EPFO | ఉద్యోగం మారారా? పీఎఫ్ ట్రాన్స్‌ఫర్ చేయకపోతే భారీ నష్టం!

EPFO | ఉద్యోగం చేసే ప్రతి ఉద్యోగి తన ప్రావిడెంట్ ఫండ్ (పీఎఫ్) వివరాలను ఎప్పటికప్పుడు పరిశీలించడం ఎంతో ముఖ్యమైన బాధ్యత. ఉద్యోగుల ప్రావిడెంట్ ఫండ్ ఆర్గనైజేషన్ (ఈపీఎఫ్‌వో) నిర్వహించే ప్రావిడెంట్ ఫండ్ పదవీ విరమణ తర్వాత ఆర్థిక భద్రత కల్పించేందుకు రూపొందించిన దీర్ఘకాలిక పొదుపు పథకం. ఈ పథకం ద్వారా ఉద్యోగుల జీతం నుంచి ప్రతి నెలా కొంత మొత్తం పీఎఫ్‌గా జమ అవుతుంది. అదే మొత్తాన్ని యజమాని కూడా ఉద్యోగి ఖాతాలో జమ చేస్తారు. ఈ మొత్తంపై కాలక్రమేణా వడ్డీ చేరుతూ ఉండటంతో మంచి పొదుపు అలవాటు ఏర్పడటంతోపాటు, పెద్ద మొత్తంలో నిధి కూడా సిద్ధమవుతుంది. ఈ పీఎఫ్ నిధి నిరుద్యోగం, అనారోగ్యం లేదా పదవీ విరమణ వంటి అత్యవసర పరిస్థితుల్లో ఆర్థిక రక్షణగా నిలుస్తుంది. వృద్ధాప్యంలో గౌరవప్రదమైన జీవనం కొనసాగించేందుకు కూడా ఇది కీలకమైన భద్రతా వ్య‌వ‌స్థ‌గా పనిచేస్తుంది.

పీఎఫ్‌ను ట్రాక్ చేయ‌డం క‌ష్ట‌మ‌వుతుంది..

పీఎఫ్‌కు సంబంధించిన చాలా ప్రక్రియలను యజమానులే పూర్తి చేస్తారు. అందువల్ల ఉద్యోగులు నేరుగా పీఎఫ్ నిర్వహణలో ఎక్కువగా పాల్గొనరు. ఈ కారణంగా చాలామంది తమ పీఎఫ్‌లో ఎంత మొత్తం ఉందో, ఏ ఖాతాల్లో ఉందో తెలుసుకోకుండా వదిలేస్తుంటారు. ముఖ్యంగా ఉద్యోగం మారినప్పుడు పాత పీఎఫ్ ఖాతాను కొత్త సంస్థ పీఎఫ్ ఖాతాతో విలీనం చేయకపోతే, భవిష్యత్తులో పీఎఫ్ ట్రాక్ చేయడం, బదిలీ చేయడం లేదా అన్ని ఖాతాలను ఒకేచోట సమీకరించడం కష్టంగా మారుతుంది. ఉద్యోగి వద్ద ఒకటి కంటే ఎక్కువ పీఎఫ్ మెంబర్ ఐడీలు (ఎంఐడీలు) ఉండి, వాటిలోని బ్యాలెన్స్‌ను తాజా మెంబర్ ఐడీకి బదిలీ చేయకపోతే, వాటిని ప్రస్తుత ఖాతాలో విలీనం చేయడం చాలా అవసరం. ఈ ప్రక్రియలో యూనివర్సల్ అకౌంట్ నంబర్ (యూఏఎన్) కీలక పాత్ర పోషిస్తుంది. వేర్వేరు సంస్థల్లో పనిచేసినప్పుడు వచ్చిన అన్ని పీఎఫ్ ఖాతాలను ఒకే యూఏఎన్‌తో అనుసంధానం చేయవచ్చు. దీంతో ఉద్యోగికి సంబంధించిన అన్ని మెంబర్ ఐడీలు ఒకే ఖాతా కింద ఉంటాయి.

సేవాకాలం పూర్తిచేసిన‌ట్లు కాదు..

