SEBI | మార్కెట్‌లో భారీ ఊగిసలాటలకు చెక్.. సెబీ కొత్త ప్లాన్..

SEBI | భారత మార్కెట్ నియంత్రణ సంస్థ (సెబీ) ఆప్షన్స్ ట్రేడింగ్‌లో భారీ వోలాటిలిటీ సమయంలో ఎదురయ్యే సమస్యలను తగ్గించేందుకు కొత్త ఫ్రేమ్‌వర్క్‌ను ప్రతిపాదించింది. మార్కెట్‌లో అకస్మాత్తుగా ధరలు తీవ్రంగా మారినప్పుడు ట్రేడర్లకు అవసరమైన స్ట్రైక్ ప్రైస్‌లు అందుబాటులో లేకపోవడం వంటి ఇబ్బందులను నివారించడమే ఈ ప్రతిపాదన ప్రధాన లక్ష్యం. సెబీ విడుదల చేసిన మూడు పేజీల కన్సల్టేషన్ పేపర్ ప్రకారం, ఈ కొత్త విధానం ద్వారా ఈక్విటీ, కరెన్సీ, కమోడిటీ డెరివేటివ్స్ సెగ్మెంట్లలో ఆప్షన్ స్ట్రైక్ ప్రైస్‌లను మరింత సమర్థంగా నిర్వహించేందుకు స్టాక్ ఎక్స్చేంజ్‌లకు మార్గదర్శకాలు ఇవ్వనుంది. ప్రస్తుతం మార్కెట్‌లో వేగంగా ధరలు మారినప్పుడు, అందుబాటులో ఉన్న చివరి స్ట్రైక్ ప్రైస్‌ను కూడా అండర్లైయింగ్ అసెట్ దాటిపోతుంది. దీంతో ట్రేడర్లు సరైన కాంట్రాక్ట్‌లు పొందడంలో ఇబ్బందులు ఎదుర్కొంటున్నారు. ఈ సమస్యను పరిష్కరించేందుకు కనీస సంఖ్యలో ఇన్-ది-మనీ (ఐటీఎం), అవుట్-ఆఫ్-ది-మనీ (ఓటీఎం) కాంట్రాక్ట్‌లు ఎప్పటికప్పుడు అందుబాటులో ఉండేలా చూడాలని సెబీ సూచించింది.

రోజువారీ స‌మీక్ష నిర్వ‌హించాలి..

ప్రతిపాదిత నిబంధనల ప్రకారం, మార్కెట్ ప్రస్తుత ధరల చుట్టూ స్ట్రైక్‌ల లభ్యతపై స్టాక్ ఎక్స్చేంజ్‌లు రోజువారీ సమీక్ష నిర్వహించాలి. ట్రేడింగ్‌కు దూరంగా వెళ్లిపోయిన స్ట్రైక్‌లను తొలగించే అవకాశం కూడా ఉంటుంది. ఈ ఫ్రేమ్‌వర్క్‌లో కీలక అంశం ఏమిటంటే, మార్కెట్ దిశలో ఇంట్రాడే సమయంలో కొత్త స్ట్రైక్ ప్రైస్‌లను వెంటనే ప్రవేశపెట్టే సౌకర్యం కల్పించడం. దీనివల్ల బ్రోకర్లు లేదా మార్కెట్ పార్టిసిపెంట్లు లైవ్ ట్రేడింగ్ సమయంలో తమ సిస్టమ్‌లలో మార్పులు చేయాల్సిన అవసరం ఉండదు. స్ట్రైక్ ఇంటర్వెల్స్ ఎలా ఉండాలి, ఎన్ని కొత్త కాంట్రాక్ట్‌లు ప్రవేశపెట్టాలి, ప్రస్తుత ధరలకు చాలా దూరంగా ఉన్న స్ట్రైక్‌లకు విస్తృత ఇంటర్వెల్స్ ఇవ్వాలా అనే అంశాల్లో ఎక్స్చేంజ్‌లకు సెబీ స్వేచ్ఛ ఇవ్వాలని ప్రతిపాదించింది. అదేవిధంగా మార్కెట్ పార్టిసిపెంట్లతో సంప్రదింపులు జరిపి ఈ విధానాన్ని సమయానుకూలంగా సమీక్షించాలని, పూర్తి మెకానిజాన్ని తమ వెబ్‌సైట్లలో ప్రచురించాలని కూడా సెబీ సూచించింది.

ఈ కొత్త నిబంధనలు అమల్లోకి వస్తే, డిసెంబర్ 2024లో జారీ చేసిన సెబీ మాస్టర్ సర్క్యులర్‌లోని స్ట్రైక్ ఇంటర్వెల్ రేషనలైజేషన్ క్లాజ్ స్థానంలో ఇవి అమలులోకి రానున్నాయి. ఈ కన్సల్టేషన్ పేపర్‌పై ప్రజల అభిప్రాయాలను సెబీ జూన్ 15 వరకు ఆహ్వానిస్తోంది.