ITR Filing | ఐటీఆర్ రీఫండ్ ఇక వేగంగా.. 7-10 రోజుల్లోనే ఖాతాలో డబ్బు.. స్టేటస్ ఇలా చెక్ చేయండి..

ITR Filing | ఈ ఐటీఆర్ ఫైలింగ్ సీజన్‌లో ఆదాయపు పన్ను రిటర్నులు దాఖలు చేస్తున్న పన్ను చెల్లింపుదారులకు గత అసెస్‌మెంట్ సంవత్సరాలతో పోలిస్తే మరింత వేగంగా రీఫండ్‌లు అందుతున్నాయి. గతంలో రీఫండ్ కోసం నెలల తరబడి వేచి చూడాల్సి వచ్చేది. ఇప్పుడు మాత్రం అనేక సందర్భాల్లో కొద్ది రోజుల్లోనే రీఫండ్ ప్రాసెస్ పూర్తవుతోంది. ప్రతి కేసులో ప్రాసెసింగ్ సమయం భిన్నంగా ఉన్నప్పటికీ, సులభమైన ఆదాయపు పన్ను రిటర్నులు దాఖలు చేసిన జీతభత్య ఉద్యోగులకు సాధారణంగా 7 నుంచి 10 పని రోజుల వ్యవధిలోనే రీఫండ్ వారి బ్యాంకు ఖాతాల్లో జమ అవుతున్నట్లు ప్రారంభ ధోరణులు సూచిస్తున్నాయి. ఆదాయపు పన్ను శాఖ రీఫండ్‌లను ప్రాసెస్ చేసే విధానంలో ఇది ఒక కీలకమైన మార్పుగా భావిస్తున్నారు. ఇందుకు ప్రధాన కారణాలు ఆదాయపు పన్ను శాఖ సెంట్రలైజ్డ్ ప్రాసెసింగ్ సెంటర్ (సీపీసీ)లో పెరిగిన ఆటోమేషన్, ప్రీ-ఫిల్డ్ డేటాను సమర్థవంతంగా వినియోగించడం, అలాగే రిటర్నుల ధ్రువీకరణ ప్రక్రియ వేగవంతం కావడమేన‌ని నిపుణులు చెబుతున్నారు.

ఈ-వెరిఫై త‌రువాతే రిఫండ్ ప్రాసెసింగ్‌..

రిఫండ్ ప్రాసెసింగ్ అంటే పన్ను చెల్లింపుదారు తన ఐటీఆర్‌ను ఈ-వెరిఫై చేసిన తర్వాతే ప్రారంభమవుతుంది. ఆదాయపు పన్ను శాఖ వెబ్‌సైట్ ప్రకారం, ఈ-వెరిఫికేషన్ పూర్తైన తర్వాత సాధారణంగా 4 నుంచి 5 వారాల్లో రీఫండ్ బ్యాంకు ఖాతాలో జమ అవుతుంది. ముఖ్యంగా ఏఐఎస్, టీడీఎస్ వివరాలతో ఆదాయపు పన్ను శాఖ రికార్డులు పూర్తిగా సరిపోలే రిటర్నులు ఎలాంటి ఆలస్యం లేకుండా ప్రాసెస్ అయ్యే అవకాశాలు ఎక్కువగా ఉంటాయి. అదేవిధంగా సరైన బ్యాంకు ఖాతా వివరాలు నమోదు చేయడం, ఐటీఆర్‌ను సమయానికి ఈ-వెరిఫై చేయడం కూడా రీఫండ్ వేగంగా రావడంలో కీలక పాత్ర పోషిస్తాయి. అయితే ప్రస్తుతం వ్యవస్థ మరింత వేగవంతం కావడంతోపాటు డేటా విషయంలో కూడా చాలా సున్నితంగా పనిచేస్తోంది.

అనుమానం వ‌స్తే అద‌న‌పు ప‌రిశీల‌న‌కు..

పన్ను చెల్లింపుదారులు రిటర్నులో ఇచ్చిన సమాచారం, అధికారిక రికార్డుల్లో ఉన్న వివరాల మధ్య చిన్నపాటి వ్యత్యాసాలు ఉన్నా కూడా రీఫండ్ ఆలస్యమయ్యే అవకాశం ఉంటుంది. గత కొన్నేళ్లలో రీఫండ్ ప్రాసెసింగ్ వ్యవస్థ గణనీయంగా మెరుగుపడింది. ప్రస్తుతం ఏఐఎస్, టీఐఎస్, ఫామ్ 26ఏఎస్, ప్రీ-ఫిల్డ్ రిటర్నులు, ఆటోమేటెడ్ వెరిఫికేషన్ వ్యవస్థలు, అలాగే బ్యాంకులు, యజమానులు, బ్రోకర్లు తదితర సంస్థల నుంచి వచ్చే రియల్‌టైమ్ డేటా సమన్వయంతో ప్రాసెసింగ్ జరుగుతోంది. అయితే వ్యవస్థ వేగంగా పనిచేస్తున్నందుకే ప్రతి ఒక్కరికీ వెంటనే రీఫండ్ వస్తుందని భావించకూడదు. కొన్ని రిటర్నులు ఆదాయపు పన్ను శాఖ ఆటోమేటెడ్ రిస్క్ ఫిల్టర్ల కింద అదనపు పరిశీలనకు వెళ్లే అవకాశం ఉంటుంది. ముఖ్యంగా ఆదాయాన్ని తక్కువగా చూపినట్లు అనుమానం ఉన్న కేసులను గుర్తించేందుకు ఈ వ్యవస్థ పనిచేస్తుంది. అలాంటి సందర్భాల్లో రీఫండ్ ఆలస్యమయ్యే అవకాశం ఉంటుంది.

స్టేట‌స్ చెకింగ్ ఇలా..

రిఫండ్ స్టేటస్‌ను ఆన్‌లైన్‌లో సులభంగా తెలుసుకోవచ్చు. ఇందుకోసం ఆదాయపు పన్ను శాఖ అధికారిక పోర్టల్‌లో లాగిన్ అయ్యి ఈ-ఫైల్ > ఇన్‌కమ్ ట్యాక్స్ రిటర్న్స్ > వ్యూ ఫైల్డ్ రిటర్న్స్ విభాగానికి వెళ్లాలి. అనంతరం సంబంధిత అసెస్‌మెంట్ ఇయర్ వద్ద వ్యూ డీటెయిల్స్ ఆప్ష‌న్ పై క్లిక్ చేస్తే, రీఫండ్ ప్రస్తుత స్థితి వివరాలు కనిపిస్తాయి.