Susan Electricals | లిస్టింగ్‌తో దూసుకెళ్లిన సుసాన్ ఎలక్ట్రికల్స్ షేర్.. పెట్టుబ‌డిదారుల‌కు భారీగా లాభం..

Susan Electricals | పవర్ ట్రాన్స్‌మిషన్, డిస్ట్రిబ్యూషన్ రంగానికి చెందిన సుసాన్ ఎలక్ట్రికల్స్ ఇండియా షేర్లు బీఎస్‌ఈలో అదిరిపోయే ప్ర‌ద‌ర్శ‌న‌ చేశాయి. కంపెనీ షేర్ ఐపీఓ ధర రూ.127తో పోలిస్తే 46.45 శాతం ప్రీమియంతో రూ.186 వద్ద మార్కెట్‌లో లిస్టయ్యింది. లిస్టింగ్ అనంతరం కొనుగోళ్ల ఊపు కొనసాగడంతో షేర్ ధర ఇంట్రాడేలో రూ.195.30 వరకు చేరుకుని ఐపీఓ ధరతో పోలిస్తే సుమారు 54 శాతం లాభాన్ని నమోదు చేసింది. మూడు రోజులపాటు కొనసాగిన ఐపీఓకు పెట్టుబడిదారుల నుంచి భారీ స్పందన లభించింది. ఈ పబ్లిక్ ఇష్యూ మొత్తం 192.06 రెట్లు సబ్‌స్క్రైబ్ కావడం విశేషం. కంపెనీ ఐపీఓలో రూ.60.22 కోట్ల తాజా షేర్ల జారీతోపాటు, ప్రస్తుత వాటాదారులు విక్రయించిన రూ.10.16 కోట్ల ఆఫర్ ఫర్ సేల్ (ఓఎఫ్‌ఎస్) కూడా భాగంగా ఉన్నాయి. మొత్తం 55.42 లక్షల షేర్లను ఒక్కోటి రూ.120-127 ధరల బ్యాండ్‌లో జారీ చేసి కంపెనీ రూ.70.4 కోట్లను సమీకరించింది. తాజా షేర్ల జారీ ద్వారా సమీకరించిన నిధులను వ్యాపార విస్తరణ, వర్కింగ్ క్యాపిటల్ అవసరాలు, సాధారణ కార్పొరేట్ అవసరాల కోసం వినియోగించాలని సంస్థ ప్రణాళిక రూపొందించింది.

అనేక విద్యుత్ ఉత్ప‌త్తుల త‌యారీ..

ఐపీఓ ప్రారంభానికి ముందే యాంకర్ ఇన్వెస్టర్ల నుంచి కంపెనీ రూ.19.34 కోట్లను సమీకరించింది. ఈ ఇష్యూను సెరెన్ క్యాపిటల్ ప్రైవేట్ లిమిటెడ్ నిర్వహించగా, ముద్రా ఆర్టీఏ వెంచర్స్ రిజిస్ట్రార్‌గా వ్యవహరించింది. భారత్‌లో వేగంగా విస్తరిస్తున్న పవర్ ట్రాన్స్‌మిషన్, డిస్ట్రిబ్యూషన్ మౌలిక సదుపాయాల రంగంలో కంపెనీ కార్యకలాపాలు ఉండటంతో ఈ లిస్టింగ్‌పై పెట్టుబడిదారులు ప్రత్యేక దృష్టి సారించారు. ఐపీఓ ధర ఆధారంగా చూస్తే పబ్లిక్ ఇష్యూకు ముందు కంపెనీ విలువను సుమారు రూ.258 కోట్లుగా అంచనా వేశారు. విద్యుత్ కేబుల్స్, కండక్టర్లు, ఎలక్ట్రికల్ పరికరాలకు పెరుగుతున్న డిమాండ్‌తోపాటు 2025-26 ఆర్థిక సంవత్సరంలో నమోదైన బలమైన ఆర్థిక ఫలితాలు ఎస్‌ఎంఈ ఐపీఓపై పెట్టుబడిదారుల ఆసక్తిని పెంచాయి. 2007లో స్థాపించిన సుసాన్ ఎలక్ట్రికల్స్ ఇండియా అల్యూమినియం, కాపర్ ఆధారిత ఎలక్ట్రికల్ వైండింగ్ వైర్లు, కండక్టర్లు, పవర్ కేబుల్స్ తయారీలో నిమగ్నమై ఉంది. ట్రాన్స్‌ఫార్మర్లు, మోటార్లు, ఆల్టర్నేటర్లు, పవర్ డిస్ట్రిబ్యూషన్ నెట్‌వర్క్‌లలో ఉపయోగించే ఉత్పత్తులను తయారు చేస్తోంది. ప్రధానంగా ప్రభుత్వ విద్యుత్ పంపిణీ సంస్థలు (డిస్కమ్‌లు), ఈపీసీ కాంట్రాక్టర్లు, వైర్లు, కేబుల్స్ రంగంలోని వ్యాపార సంస్థలకు సేవలు అందిస్తోంది.

బ‌ల‌మైన ఆర్థిక ఫ‌లితాలు..

ఉత్తరప్రదేశ్‌లోని ఘాజియాబాద్‌లో కంపెనీకి మూడు తయారీ యూనిట్లు ఉన్నాయి. ఉత్తరప్రదేశ్, జార్ఖండ్, మధ్యప్రదేశ్, కర్ణాటక సహా పలు రాష్ట్రాల్లో తన కార్యకలాపాలను విస్తరించింది. అల్యూమినియం వైర్లు, రాడ్ల ట్రేడింగ్‌తోపాటు వైండింగ్ వైర్లు, స్ట్రిప్‌లకు సంబంధించిన జాబ్‌వర్క్ సేవలను కూడా అందిస్తోంది. పవర్ ఇన్‌ఫ్రాస్ట్రక్చర్, గ్రామీణ విద్యుదీకరణ, విద్యుత్ పంపిణీ నెట్‌వర్క్‌ల ఆధునికీకరణ కోసం పెరుగుతున్న పెట్టుబడుల వల్ల కంపెనీకి ప్రయోజనం కలుగుతోంది. పలు డిస్కమ్‌ల వద్ద నమోదై ఉండడం, ప్రభుత్వ టెండర్లలో పాల్గొనే సామర్థ్యం కలిగి ఉండడం వల్ల రివ్యాంప్డ్ డిస్ట్రిబ్యూషన్ సెక్టార్ స్కీమ్ (ఆర్‌డీఎస్‌ఎస్) త‌దిత‌ర‌ పథకాల ద్వారా వచ్చే అవకాశాలను వినియోగించుకోవాల‌ని సంస్థ భావిస్తోంది. ఆర్థిక ఫలితాల పరంగా కూడా కంపెనీ గణనీయమైన వృద్ధిని నమోదు చేసింది. 2025-26 ఆర్థిక సంవత్సరంలో ఆదాయం రూ.136.05 కోట్ల నుంచి దాదాపు రెట్టింపై రూ.269.96 కోట్లకు చేరింది. పన్నుల అనంతర లాభం 223 శాతం పెరిగి రూ.5.65 కోట్ల నుంచి రూ.18.25 కోట్లకు ఎగసింది. అలాగే ఈబిట్డా రూ.12 కోట్ల నుంచి రూ.32.08 కోట్లకు పెరగడం ద్వారా వ్యాపార విస్తరణ, కార్యకలాపాల సామర్థ్యం మెరుగుపడినట్లు స్పష్టమైంది.