Stock Markets | భారీ న‌ష్టాల‌తో ప్రారంభ‌మైన దేశీయ స్టాక్ మార్కెట్లు.. కొన‌సాగుతున్న ఎఫ్ఐఐల అమ్మ‌కాలు..

Stock Markets | దేశీయ స్టాక్ మార్కెట్లు మంగళవారం భారీ నష్టాలతో ప్రారంభమ‌య్యాయి. ఇరాన్-అమెరికా యుద్ధ ఉద్రిక్తతలు మళ్లీ పెరగడం, విదేశీ సంస్థాగత పెట్టుబడిదారులు (FII) వరుసగా అమ్మకాలు కొనసాగించడం వల్ల పెట్టుబడిదారులు ఆందోళనకు గురయ్యారు. దీంతో సెన్సెక్స్, నిఫ్టీ రెండూ అర శాతానికి పైగా పతనమయ్యాయి. ఉదయం ప్రారంభ సెష‌న్‌లో సెన్సెక్స్ 415 పాయింట్లకు పైగా పడిపోయి 73,852 వద్ద ట్రేడ్ అవ‌గా, నిఫ్టీ 50 సూచీ 142 పాయింట్లు క్షీణించి 23,240 స్థాయికి చేరుకుంది. మార్కెట్ అస్థిరతను సూచించే ఇండియా విక్స్ (VIX) మాత్రం 2.5 శాతం తగ్గి 16.13 వద్ద నమోదైంది. సెన్సెక్స్‌లో బజాజ్ ఫైనాన్స్ షేర్లు దాదాపు 3 శాతం క్షీణించి అత్యధిక నష్టపోయిన స్టాక్‌గా నిలిచాయి. అలాగే భారత్ ఎలక్ట్రానిక్స్, బజాజ్ ఫిన్‌సర్వ్, ట్రెంట్, ఎన్‌టీపీసీ, పవర్ గ్రిడ్, అల్ట్రాటెక్ సిమెంట్, ఎల్ అండ్ టీ షేర్లు 1 నుంచి 2 శాతం వరకు నష్టపోయాయి. మరోవైపు ఇన్ఫోసిస్, టీసీఎస్, టెక్ మహీంద్రా, హెచ్‌సీఎల్ టెక్ వంటి ఐటీ షేర్లు 1 నుంచి 3 శాతం వరకు లాభపడుతూ మార్కెట్‌ల‌కు కొంత మద్దతు ఇచ్చాయి.

కార‌ణాలు ఇవే..

విస్తృత మార్కెట్లు కూడా ఒత్తిడిలో కనిపించాయి. నిఫ్టీ స్మాల్‌క్యాప్ 100, నిఫ్టీ మిడ్‌క్యాప్ 100 సూచీలు ఒక్కోటి సుమారు 1 శాతం చొప్పున పడిపోయాయి. రంగాల వారీగా చూస్తే నిఫ్టీ ఆటో, నిఫ్టీ రియాల్టీ, నిఫ్టీ కన్స్యూమర్ డ్యూరబుల్స్ తదితర సూచీలు 1 శాతానికి పైగా నష్టపోయాయి. అయితే నిఫ్టీ ఐటీ సూచీ దాదాపు 2 శాతం పెరిగి ప్రత్యేకంగా నిలిచింది. ఎన్‌ఎస్‌ఈలో 887 షేర్లు లాభపడగా, 1,650 షేర్లు నష్టపోయాయి. 97 షేర్లలో ఎలాంటి మార్పు లేదు. జియోజిత్ ఇన్వెస్ట్‌మెంట్స్ చీఫ్ ఇన్వెస్ట్‌మెంట్ స్ట్రాటజిస్ట్ వీకే విజయకుమార్ మాట్లాడుతూ అమెరికా, దక్షిణ కొరియా, తైవాన్ మార్కెట్లు కొత్త రికార్డులు సృష్టిస్తుండగా, భారత మార్కెట్‌లో ఎఫ్‌పీఐల అమ్మకాలు కొనసాగుతున్నాయని చెప్పారు. దీంతో భారత మార్కెట్ ఇతర దేశాలతో పోలిస్తే వెనుకబడుతోందని పేర్కొన్నారు. ఇంధన ధరల షాక్ కారణంగా ప్రస్తుత ఆర్థిక సంవత్సరానికి భారత జీడీపీ వృద్ధి అంచనాల‌ను తగ్గించగా, ద్రవ్యోల్బణ అంచనాలు పెరిగాయని ఆయన తెలిపారు. అలాగే భారత వాతావరణ శాఖ (ఐఎండీ) తాజా అంచనాల ప్రకారం ఈ ఏడాది రుతుపవన వర్షపాతం దీర్ఘకాల సగటుతో పోలిస్తే 90 శాతమే ఉండొచ్చని వెల్లడించడంతో వృద్ధి, ద్రవ్యోల్బణంపై ప్రతికూల ప్రభావం పడే అవకాశం ఉందన్నారు.

చ‌మురు ధ‌ర‌లు త‌గ్గేనా..

