Subhash Chandra | సుభాష్‌ చంద్రకు భారీ షాక్‌.. రూ.6.25 కోట్ల రీపేమెంట్‌ ప్లాన్‌పై ఎన్‌సీఎల్‌టీ స్టే..

Subhash Chandra | జీ గ్రూప్‌ వ్యవస్థాపకుడు సుభాష్‌ చంద్ర వ్యక్తిగత దివాలా ప్రక్రియలో కీలక పరిణామం చోటుచేసుకుంది. మంగళవారం ఐదుగురు సభ్యులతో కొత్తగా ఏర్పాటైన నేషనల్‌ కంపెనీ లా ట్రైబ్యునల్‌ బెంచ్‌.. ఆగస్టు 25న ఇచ్చిన ఆదేశాల అమలుపై స్టే విధించింది. రూ.22,006.57 కోట్ల మేర రుణదాతల క్లెయిమ్‌లకు వ్యతిరేకంగా సుభాష్‌ చంద్ర ప్రతిపాదించిన రూ.6.25 కోట్ల రీపేమెంట్‌ ప్లాన్‌కు ఆగస్టు 25న ఆమోదం లభించగా, తాజాగా దాని అమలును ట్రైబ్యునల్‌ నిలిపివేసింది. ఎన్‌సీఎల్‌టీ అధ్యక్షుడు, మాజీ న్యాయమూర్తి అనుపిందర్‌ సింగ్‌ గ్రేవాల్‌ నేతృత్వంలోని ఐదుగురు సభ్యుల బెంచ్‌ ఈ ఆదేశాలు జారీ చేసింది. కేసు విచారణ కొనసాగుతున్నంతకాలం గ్యారంటర్‌ అయిన సుభాష్‌ చంద్ర తన ఆస్తులను ప్రత్యక్షంగా లేదా పరోక్షంగా విక్రయించడం, బదిలీ చేయడం, ఇతరులకు అప్పగించడం, తనఖా పెట్టడం లేదా మరే విధంగానైనా వాటితో వ్యవహరించరాదని బెంచ్‌ స్పష్టం చేసింది.

కేసు ఐదుగురు స‌భ్యుల బెంచ్ ముందుకు..

ఈ కేసులోని అన్ని పక్షాలకు ఎన్‌సీఎల్‌టీ నోటీసులు జారీ చేసింది. సుభాష్‌ చంద్ర సహా అన్ని పక్షాలు తమ సమాధానాలను సమర్పించాలని ఆదేశించింది. ఆగస్టు 25న వెలువడిన తీర్పును ప్రస్తుతం అమలు చేయరాదని స్పష్టం చేసిన బెంచ్‌.. తదుపరి చర్యలు చేపట్టే ముందు అన్ని పక్షాల వాదనలను పూర్తిగా వింటామని తెలిపింది. కాగా తొలుత కేసును విచారించిన ఇద్దరు సభ్యుల ఎన్‌సీఎల్‌టీ బెంచ్‌లో జ్యుడిషియల్‌ మెంబర్‌ అశోక్‌ కుమార్‌ భరద్వాజ్‌, టెక్నికల్‌ మెంబర్‌ రీనా సిన్హా పురి ఉన్నారు. సుభాష్‌ చంద్ర రీపేమెంట్‌ ప్లాన్‌పై ఈ ఇద్దరి మధ్య మెజారిటీ అభిప్రాయం ఏర్పడలేదు. దీంతో కేసు మూడో సభ్యుడు నీలేశ్‌ శర్మ వద్దకు వెళ్లింది. ఆగస్టు 25న నీలేశ్‌ శర్మ రీపేమెంట్‌ ప్లాన్‌కు అనుకూలంగా అభిప్రాయం వ్యక్తం చేశారు. అయితే ఆ తర్వాత అసలు ఇద్దరు సభ్యులు ముగ్గురు సభ్యులు వేర్వేరు, కీలకమైన అభిప్రాయాలను వ్యక్తం చేశారని గుర్తించారు. దీంతో కేసు ఐదుగురు సభ్యుల బెంచ్‌ ముందుకు వచ్చింది.

రుణ‌దాత‌ల తీవ్ర అభ్యంత‌రం..

సుభాష్‌ చంద్ర ప్రతిపాదించిన ప్లాన్‌ ప్రకారం రుణదాతలకు రూ.6.25 కోట్లు చెల్లించడంతో పాటు దివాలా పరిష్కార ప్రక్రియ ఖర్చుల కోసం రూ.25 లక్షలు చెల్లించాల్సి ఉంటుంది. అయితే రుణదాతల అంగీకరించిన మొత్తం క్లెయిమ్‌లు రూ.22,006.57 కోట్లుగా ఉన్నాయి. దీంతో ఇంత భారీ మొత్తానికి కేవలం రూ.6.25 కోట్ల రికవరీ మాత్రమే రావడంపై పలువురు రుణదాతలు తీవ్ర అభ్యంతరం వ్యక్తం చేశారు. రీపేమెంట్‌ ప్లాన్‌లో రికవరీ చాలా తక్కువగా ఉందని రుణదాతలు ప్రశ్నించారు. అలాగే ఓటింగ్‌ ప్రక్రియ, సుభాష్‌ చంద్రతో సంబంధం ఉన్నట్లు ఆరోపణలు ఎదుర్కొంటున్న సంస్థల భాగస్వామ్యంపై కూడా అభ్యంతరాలు వ్యక్తం చేశారు. ఈ కారణాలతో ప్లాన్‌ ఆమోదాన్ని పలువురు రుణదాతలు వ్యతిరేకించారు.

