Stock Markets | దలాల్ స్ట్రీట్‌లో భారీ ర్యాలీ.. గంటలోనే రూ.6 లక్షల కోట్ల లాభం.. కార‌ణాలేమిటి..?

Stock Markets | అంతర్జాతీయంగా ముడిచమురు ధరలు తగ్గడం, రిలయన్స్ ఇండస్ట్రీస్ వంటి దిగ్గజ కంపెనీల మెరుగైన త్రైమాసిక ఫలితాలు, విదేశీ పెట్టుబడిదారులు తిరిగి కొనుగోళ్లకు మొగ్గుచూపడం భారత స్టాక్ మార్కెట్లకు భారీ ఊపునిచ్చాయి. సోమవారం ఉదయం సెన్సెక్స్, నిఫ్టీ సూచీలు ఒక శాతానికి పైగా లాభపడగా, గంటలోపే బీఎస్ఈలో నమోదైన కంపెనీల మార్కెట్ విలువ రూ.6 లక్షల కోట్లకు పైగా పెరిగింది.

నాయ‌క‌త్వం వ‌హించిన షేర్లు ఇవే..

దేశీయ స్టాక్ మార్కెట్లు సోమవారం భారీ లాభాలతో ప్రారంభమయ్యాయి. సెన్సెక్స్ ఏకంగా 900 పాయింట్లకు పైగా పెరగగా, నిఫ్టీ50 సూచీ 23,300 స్థాయిని దాటింది. దీంతో బీఎస్ఈలో నమోదైన అన్ని కంపెనీల మొత్తం మార్కెట్ విలువ రూ.480 లక్షల కోట్లకు చేరుకుంది. రిలయన్స్ ఇండస్ట్రీస్ షేర్లు 5 శాతానికి పైగా పెరిగి మార్కెట్ ర్యాలీకి నాయకత్వం వహించగా, టాటా స్టీల్ 4 శాతం లాభపడింది. ఎన్‌టీపీసీ, మారుతీ సుజుకీ, బీఈఎల్, పవర్ గ్రిడ్, ఎస్‌బీఐ, ఏషియన్ పెయింట్స్, టీసీఎస్, ఎం అండ్ ఎం, అల్ట్రాటెక్ సిమెంట్, హెచ్‌యూఎల్, ఎల్ అండ్ టీ, భారతీ ఎయిర్‌టెల్, అదానీ పోర్ట్స్ షేర్లు 1 నుంచి 3 శాతం వరకు పెరిగాయి. అయితే సన్ ఫార్మా షేరు 2 శాతం నష్టపోయింది. రంగాలవారీగా నిఫ్టీ ఆయిల్ అండ్ గ్యాస్ దాదాపు 3 శాతం లాభపడగా, మెటల్, పీఎస్‌యూ బ్యాంక్, కన్జ్యూమర్ డ్యూరబుల్స్ సూచీలు ఒక శాతానికి పైగా పెరిగాయి. ఫార్మా, ప్రైవేట్ బ్యాంకింగ్ సూచీలు మాత్రం నష్టాల్లోకి జారుకున్నాయి. మిడ్‌క్యాప్, స్మాల్‌క్యాప్ సూచీలు కూడా స్వల్ప లాభాల్లో కొనసాగాయి. ఎన్‌ఎస్‌ఈలో 2,053 షేర్లు లాభపడగా, 921 షేర్లు నష్టపోయాయి.

కార‌ణాలేమిటి..?

ఈ ర్యాలీకి ప్రధానంగా ఏడు అంశాలు దోహదపడ్డాయి. అమెరికా-ఇజ్రాయెల్, ఇరాన్ మధ్య కొనసాగుతున్న యుద్ధానికి ముగింపు పలికేందుకు ఇరాన్, ఖతార్ అధికారులు చర్చలు జరుపుతుండడంతో ముడిచమురు ధరలు 3 శాతానికి పైగా తగ్గాయి. బ్రెంట్ క్రూడ్ బ్యారెల్ ధర 110 డాలర్లకు, అమెరికా డబ్ల్యూటీఐ క్రూడ్ ధర 101 డాలర్లకు దిగివచ్చింది. మరోవైపు రిలయన్స్ ఇండస్ట్రీస్ జూలై-సెప్టెంబర్ త్రైమాసికంలో నికర లాభాన్ని 41 శాతం పెంచుకుని రూ.25,548 కోట్లుగా నమోదు చేసింది. జియో ప్లాట్‌ఫామ్స్ లాభం కూడా 14 శాతం పెరిగి రూ.8,389 కోట్లకు చేరింది. విదేశీ సంస్థాగత పెట్టుబడిదారులు గత 10 ట్రేడింగ్ సెషన్లలో దాదాపు 1.2 బిలియన్ డాలర్ల విలువైన భారత ఈక్విటీలను కొనుగోలు చేశారు. గత శుక్రవారం ఒక్కరోజే రూ.3,599 కోట్ల పెట్టుబడులు పెట్టారు. దీనికి తోడు దీర్ఘకాలిక మూలధన లాభాల పన్ను (ఎల్‌టీసీజీ)లో కేంద్ర ప్రభుత్వం ఊరట కల్పిస్తుంద‌న్న అంచనాలు మార్కెట్ సెంటిమెంట్‌ను బలపరిచాయి.