పశ్చిమ ఆసియా సంక్షోభం పరిష్కారమై ముడి చమురు ధరలు తగ్గితే అది భారత మార్కెట్‌కు పెద్ద ఊరటనిస్తుందని, అయితే ఇప్పటివరకు అలాంటి సంకేతాలు కనిపించడం లేదని విజయకుమార్ అన్నారు. ప్రస్తుతం అనిశ్చిత పరిస్థితుల్లో పెట్టుబడిదారులు తమ రిస్క్ ప్రొఫైల్, ఆర్థిక లక్ష్యాలకు అనుగుణంగా సరైన ఆస్తుల కేటాయింపును పాటిస్తూ సహనంతో వ్యవహరించాలని సూచించారు. ఇక ఇరాన్, అమెరికా పరస్పరం దాడులు కొనసాగిస్తుండగా, ఇజ్రాయెల్ తన సైన్యాన్ని లెబనాన్‌లో మరింత ముందుకు కదలాలని ఆదేశించింది. టెహ్రాన్ మద్దతు ఉన్న హిజ్బుల్లా మిలిటెంట్ గ్రూప్‌తో పోరాటం తీవ్రరూపం దాల్చడంతో మధ్యప్రాచ్యంలో ఉద్రిక్తతలు మరింత పెరిగాయి. గత శుక్రవారం అమెరికా ఆధ్వర్యంలో ఇజ్రాయెల్-లెబనాన్ శాంతి చర్చలు జరిగినప్పటికీ, కాల్పుల విరమణ పొడిగింపుపై ఆశలు తగ్గిపోయాయి. ఈ నేపథ్యంలో అమెరికా అధ్యక్షుడు డొనాల్డ్ ట్రంప్ సోమవారం తన ట్రూత్ సోషల్ వేదికలో స్పందిస్తూ, లెబనాన్ రాజధాని బీరుట్‌పై భారీ దాడి చేయవద్దని ఇజ్రాయెల్ ప్రధాని బెంజమిన్ నెతన్యాహూకు విజ్ఞప్తి చేసినట్లు తెలిపారు. తన అభ్యర్థన మేరకు ఇజ్రాయెల్ సైన్యం వెనక్కు తిరిగిందని ఆయన పేర్కొన్నారు.

భారీగా పెరిగిన చ‌మురు ధ‌ర‌లు..

ఇక ఏప్రిల్‌లో ప్రకటించిన కాల్పుల విరమణ ఒప్పందాన్ని పొడిగించే ప్రతిపాదనపై త్వరలో నిర్ణయం తీసుకుంటానని ట్రంప్ గత వారం వెల్లడించారు. అయితే ఆ ఒప్పందంలో హిజ్బుల్లా, లెబనాన్‌ను కూడా చేర్చాలని ఇరాన్ పదేపదే డిమాండ్ చేస్తోంది. అమెరికా మాత్రం దశలవారీగా ఉద్రిక్తతలు తగ్గించే ప్రణాళికను ప్రతిపాదించినట్లు ఓ అమెరికా అధికారి తెలిపారు. మధ్యప్రాచ్య ఉద్రిక్తతల ప్రభావంతో బ్రెంట్ క్రూడ్ ధర బ్యారెల్‌కు 95 డాలర్లకు చేరువ కాగా, డబ్ల్యూటీఐ క్రూడ్ ధర 92 డాలర్ల సమీపంలో ట్రేడ్ అవుతోంది. మే నెలలో బ్రెంట్ 19 శాతం, డబ్ల్యూటీఐ 17 శాతం పతనమై 2020 మార్చి తర్వాత అతిపెద్ద నెలవారీ క్షీణతను నమోదు చేశాయి. అయిన‌ప్ప‌టికీ యుద్ధం మొద‌లైన‌ప్ప‌టి స్థాయిలతో పోలిస్తే చ‌మురు ధ‌ర‌లు ఇంకా ఎక్కువ‌గానే ఉన్నాయి. ప్రస్తుతం పెరుగుతున్న సైనిక ఘర్షణల కారణంగా ప్రపంచ చమురు సరఫరాకు కీలకమైన హోర్ముజ్ జలసంధి మూసివేతపై ఆందోళనలు పెరుగుతున్నాయి. కేవలం 33 కిలోమీటర్ల వెడల్పు ఉన్న ఈ సముద్ర మార్గం ద్వారా ప్రపంచ రోజువారీ చమురు, స‌హ‌జ వాయువు సరఫరాల్లో 20 శాతానికి పైగా రవాణా జరుగుతోంది.

ప‌త‌న‌మైన రూపాయి..

విదేశీ పెట్టుబడిదారులు భారత ఈక్విటీ మార్కెట్లో అమ్మకాల పరంపర కొనసాగిస్తున్నారు. సోమవారం ఒక్కరోజే దాదాపు రూ.3,912 కోట్ల విలువైన షేర్లను విక్రయించారు. అంతకుముందు మే 29న ఒక్క సెషన్‌లోనే రూ.22,102 కోట్ల భారీ అమ్మకాలు నమోదు కావడం మార్కెట్ సెంటిమెంట్‌ను మరింత బలహీనపరిచింది. ఇక గ్లోబల్ మార్కెట్ పరంగా చూస్తే ఆర్టిఫిషియల్ ఇంటెలిజెన్స్ రంగం వృద్ధితో చిప్ కంపెనీల షేర్లు దూసుకెళ్లడంతో దక్షిణ కొరియా స్టాక్ మార్కెట్ ప్రపంచంలో ఆరవ అతిపెద్ద ఈక్విటీ మార్కెట్‌గా భారత్‌ను అధిగమించింది. కాగా ఫారెక్స్ మార్కెట్‌లో రూపాయి విలువ మ‌ళ్లీ ప‌త‌న‌మైంది. అమెరికా డాల‌ర్‌తో పోలిస్తే రూపాయి విలువ 0.18 శాతం ప‌త‌న‌మై 95.15 వ‌ద్ద ఉంది.