Stock Markets | ఊహించిన‌ట్లే జ‌రిగింది.. స్టాక్ మార్కెట్ల‌లో బ్ల‌డ్ బాత్‌.. రూ.9 ల‌క్ష‌ల కోట్లు ఆవిరి..

Stock Markets | దేశీయ ఈక్విటీ బెంచ్ మార్క్ సూచీలు వ‌రుస‌గా మూడో సెష‌న్‌లోనూ భారీగా న‌ష్ట‌పోయాయి. సోమ‌వారం వినాయ‌క చ‌వితి సంద‌ర్బంగా స్టాక్ మార్కెట్ల‌కు సెల‌వు కావ‌డంతో ట్రేడింగ్ జ‌ర‌గ‌లేదు. దీంతో మూడు రోజుల విరామం అనంత‌రం మంగ‌ళ‌వారం మ‌ళ్లీ మార్కెట్లు ప్రారంభం అయ్యాయి. అయితే అంత‌ర్జాతీయ ప్ర‌తికూల సంకేతాలు అంద‌డంతో స్టాక్ మార్కెట్ల‌లో బ్ల‌డ్ బాత్ ఉంటుంద‌ని విశ్లేష‌కులు ముందుగానే అంచ‌నా వేశారు. భారీగా పెరుగుతున్న చ‌మురు ధ‌ర‌ల‌తోపాటు అమెరికా బాండ్ ఈల్డ్స్ పెరిగిన కార‌ణాల‌తో స్టాక్ మార్కెట్ల‌పై ఒత్తిడి నెల‌కొంది. దీంతో పెట్టుబ‌డిదారులు అమ్మ‌కాల‌కే మొగ్గు చూపారు. ఈ క్ర‌మంలో మంగ‌ళ‌వారం సెష‌న్‌లో సెన్సెక్స్‌ 778 పాయింట్లు పతనమై 74,004 వద్ద ముగిసింది. నిఫ్టీ 280 పాయింట్లు త‌గ్గి 23,119 వద్ద స్థిరపడింది. దీంతో నిఫ్టీ ఐదు నెలల కనిష్ఠ స్థాయికి చేరుకుంది.

భారీగా వెల్లువెత్తిన అమ్మ‌కాలు..

ఫైనాన్షియల్స్‌, రక్షణ, క్యాపిటల్‌ గూడ్స్‌ రంగాల షేర్లలో భారీ అమ్మకాలు వెల్లువెత్తాయి. విస్తృత మార్కెట్‌ కూడా తీవ్ర ఒత్తిడికి గురైంది. మిడ్‌క్యాప్‌ సూచీ 1,319 పాయింట్లు, అంటే 2 శాతానికి పైగా పడిపోయి 60,878 వద్ద ముగిసింది. నిఫ్టీలోని 50 షేర్లలో 40 షేర్లు నష్టాల్లో ముగిశాయి. అడ్వాన్స్‌-డిక్లైన్‌ నిష్పత్తి 1:5గా నమోదైంది. బీఎస్‌ఈలో లిస్టైన కంపెనీల మార్కెట్‌ క్యాపిటలైజేషన్‌ ఒక్కరోజులో దాదాపు రూ.9 లక్షల కోట్ల మేర తగ్గిపోయింది. ఫైనాన్షియల్‌ స్టాక్స్‌, ఎన్‌బీఎఫ్‌సీ షేర్లు మార్కెట్‌ల‌పై తీవ్ర ప్రభావం చూపాయి. నిఫ్టీ బ్యాంక్‌ సూచీ 812 పాయింట్లు పడిపోయి 55,795 వద్ద ముగిసింది. వడ్డీ రేట్లు పెరిగే అవకాశాలపై అంచనాలు పెరగడంతో శ్రీ‌రామ్‌ ఫైనాన్స్‌, చోళమండలం ఇన్వెస్ట్‌మెంట్‌ అండ్‌ ఫైనాన్స్‌ కంపెనీ వంటి నాన్‌-బ్యాంకింగ్‌ ఫైనాన్షియల్‌ కంపెనీల షేర్లలో అమ్మకాలు పెరిగాయి.

110 డాల‌ర్ల‌కు చేరువ‌లో చ‌మురు ధ‌ర‌లు..

