Stock Markets | స్టాక్ మార్కెట్ల‌లో రికవరీ.. 383 పాయింట్లు పెరిగిన సెన్సెక్స్‌..

Stock Markets | నాలుగు రోజుల వరుస నష్టాలకు ముగింపు పలుకుతూ దేశీయ స్టాక్ మార్కెట్లు మంగళవారం లాభాలతో ముగిశాయి. ఐటీ రంగంలోని హెవీ వెయిట్ షేర్లలో కొనుగోళ్లు, అలాగే విలువ ఆధారిత కొనుగోళ్ల మద్దతుతో ప్రధాన సూచీలు సెన్సెక్స్, నిఫ్టీ 50 తిరిగి గ్రీన్‌లో ముగిశాయి. మధ్యప్రాచ్య ఉద్రిక్తతలు, విదేశీ సంస్థాగత పెట్టుబడిదారుల (ఎఫ్‌ఐఐలు) నిరంతర విక్రయాల కారణంగా గత నాలుగు ట్రేడింగ్ సెషన్లలో దాదాపు 3 శాతం పడిపోయిన మార్కెట్‌ల‌కు ఊరట లభించింది. బీఎస్ఈ సెన్సెక్స్ 383 పాయింట్లు (0.52 శాతం) పెరిగి 74,650 వద్ద ముగిసింది. అలాగే నిఫ్టీ50 సూచీ 101 పాయింట్లు (0.43 శాతం) లాభపడి 23,484 స్థాయికి చేరుకుంది.

ఐటీ రంగంలో భారీ ర్యాలీ..

ఐటీ రంగం మార్కెట్ ర్యాలీకి ప్రధాన బలంగా నిలిచింది. ఇన్ఫోసిస్‌, టాటా క‌న్స‌ల్టెన్సీ స‌ర్వీసెస్‌, హెచ్‌డీఎఫ్‌సీ బ్యాంక్‌, హెచ్‌సీఎల్ టెక్నాల‌జీస్ వంటి కంపెనీలు సూచీల పెరుగుదలకు గణనీయంగా దోహదపడ్డాయి. విస్తృత మార్కెట్లు కూడా లాభాల్లో ముగిసినప్పటికీ, ప్రధాన సూచీలతో పోలిస్తే కొంత వెనుకబడ్డాయి. నిఫ్టీ మిడ్‌క్యాప్ 100 సూచీ 0.19 శాతం పెరగగా, నిఫ్టీ స్మాల్‌క్యాప్ 100 సూచీ 0.40 శాతం లాభపడింది. ఈ సంద‌ర్భంగా జియోజిత్ ఇన్వెస్ట్‌మెంట్స్ రీసెర్చ్ హెడ్ వినోద్ నాయర్ మాట్లాడుతూ ప్రారంభ నష్టాల నుంచి మార్కెట్లు కోలుకుని ఐటీ రంగం కార‌ణంగా లాభాల బాట పట్టాయ‌ని అన్నారు. నిఫ్టీ 50 ప్రస్తుతం దీర్ఘకాలిక సగటు విలువలకు దగ్గరగా ట్రేడవుతుండటంతో లార్జ్‌క్యాప్ షేర్లలో పెట్టుబడిదారులు ఆసక్తి చూపుతున్నారని ఆయన తెలిపారు.

రిస్క్ తీసుకుంటున్న పెట్టుబ‌డిదారులు..

మధ్యప్రాచ్యంలో కాల్పుల విరమణకు సంబంధించిన అనిశ్చితి కొనసాగుతున్నప్పటికీ, ప్రపంచ మార్కెట్ల సెంటిమెంట్ స్థిరంగా ఉండటం రిస్క్ తీసుకునే ధోరణి ఇంకా బలంగానే ఉందని సూచిస్తోందని ఆయన పేర్కొన్నారు. కంపెనీల త్రైమాసిక ఫలితాల సీజన్ దాదాపు ముగియడంతో, ఇకపై పెట్టుబడిదారుల దృష్టి రుతుపవనాల పురోగతి, ద్రవ్యోల్బణం, ఆర్‌బీఐ ద్రవ్య విధాన నిర్ణయాలు, మార్కెట్ లిక్విడిటీ వంటి కీలక ఆర్థిక అంశాలపై ఉండే అవకాశం ఉంద‌న్నారు. నిఫ్టీ 50లో అత్యధికంగా లాభపడిన షేర్లలో టీసీఎస్‌, ఇన్ఫోసిస్‌, హెచ్‌సీఎల్ టెక్నాల‌జీస్‌, అదాని ఎంట‌ర్ ప్రైజెస్‌, విప్రో ఉన్నాయి. ఇంట్రాడే ట్రేడింగ్‌లో ఇవి 7 శాతం వరకు పెరిగాయి.

ఇక ఎన్‌టీపీసీ 3 శాతం నష్టంతో ప్రధానంగా పడిపోయిన షేర్‌గా నిలిచింది. అలాగే యాక్సిస్ బ్యాంక్‌, ప‌వ‌ర్ గ్రిడ్ కార్పొరేష‌న్ ఆఫ్ ఇండియా, హెచ్‌డీఎఫ్‌సీ లైఫ్‌, డాక్ట‌ర్ రెడ్డీస్ ల్యాబొరేట‌రీస్‌, బ‌జాజ్ ఆటో షేర్లు 1 నుంచి 1.7 శాతం వరకు నష్టాలతో ముగిశాయి.