IT Stocks Crash | స్టాక్ మార్కెట్లకు ఐటీ షాక్.. వెంటాడుతున్న ఆంత్రోపిక్ భయం

• 5 శాతానికి పైగా పడిపోయిన టాప్ 5 ఐటీ కంపెనీలు
• టెక్‌మహీంద్రా 6.40 శాతం డ్రాప్
• 5.97 శాతం పడిన ఇన్ఫోసిస్
• 5.77 శాతం పడిన టీసీఎస్

IT Stocks Crash | త్రినేత్ర.న్యూస్ : భారత స్టాక్ మార్కెట్లు మరోసారి కుదేలయ్యాయి. టాప్ ఐటీ కంపెనీలు గురువారం 5 శాతానికి పైగా నష్టపోయాయి. దీని వల్ల ఐటీ కంపెనీలు లిస్టు అయిన ఉన్న నిఫ్టీ 50 నష్టాలతో ముగిసింది. నిఫ్టీ 50 146 పాయింట్ల నష్టంతో 0.57 శాతం పడింది. ఐటీ కంపెనీల్లో అత్యధికంగా టెక్‌మహీంద్రా 6.40 శాతం నష్టపోయింది. ఆ తర్వాత ఇన్ఫోసిస్ 5.97 శాతం, టీసీఎస్ 5.77 శాతం, హెచ్‌సీఎల్ 5.20 శాతం, విప్రో 4.79 శాతం నష్టపోయాయి. నిఫ్టీ ఐటీ ఇండెక్స్ 5.51 శాతం నష్టపోయి 33,160 పాయింట్ల వద్ద ముగిసింది.

3 లక్షల కోట్ల సంపద మాయం

ఇప్పటికే ఆంత్రోపిక్ ఏఐ వల్ల ఐటీ స్టాక్స్ భారీగా నష్టపోయిన విషయం తెలిసిందే. ఆంత్రోపిక్ భయం ఇంకా ఐటీ స్టాక్స్‌ను వెంటాడుతోంది. దానికి తోడు యూఎస్‌లో వెలువడిన జాబ్స్ డేటా కూడా ఐటీ షేర్లపై ప్రభావం చూపిస్తోంది. ఫెడ్ వడ్డీ రేట్లు తగ్గించే అవకాశాలు తక్కువగా ఉన్నాయన్న భయం కూడా మార్కెట్‌ను వెంటాడుతోంది. అందుకే టాప్ ఐటీ కంపెనీలు గురువారం మరోసారి భారీ నష్టాలను చవిచూశాయి. దీని వల్ల బీఎస్ఈ సెన్సెక్స్‌లో లిస్ట్ అయిన కంపెనీలు సుమారు రూ.3 లక్షల కోట్ల సంపదను కోల్పోవాల్సి వచ్చింది.

558 పాయింట్లు నష్టపోయిన సెన్సెక్స్

బీఎస్ఈ ఇండెక్స్ సెన్సెక్స్ 558 పాయింట్లు నష్టపోయి 83,674 పాయింట్ల వద్ద ముగిసింది. ఐటీ స్టాక్స్‌తో పాటు ఎంఅండ్ఎం, హిందుస్థాన్ యూనిలివర్, రిలయన్స్, ఎటర్నల్, కొటక్ బ్యాంక్, హెచ్‌డీఎఫ్‌సీ బ్యాంక్, అదానీ పోర్ట్స్, మారుతీ, యాక్సిస్ బ్యాంక్, ఇండిగో, పవర్ గ్రిడ్, ఐటీసీ, ఎన్టీపీసీ లాంటి కంపెనీలు కూడా గురువారం నష్టపోయాయి. ఇక సెన్సెక్స్, నిఫ్టీ 50 లో గురువారం లాభపడిన స్టాక్స్‌లో బజాజ్ ఫైనాన్స్, ఐసీఐసీఐ బ్యాంక్, బీఈఎల్, ఎస్బీఐ ఉన్నాయి.