Stock Markets | 500 పాయింట్లు పెరిగిన సెన్సెక్స్.. 23,900 పైన నిఫ్టీ..

Stock Markets | దేశీయ ఈక్విటీ మార్కెట్లు శుక్రవారం లాభాలతో ప్రారంభమయ్యాయి. ప్రారంభ ట్రేడింగ్‌లో సెన్సెక్స్ 500 పాయింట్లకు పైగా ఎగబాకగా, నిఫ్టీ 23,900 మార్క్‌కు పైన కొనసాగింది. ఉదయం 9:20 గంటల సమయంలో సెన్సెక్స్ 76,664.98 వద్ద ట్రేడవుతూ, గత ముగింపు 76,152.86తో పోలిస్తే 512.12 పాయింట్లు (0.67 శాతం) లాభపడింది. నిఫ్టీ 23,926.60 వద్ద ఉంది. ఇది గత ముగింపు 23,873.45తో పోలిస్తే 53.15 పాయింట్లు (0.22 శాతం) అధికం. కాగా మార్కెట్‌లో అస్థిరత కూడా తగ్గింది. ఇండియా వీఐఎక్స్ 3.10 శాతం క్షీణించి 10.99కి చేరింది. విస్తృత మార్కెట్లు కూడా సానుకూలంగా ప్రారంభమయ్యాయి. నిఫ్టీ స్మాల్‌క్యాప్ 100 సూచీ 0.45 శాతం, నిఫ్టీ మైక్రోక్యాప్ 250 సూచీ 0.45 శాతం లాభపడ్డాయి. నిఫ్టీ బ్యాంక్ కూడా స్వల్ప లాభంతో 57,429.60 వద్ద ట్రేడవుతోంది. నిఫ్టీ ఫైనాన్షియల్ సర్వీసెస్ సూచీ 0.41 శాతం పెరిగింది.

స్వ‌ల్పంగా పెరిగిన చ‌మురు ధ‌ర‌లు..

రంగాల వారీగా చూస్తే ఐటీ షేర్లు లాభాలకు నాయకత్వం వహించాయి. నిఫ్టీ ఐటీ సూచీ 1.10 శాతం పెరిగింది. నిఫ్టీ ఫైనాన్షియల్ సర్వీసెస్ ఎక్స్-బ్యాంక్, మిడ్‌స్మాల్ ఫైనాన్షియల్ సర్వీసెస్, మిడ్‌స్మాల్ ఐటీ అండ్ టెలికాం సూచీలు కూడా 0.6 శాతానికి పైగా లాభపడ్డాయి. రియాల్టీ, మీడియా, ఆయిల్ అండ్ గ్యాస్ షేర్లు కూడా లాభాల్లో ఉన్నాయి. మరోవైపు కన్స్యూమర్ డ్యూరబుల్స్, ఆటో, ఎఫ్‌ఎంసీజీ సూచీలు నష్టాల్లో ట్రేడయ్యాయి. అయితే శుక్ర‌వారం నాటి సెష‌న్‌లో ముడి చ‌మురు ధ‌ర‌లు మాత్రం స్వ‌ల్పంగా పెరిగాయి. దీంతో పెట్టుబ‌డిదారుల్లో ఓ వైపు కాస్త ఆందోళ‌న క‌నిపిస్తున్న‌ట్లు స్ప‌ష్ట‌మ‌వుతోంది. బ్రెంట్ క్రూడ్ ధ‌ర 0.07 శాతం మేర పెరిగి బ్యారెల్‌కు 94 డాల‌ర్ల వ‌ద్ద ఉండ‌గా, డ‌బ్ల్యూటీఐ క్రూడ్ ధ‌ర 0.35 శాతం మేర పెరిగి బ్యారెల్‌కు 92 డాల‌ర్ల‌కు చేరింది. ఫారెక్స్ మార్కెట్‌లో రూపాయి విలువ మ‌రోమారు త‌గ్గింది. అమెరికా డాల‌ర్‌తో పోలిస్తే 94.48 వద్ద ఉన్న రూపాయి సెష‌న్‌లో 0.01 శాతం న‌ష్ట‌పోయింది.

మిశ్ర‌మ సంకేతాలు..

జియోజిత్ ఇన్వెస్ట్‌మెంట్స్ చీఫ్ ఇన్వెస్ట్‌మెంట్ స్ట్రాటజిస్ట్ వీకే విజయ్‌కుమార్ మాట్లాడుతూ.. మార్కెట్ ప్రస్తుతం సానుకూల, ప్రతికూల సంకేతాల మిశ్రమంతో కొనసాగుతోందని తెలిపారు. ఆర్థిక సంవత్సరం 2027 తొలి త్రైమాసికంలో ప్రైవేట్ పెట్టుబడులు గతేడాది ఇదే కాలంతో పోలిస్తే ఏకంగా 97 శాతం పెరగడాన్ని ఆయన ప్రస్తావించారు. ఇది ప్రైవేట్ రంగ మూలధన వ్యయంలో మార్పునకు సంకేతంగా ఉంటుంద‌ని, రానున్న కాలంలో ఆర్థిక వృద్ధికి ఇది మద్దతు ఇస్తుంద‌ని పేర్కొన్నారు. అయితే పెరుగుతున్న ప్రపంచ బాండ్ రాబడులు ఈక్విటీ మార్కెట్లకు ప్రధాన రిస్క్‌గా మారుతున్నాయని విజయ్‌కుమార్ హెచ్చరించారు. అమెరికా 10 ఏళ్ల బాండ్ రాబడి సుమారు 4.8 శాతంగా ఉండగా, జపాన్ 10 ఏళ్ల బాండ్ రాబడి 30 ఏళ్ల గరిష్ఠానికి చేరుకుని 3 శాతంగా ఉంది. బ్రిటన్ 30 ఏళ్ల బాండ్ రాబడి సుమారు 6 శాతంగా ఉంది. భారత్‌లో 10 ఏళ్ల బాండ్ రాబడి కూడా దాదాపు 7 శాతానికి చేరువలో ఉంది.