అంతర్జాతీయంగా ముడిచమురు ధరలు కూడా మార్కెట్‌ సెంటిమెంట్‌ను దెబ్బతీశాయి. బ్రెంట్‌ క్రూడ్‌ ధర బ్యారెల్‌కు 110 డాలర్లకు చేరువ కావడంతో ముడిచమురు ధరలతో సంబంధం ఉన్న కంపెనీల షేర్లలో భారీ అమ్మకాలు కనిపించాయి. రక్షణ రంగ షేర్లలోనూ తీవ్ర ఒత్తిడి నెలకొంది. ఈ రంగానికి చెందిన చాలా షేర్లు 4 శాతానికి పైగా పతనమయ్యాయి. క్యాపిటల్‌ గూడ్స్‌ రంగం కూడా భారీగా నష్టపోయింది. జీఈ వెర్నోవా, సీజీ పవర్‌ షేర్లు దాదాపు 6 శాతం చొప్పున పడిపోయాయి. సోలార్‌ ఇండస్ట్రీస్‌ ఇండియా షేరు ఏకంగా 14 శాతం కుప్పకూలింది. కంపెనీ ప్రకటించిన కొనుగోలు ఒప్పందం తర్వాత అప్పుల భారం పెరుగుతుందన్న ఆందోళనలు ఇన్వెస్టర్లను వెనక్కి తగ్గించాయి. మరోవైపు, నేషనల్‌ హైవేస్‌ అథారిటీ ఆఫ్‌ ఇండియా టెండర్‌ నుంచి పీఎన్‌సీ ఇన్‌ఫ్రాటెక్‌ను నిషేధించడంతో ఆ కంపెనీ షేరు 20 శాతం పతనమైంది.

విస్తృత మార్కెట్ల‌లోనూ భారీగా అమ్మ‌కాలు..

విస్తృత మార్కెట్‌లో కూడా భారీ అమ్మకాలు నమోదయ్యాయి. మిడ్‌క్యాప్‌ సూచీ 1,319 పాయింట్లు, అంటే 2 శాతానికి పైగా నష్టపోయి 60,878 వద్ద ముగిసింది. అయితే కొన్ని రంగాలు మాత్రం మార్కెట్‌ పతనాన్ని ఎదుర్కొని లాభాల్లో నిలిచాయి. టాటా సన్స్‌ లిస్టింగ్‌పై అంచనాల నేపథ్యంలో టాటా గ్రూప్‌ షేర్లలో ఎక్కువ భాగం లాభాల్లో ముగిశాయి. టాటా కెమికల్స్‌ షేరు ఏకంగా 20 శాతం దూసుకెళ్లింది. మరోవైపు, ఆర్టిఫిషియల్‌ ఇంటెలిజెన్స్‌ రంగంలో మందగమనంపై ఆందోళనలు ఉన్నప్పటికీ ఐటీ షేర్లు లాభపడ్డాయి. నిఫ్టీ ఐటీ సూచీ దాదాపు 3 శాతం పెరిగింది. సెన్సెక్స్‌ షేర్లలో హెచ్‌సీఎల్‌ టెక్నాలజీస్‌, ఇన్ఫోసిస్‌, టాటా కన్సల్టెన్సీ సర్వీసెస్‌, టెక్‌ మహీంద్రా, విప్రో, హెచ్‌డీఎఫ్‌సీ బ్యాంక్‌ ప్రధాన లాభదారులుగా నిలిచాయి. భారత్‌ ఎలక్ట్రానిక్స్‌, హిందుస్థాన్‌ ఏరోనాటిక్స్‌, శ్రీ‌రామ్‌ ఫైనాన్స్‌, ఇంటర్‌గ్లోబ్‌ ఏవియేషన్‌, గ్రాసిమ్‌ ఇండస్ట్రీస్‌, బజాజ్‌ ఫిన్‌సర్వ్‌ షేర్లు అత్యధికంగా నష్టపోయాయి.

పెట్టుబ‌డిదారుల‌కు అల‌ర్ట్‌..

మిడ్‌క్యాప్‌, స్మాల్‌క్యాప్‌ షేర్లపై క్యాష్‌దిక్యాస్ కామ్‌కు చెందిన జై బాలా మాట్లాడుతూ ఈ విభాగాల్లో గతంలో అద్భుతమైన లాభాలు వచ్చినట్లు తెలిపారు. స్టెర్లైట్‌ టెక్నాలజీస్‌, కబ్రా ఎక్స్‌ట్రూజన్‌ టెక్నిక్‌ వంటి కొన్ని షేర్లు ఆరు రెట్లు, మూడు రెట్లు వరకు పెరిగాయని పేర్కొన్నారు. ప్రస్తుత పరిస్థితుల్లో ఇప్పటికే భారీ లాభాల్లో ఉన్న ఇన్వెస్టర్లు కొంత మేర లాభాలను బుక్‌ చేసుకోవచ్చని జై బాలా సూచించారు. ప్రస్తుత మార్కెట్‌ అస్థిరత, మరింత పతనం వంటి పరిస్థితులను తిరిగి ప్రవేశించేందుకు అవకాశాలుగా ఉపయోగించుకోవచ్చని చెప్పారు. మార్కెట్‌లోని అస్థిరత, అనిశ్చితి తగ్గిన తర్వాత ఈ షేర్లలో మళ్లీ పెట్టుబడులు పెట్టే అవకాశాన్ని పరిశీలించవచ్చని తెలిపారు. ఈ షేర్ల అప్‌ట్రెండ్‌ ఇంకా పూర్తికాలేదని, అయితే ప్రస్తుతం కొత్తగా భారీగా మూలధనం కేటాయించకుండా ఇప్పటికే వచ్చిన లాభాల్లో కొంత భాగాన్ని రక్షించుకోవడం మెరుగైన వ్యూహమని ఆయన సూచించారు.