RBI Repo Rate | హోమ్ లోన్ తీసుకుంటున్నారా.. ఫిక్స్‌డ్ వ‌ర్సెస్ ఫ్లోటింగ్‌.. ఏది బెట‌ర్‌..

RBI Repo Rate | ఆర్బీఐ తాజాగా రెపో రేటును 25 బేసిస్ పాయింట్లు పెంచి 5.50 శాతానికి చేర్చడంతో రిటైల్ రుణాలపై ప్రభావం ఎలా ఉంటుందన్న చర్చ మొదలైంది. అక్టోబర్ 7న ముగిసిన మూడు రోజుల సమావేశం అనంతరం ఆర్బీఐ గవర్నర్ సంజయ్ మల్హోత్రా ఈ నిర్ణయాన్ని ప్రకటించారు. ద్రవ్యోల్బణంపై ఆందోళనలు పెరగడం ఈ నిర్ణయానికి ప్రధాన కారణమని ఆయన తెలిపారు. మధ్యప్రాచ్య సంక్షోభం, భారత్‌తోపాటు ప్రపంచవ్యాప్తంగా నెలకొన్న విస్తృత ఆర్థిక పరిస్థితులు వంటి అంశాలు కూడా దీనిపై ప్రభావం చూపాయని వివరించారు. ఆర్బీఐ నిర్దేశించిన 4 శాతం ద్రవ్యోల్బణ లక్ష్యం కంటే ద్రవ్యోల్బణం ఇంకా అధికంగానే ఉండడం, అంతర్జాతీయ పరిణామాల కారణంగా ముడి చమురు ధరలు పెరిగే అవకాశాలు ఉండడంతో కేంద్ర బ్యాంక్ రెపో రేటును పెంచింది. దీంతో రుణగ్రహీతలపై రుణ వ్యయం పెరిగే అవకాశం ఉంది. బ్యాంకులు ఈ ప్రభావాన్ని వినియోగదారులకు ఎంతవరకు బదిలీ చేయాలన్నది నిర్ణయించడానికి మరికొన్ని రోజులు పట్టే అవకాశం ఉంది. ముఖ్యంగా ఇప్పటికే ఫ్లోటింగ్ వడ్డీ రేటుతో హోమ్ లోన్ వంటి రిటైల్ రుణాలు తీసుకున్నవారికి ఈ నిర్ణయం వల్ల ఈఎంఐలు పెరిగే అవకాశం ఉంది.

ఫిక్స్‌డ్‌ వర్సెస్ ఫ్లోటింగ్ హోమ్ లోన్..

ఆర్బీఐ రెపో రేటును పెంచిన నేపథ్యంలో ఫ్లోటింగ్ రేట్ హోమ్ లోన్లు మరింత ఖరీదయ్యే అవకాశం ఉంది. ఎందుకంటే ఫ్లోటింగ్ రేట్ రుణాల వడ్డీ సాధారణంగా రెపో రేటు వంటి ఎక్స్‌టర్నల్ బెంచ్‌మార్క్‌లతో అనుసంధానమై ఉంటుంది. రెపో రేటు పెరిగితే బ్యాంకులు తమ రుణ వడ్డీ రేట్లను పెంచే అవకాశం ఉంటుంది. దీంతో రుణగ్రహీతల ఈఎంఐ లేదా రుణ కాలవ్యవధి పెరుగుతుంది. మరోవైపు ఫిక్స్‌డ్ రేట్ హోమ్ లోన్లలో రుణం తీసుకునే సమయంలో నిర్ణయించిన వడ్డీ రేటు లాక్ అవుతుంది. అందువల్ల ఇప్పటికే ఫిక్స్‌డ్ రేట్ రుణం తీసుకున్నవారిపై రెపో రేటు పెంపు ప్రభావం ఉండదు. భారత్‌లోని రుణదాతలు సాధారణంగా హోమ్ లోన్లపై ఫిక్స్‌డ్ వడ్డీ రేటును ఫ్లోటింగ్ రేటు కంటే ఎక్కువగా నిర్ణయిస్తారు. అందుకే చాలామంది రుణగ్రహీతలు ఫ్లోటింగ్ రేట్‌ను ఎంచుకుంటారు. భవిష్యత్తులో ఆర్బీఐ రెపో రేటును తగ్గించే అవకాశం ఉన్నప్పుడు ఫ్లోటింగ్ రేట్ రుణాలు తీసుకున్నవారికి ప్రయోజనం కలుగుతుంది. అయితే ప్రస్తుత పరిస్థితుల్లో వడ్డీ రేట్ల దిశపై అనిశ్చితి పెరగడంతో ఫిక్స్‌డ్, ఫ్లోటింగ్ రేట్లలో ఏది మెరుగైన ఎంపిక అన్నదానిపై రుణగ్రహీతలు మరోసారి ఆలోచించాల్సిన పరిస్థితి ఏర్పడింది.