విదేశీ పెట్టుబ‌డిదారుల‌కు ప‌న్ను ఊర‌ట‌..?

విదేశీ పెట్టుబడిదారులపై ఎల్‌టీసీజీ పన్నును తొలగించాలని, దేశీయ మ్యూచువల్ ఫండ్ పెట్టుబడిదారులకు కూడా పన్ను ఉపశమనం కల్పించాలని సెబీ ప్రభుత్వానికి సిఫారసు చేసినట్లు రాయిటర్స్ కథనం పేర్కొంది. రూపాయి విలువ డాలర్‌తో పోలిస్తే 94.8850 వద్ద ప్రారంభమై స్వల్పంగా బలపడింది. అమెరికా బాండ్ల రాబడులు తగ్గడం, ముఖ్యంగా పదేళ్ల ట్రెజరీ బాండ్ రాబడి 5 శాతం దిగువకు రావడం కూడా ఈక్విటీ మార్కెట్లకు సానుకూలంగా మారింది. మరోవైపు కృత్రిమ మేధ ఆధారిత కంపెనీలపై ప్రపంచవ్యాప్తంగా పెట్టుబడిదారుల్లో ఆందోళనలు పెరగడంతో నాస్‌డాక్ భారీగా పడిపోయింది. ఏఐ రంగంలో భారీ పెట్టుబడులకు తగిన రాబడులు వస్తాయా అనే సందేహాలు టెక్నాలజీ షేర్లపై ఒత్తిడి పెంచాయి. దీనికి ప్రత్యామ్నాయ పెట్టుబడి గమ్యస్థానంగా భారత మార్కెట్లను కొందరు పెట్టుబడిదారులు చూస్తుండడం కూడా దేశీయ ఐటీ షేర్లకు మద్దతునిస్తోంది.

నిఫ్టీ50 కీల‌క స్థాయిలు ఇవే..

జియోజిత్ ఇన్వెస్ట్‌మెంట్స్ చీఫ్ ఇన్వెస్ట్‌మెంట్ స్ట్రాటజిస్ట్ వీకే విజయకుమార్ అభిప్రాయం ప్రకారం.. అంతర్జాతీయంగా ముడిచమురు ధరలు తగ్గడం, అమెరికా బాండ్ రాబడులు దిగిరావడం భారత మార్కెట్లకు ఊరటనిస్తున్నాయి. దేశీయంగా రుణ వృద్ధి 17.94 శాతంగా ఉండడం, అక్టోబర్‌లో జీఎస్‌టీ వసూళ్లు బలంగా నమోదవడం ఆర్థిక వ్యవస్థ పటిష్టతను సూచిస్తున్నాయని ఆయన పేర్కొన్నారు. రాబోయే బడ్జెట్‌లో ఎల్‌టీసీజీ పన్నుపై కీలక మార్పులు లేదా రద్దు ఉంటుంద‌న్న అంచనాలు కూడా మార్కెట్‌ల‌కు మరింత ఊతమిస్తాయ‌న్నారు. అయితే నిఫ్టీ సాంకేతికంగా 23,175 స్థాయి వద్ద ఒడిదుడుకులు ఎదుర్కొనే అవకాశం ఉందని జియోజిత్ చీఫ్ మార్కెట్ స్ట్రాటజిస్ట్ ఆనంద్ జేమ్స్ తెలిపారు. 23,500 నుంచి 23,800 స్థాయిల వైపు వెళ్లాలంటే ఈ అడ్డంకిని అధిగమించాలని పేర్కొన్నారు. నిఫ్టీ 23,225 పైన ముగియలేకపోతే కొనుగోలుదారులు వెనక్కి తగ్గే ప్రమాదం ఉందని, అప్పుడు 22,807 నుంచి 22,715 స్థాయిలకు పడిపోయే అవకాశం ఉందని హెచ్చరించారు.