విచార‌ణ‌కు స్వీక‌రించిన ఎన్‌సీఎల్ఏటీ..

ఈ వివాదం నేషనల్‌ కంపెనీ లా అప్పిలేట్‌ ట్రైబ్యునల్‌ అయిన ఎన్‌సీఎల్‌ఏటీకి కూడా చేరింది. భిన్నాభిప్రాయాలు వ్యక్తం చేసిన రుణదాతల తరఫున సొలిసిటర్‌ జనరల్‌ తుషార్‌ మెహతా వాదనలు వినిపించారు. ఎన్‌సీఎల్‌టీ వద్ద తాజాగా చోటుచేసుకున్న పరిణామాలను ఆయన అప్పిలేట్‌ ట్రైబ్యునల్‌ దృష్టికి తీసుకెళ్లారు. ముఖ్యంగా ఐదుగురు సభ్యులతో కొత్త బెంచ్‌ ఏర్పాటు కావడం, ఆగస్టు 25 ఆదేశాల అమలుపై స్టే విధించడం వంటి అంశాలను వివరించారు. తాజా పరిణామాల నేపథ్యంలో రుణదాతలు ఎన్‌సీఎల్‌ఏటీ ముందు దాఖలు చేసిన అప్పీల్‌ను కొనసాగించాలా లేదా అనే విషయంపై నిర్ణయం తీసుకునేందుకు బుధవారం వరకు సమయం ఇవ్వాలని తుషార్‌ మెహతా కోరారు. ఈ అభ్యర్థనను పరిగణనలోకి తీసుకున్న ఎన్‌సీఎల్‌ఏటీ తదుపరి విచారణకు అవకాశం కల్పించింది. అంతకుముందు రుణదాతలు దాఖలు చేసిన సవాల్‌ను అత్యవసరంగా విచారించేందుకు ఎన్‌సీఎల్‌ఏటీ అంగీకరించింది. ఆగస్టు 25న ఎన్‌సీఎల్‌టీ ఇచ్చిన ఆదేశాలు అమల్లోకి వస్తే దివాలా, దివాలా పరిష్కార కోడ్‌ ఉద్దేశం, లక్ష్యం దెబ్బతినే అవకాశం ఉందని తుషార్‌ మెహతా అత్యవసర విచారణ కోరారు.

సుభాష్ చంద్ర ఆస్తుల‌పై ఆంక్ష‌లు..

సుభాష్‌ చంద్రపై కొనసాగుతున్న ఈ వ్యక్తిగత దివాలా కేసు ఎస్సెల్‌ గ్రూప్‌కు చెందిన సంస్థలు తీసుకున్న రుణాలకు ఆయన ఇచ్చిన వ్యక్తిగత హామీలకు సంబంధించినది. ఇండియాబుల్స్‌ హౌసింగ్‌ ఫైనాన్స్‌, ప్రస్తుతం సమ్మాన్‌ క్యాపిటల్‌గా పిలుస్తున్న సంస్థ, వివేక్‌ ఇన్‌ఫ్రాకాన్‌కు ఇచ్చిన రుణం నిరర్థకంగా మారిన తర్వాత 2022లో సుభాష్‌ చంద్రపై దివాలా చర్యలను ప్రారంభించింది. 2024లో దివాలా పిటిషన్‌ను ఎన్‌సీఎల్‌టీ అనుమతించింది. అనంతరం మరికొంతమంది రుణదాతలు కూడా ఈ ప్రక్రియలో భాగమయ్యారు. తాజా ఎన్‌సీఎల్‌టీ ఆదేశాలతో సుభాష్‌ చంద్ర ప్రతిపాదించిన రూ.6.25 కోట్ల రీపేమెంట్‌ ప్లాన్‌ ప్రస్తుతానికి అమలులోకి రాకుండా నిలిచిపోయింది. రూ.22వేల కోట్లకు పైగా అంగీకరించిన క్లెయిమ్‌లకు సంబంధించి సుమారు రూ.6.25 కోట్ల నుంచి రూ.6.5 కోట్ల వరకు చెల్లించే ప్రతిపాదనపై ఇకపై కొత్త ఐదుగురు సభ్యుల బెంచ్‌ విచారణ కొనసాగించనుంది. కేసు తేలే వరకు సుభాష్‌ చంద్ర ఆస్తులపై కూడా ఆంక్షలు కొనసాగనున్నాయి.