వ‌డ్డీ ఎలా ఉంటుంది..

సాధారణంగా ఫిక్స్‌డ్ హోమ్ లోన్ వడ్డీ రేట్లు ఫ్లోటింగ్ రేట్ల కంటే 1 నుంచి 2.5 శాతం వరకు ఎక్కువగా ఉంటాయి. భవిష్యత్తులో మార్కెట్ వడ్డీ రేట్లు పెరిగే ప్రమాదాన్ని భరించేందుకు రుణదాతలు అదనపు ప్రీమియం వసూలు చేయడం ఇందుకు కారణం. ఉదాహరణకు ఒక బ్యాంకు ప్రస్తుతం ఫ్లోటింగ్ హోమ్ లోన్‌కు 8 శాతం వడ్డీ వసూలు చేస్తుందని అనుకుందాం. అదే బ్యాంకు ఫిక్స్‌డ్ రేట్ సుమారు 9 శాతం నుంచి 10.5 శాతం మధ్య ఉండే అవకాశం ఉంది. ఇప్పుడు ఆర్బీఐ రెపో రేటును 25 బేసిస్ పాయింట్లు పెంచిన నేపథ్యంలో ఫ్లోటింగ్ రేట్ 8.25 శాతానికి పెరుగుతుంది. అయినప్పటికీ ఇది ఫిక్స్‌డ్ రేట్‌తో పోలిస్తే తక్కువగానే ఉంటుంది. అందువల్ల తాజా రెపో రేటు పెంపు తర్వాత కూడా ఫ్లోటింగ్ రేట్ కొంతమంది రుణగ్రహీతలకు ఆకర్షణీయమైన ఎంపికగా కొనసాగుతుంది.

భవిష్యత్తులో ఏం జరగొచ్చు?

ద్రవ్యోల్బణంపై ఆందోళనలు కొనసాగితే, దేశీయ, అంతర్జాతీయ ఆర్థిక పరిస్థితుల్లో మార్పులు రాకపోతే రాబోయే త్రైమాసికాల్లో ఆర్బీఐ మరింత‌గా వడ్డీ రేట్ల పెంపులను చేపట్టే అవకాశం ఉంటుంది. అలాంటి పరిస్థితుల్లో ఫ్లోటింగ్ రేట్ రుణాలు తీసుకున్నవారు తమ ఈఎంఐ బడ్జెట్‌లో మరిన్ని మార్పులకు సిద్ధంగా ఉండాలి. అంతిమంగా ఫిక్స్‌డ్ లేదా ఫ్లోటింగ్ రేట్‌ను ఎంచుకోవడం రుణగ్రహీత ఆర్థిక ప్రాధాన్యతలపై ఆధారపడి ఉంటుంది. వడ్డీ రేటు స్థిరత్వం, ముందుగానే ఈఎంఐని అంచనా వేసుకునే సౌలభ్యం కావాలనుకునేవారికి ఫిక్స్‌డ్ రేట్ అనుకూలంగా ఉంటుంది. మరోవైపు వడ్డీ రేట్లలో హెచ్చుతగ్గులను భరించే సామర్థ్యం ఉన్నవారికి ఫ్లోటింగ్ రేట్ ఉపయోగకరంగా ఉంటుంది. నిర్ణయం తీసుకునే ముందు ఆర్థిక నిపుణుడిని సంప్రదించి, ఆర్థిక పరిస్థితులు, ద్రవ్యోల్బణం, భవిష్యత్తులో వడ్డీ రేట్ల దిశ వంటి అంశాలను పరిశీలించడం మంచిది.

ఇక కొంతమంది రుణదాతలు హైబ్రిడ్ హోమ్ లోన్ ఉత్పత్తులను కూడా అందిస్తున్నారు. వీటిలో ప్రారంభంలో నిర్ణీత కాలానికి వడ్డీ రేటు ఫిక్స్‌డ్‌గా ఉంటుంది. ఆ కాలం ముగిసిన తర్వాత రుణం ఆటోమేటిక్‌గా ఫ్లోటింగ్ రేట్‌కు మారుతుంది. రుణం తీసుకునే ముందు ఫిక్స్‌డ్, ఫ్లోటింగ్‌తో పాటు హైబ్రిడ్ ఎంపికలోని నిబంధనలు, వడ్డీ రేట్లు, మార్పిడి నిబంధనలను కూడా పూర్తిగా పరిశీలించడం అవ‌స‌రం.