే అవకాశం ఉందని అంచనా వేసింది. ఎస్‌బీఐ ప్రస్తుత ధర రూ.987 కాగా, టార్గెట్ ధరను రూ.1,337గా నిర్ణయించింది. బ్యాంకు డిపాజిట్లు, రుణాల వృద్ధి, మెరుగుపడుతున్న ఆస్తుల నాణ్యత, తక్కువ వడ్డీతో లభించే రిటైల్ డిపాజిట్లు భవిష్యత్తులో లాభదాయకతకు దోహదపడతాయని పేర్కొంది. అలాగే సిమిండియా ప్రాజెక్ట్స్ షేరుకు రూ.1,615 టార్గెట్ ధరను ప్రకటించింది. ప్రస్తుత ధర రూ.1,291తో పోలిస్తే 25 శాతం వృద్ధికి అవకాశం ఉందని తెలిపింది. మెట్రో రైలు, సొరంగ మార్గాలు, విమానాశ్రయాలు, పారిశ్రామిక మౌలిక సదుపాయాల ప్రాజెక్టుల్లో కంపెనీకి ఉన్న అనుభవం, రూ.31,300 కోట్ల ఆర్డర్ బుక్ భవిష్యత్తు వృద్ధికి బలాన్నిస్తాయని అంచనా వేసింది.

శిల్పా మెడికేర్‌..

ఫార్మాసూటికల్స్ రంగానికి చెందిన శిల్పా మెడికేర్‌కు రూ.1,160 టార్గెట్ ధరను నిర్దేశించింది. ప్రస్తుతం రూ.929 వద్ద ఉన్న ఈ షేరులో 25 శాతం లాభానికి అవకాశం ఉందని తెలిపింది. 2026 ఆర్థిక సంవత్సరం తొలి త్రైమాసికంలో కంపెనీ ఆదాయం 43 శాతం పెరిగి రూ.469 కోట్లకు చేరగా, ఈబీఐటీడీఏ 42 శాతం వృద్ధితో రూ.139 కోట్లకు చేరింది. కొత్త ఔషధాల అభివృద్ధి, బయోలాజిక్స్ విభాగం, అంతర్జాతీయ భాగస్వామ్యాలు కంపెనీకి మరింత వృద్ధిని అందిస్తాయ‌ని బ్రోకరేజ్ అంచనా వేసింది. ఇండో-ఎంఐఎం షేరుకు రూ.1,500 టార్గెట్ ధరను ప్రకటించింది. ప్రస్తుత ధర రూ.1,190తో పోలిస్తే 26 శాతం లాభం వచ్చే అవకాశం ఉందని పేర్కొంది. మెటల్ ఇంజెక్షన్ మోల్డింగ్ సాంకేతికతతో క‌చ్చితమైన విడిభాగాలను తయారు చేసే ఈ కంపెనీకి ఆటోమొబైల్, రక్షణ, వైద్య పరికరాలు, ఏరోస్పేస్ రంగాల్లో అవకాశాలు పెరుగుతున్నాయని తెలిపింది. ఎగుమతుల ద్వారా వచ్చే ఆదాయం, ప్రపంచవ్యాప్తంగా ఉన్న తయారీ కేంద్రాలు కంపెనీ వృద్ధికి తోడ్పడతాయని వివరించింది.

హెచ్‌డీఎఫ్‌సీ ఏఎంసీ..

మరోవైపు హెచ్‌డీఎఫ్‌సీ అసెట్ మేనేజ్‌మెంట్ కంపెనీ (హెచ్‌డీఎఫ్‌సీ ఏఎంసీ) షేరుకు రూ.2,800 టార్గెట్ ధరను నిర్ణయించింది. ప్రస్తుత ధర రూ.2,380తో పోలిస్తే 18 శాతం లాభానికి అవకాశం ఉందని తెలిపింది. దేశీయ మ్యూచువల్ ఫండ్ పరిశ్రమ విస్తరణ, సిస్టమాటిక్ ఇన్వెస్ట్‌మెంట్ ప్లాన్ పెట్టుబడులు, ప్రత్యామ్నాయ పెట్టుబడి పథకాల ద్వారా కంపెనీకి వృద్ధి అవకాశాలు ఉన్నాయని పేర్కొంది. టెక్ మహీంద్రా షేరుకు రూ.2,065 టార్గెట్ ధరను ప్రకటించింది. ప్రస్తుతం రూ.1,787 వద్ద ఉన్న ఈ షేరులో 16 శాతం లాభం రావచ్చని అంచనా వేసింది. కృత్రిమ మేధ ఆధారిత సేవలు, కొత్త ఒప్పందాలు, వ్యయ నియంత్రణ చర్యలు కంపెనీ పనితీరును మెరుగుపరచవచ్చని తెలిపింది. అయితే కొత్త ఒప్పందాలను ఆదాయంగా మార్చుకోవడం, బ్యాంకింగ్, ఆర్థిక సేవల రంగంలో డిమాండ్ పుంజుకోవడం కీలకమని పేర్కొంది. ఈ ఆరు షేర్లపై బ్రోకరేజ్ సంస్థ సానుకూల అంచనాలు వ్యక్తం చేసినప్పటికీ, ఇవి హామీతో కూడిన రాబడులు కావు. మార్కెట్ పరిస్థితులు, కంపెనీల పనితీరు, పెట్టుబడి రిస్కులను పరిశీలించిన తర్వాతే నిర్ణయం తీసుకోవాలి.