యూఏఎన్ ద్వారా తాజా పీఎఫ్ పాస్‌బుక్, యూఏఎన్ కార్డు, ప్రతి నెలా పీఎఫ్ జమపై ఎస్‌ఎంఎస్ అలర్ట్‌లు వంటి సేవలు లభిస్తాయి. అలాగే పాత పీఎఫ్ ఖాతాలను కొత్త ఖాతాతో అనుసంధానం చేయడం, ఉద్యోగం మారినప్పుడు ఆటోమేటిక్ పీఎఫ్ ట్రాన్స్‌ఫర్ అభ్యర్థనను సులభంగా పూర్తి చేయడం కూడా వీలవుతుంది. దీంతో ఉద్యోగి తన మొత్తం పీఎఫ్ నిధిని సులభంగా ట్రాక్ చేసి నిర్వహించవచ్చు. ఉద్యోగం మారిన తర్వాత పీఎఫ్ ట్రాన్స్‌ఫర్ చేయకపోతే అనేక ఇబ్బందులు ఎదురయ్యే అవకాశం ఉంటుంది. వేర్వేరు ఖాతాల్లో సేవా కాలం విడిపోవడంతో కొన్ని కీలక ప్రయోజనాలకు అవసరమైన కనీస సేవా కాలాన్ని పూర్తి చేసినట్లుగా పరిగణించరు. ఉదాహరణకు మొత్తం సేవా కాలం ఐదేళ్లకు మించి ఉంటే పీఎఫ్ ఉపసంహరణపై టీడీఎస్ విధించరు. కానీ పాత పీఎఫ్‌ను కొత్త ఖాతాకు బదిలీ చేయకపోతే ఈ ప్రయోజనం కోల్పోయే ప్రమాదం ఉంటుంది. ఫలితంగా అదనపు పన్ను చెల్లించాల్సి వ‌స్తుంది.

చ‌క్ర వ‌డ్డీ త‌గ్గుతుంది..

అలాగే పీఎఫ్ ట్రాన్స్‌ఫర్ చేయకపోతే చక్రవడ్డీ ప్రయోజనం కూడా తగ్గుతుంది. ప్రస్తుతం ఈపీఎఫ్‌వో పీఎఫ్ నిధులపై సంవత్సరానికి 8.25 శాతం వడ్డీ అందిస్తోంది. ఒకటి కంటే ఎక్కువ మెంబర్ ఐడీల్లో నిధులు విడివిడిగా ఉండడం వల్ల చక్రవడ్డీ ప్రభావం తగ్గి, చివరికి రిటైర్మెంట్ సమయానికి లభించే మొత్తం కూడా తగ్గే అవకాశం ఉంటుంది. అలాగే వరుసగా 36 నెలల పాటు ఎలాంటి పీఎఫ్ జమలు జరగని ఈపీఎఫ్‌వో ఖాతా ఇనాపరేటివ్‌గా మారుతుంది. పాత పీఎఫ్ ఖాతాను కొత్త ఖాతాకు బదిలీ చేయకపోతే, మూడు సంవత్సరాల తర్వాత ఆ ఖాతాలో చక్రవడ్డీ ప్రయోజనం కోల్పోయే పరిస్థితి ఏర్పడి, చివరికి రిటైర్మెంట్ నిధి తగ్గుతుంది. అన్ని పీఎఫ్ ఖాతాలను ఒకేచోట విలీనం చేయడం వల్ల ఈపీఎఫ్‌వో పెన్షన్, బీమా ప్రయోజనాలకు కూడా అర్హత పొందడం సులభమవుతుంది. ఉదాహరణకు మొత్తం సేవా కాలం 10 సంవత్సరాలకు మించి ఉంటే ఉద్యోగి పెన్షన్ ప్రయోజనాలకు అర్హత సాధిస్తారు. అందుకే ఉద్యోగం మారిన ప్రతిసారీ పాత పీఎఫ్‌ను తాజా యజమాని ఖాతాకు తప్పనిసరిగా బదిలీ చేయాలని నిపుణులు సూచిస్తున్నారు. అలా చేస్తే గత సేవా కాలాన్ని కూడా కొనసాగింపుగా పరిగణిస్తారు.

పీఎఫ్ ఖాతాను ఎప్పటికప్పుడు అప్‌డేట్ చేసుకోవడం, ఉద్యోగం మారిన వెంటనే పీఎఫ్ ట్రాన్స్‌ఫర్ పూర్తి చేయడం ద్వారా ఈపీఎఫ్‌వో అందించే అన్ని ప్రయోజనాలను సులభంగా పొందవచ్చు. అలాగే పదవీ విరమణ సమయంలో నిధులను క్లెయిమ్ చేసేటప్పుడు అనవసరమైన పత్రాల ప్రక్రియలు, ఆలస్యాలను కూడా నివారించవచ్చు.