Stock Markets | భారీ లాభాల తర్వాత మార్కెట్‌ల‌కు బ్రేక్‌.. స్వ‌ల్ప న‌ష్టాల్లో సూచీలు..

Stock Markets | దేశీయ స్టాక్ మార్కెట్లు లాభాల స్వీకరణ ఒత్తిడితో నష్టాల్లోకి జారుకున్నాయి. ఉదయం ట్రేడింగ్‌లో గరిష్ఠ స్థాయిల నుంచి సెన్సెక్స్ సుమారు 450 పాయింట్లు పడిపోగా, నిఫ్టీ 22,950 స్థాయికి దిగువన ట్రేడయ్యింది. అంతర్జాతీయ మార్కెట్లలో కృత్రిమ మేధస్సు (ఏఐ) సంబంధిత షేర్లలో పుంజుకున్న కొనుగోళ్లు, కంపెనీల త్రైమాసిక ఫలితాల ప్రభావంతో గత సెషన్‌లో సూచీలు భారీ లాభాలను నమోదు చేశాయి. ఈ నేపథ్యంలో మదుపరులు లాభాలను స్వీకరించేందుకు మొగ్గుచూపడం మార్కెట్ పతనానికి ప్రధాన కారణాల్లో ఒకటిగా నిలిచింది. ఉదయం 9:34 గంటల సమయానికి బీఎస్ఈ సెన్సెక్స్ 240.17 పాయింట్లు (0.32 శాతం) నష్టంతో 74,075.44 వద్ద ట్రేడయ్యింది. ఎన్ఎస్ఈ నిఫ్టీ 54.10 పాయింట్లు (0.24 శాతం) క్షీణించి 22,943.25 వద్ద కొనసాగింది. ఈ సమయంలో సుమారు 1,586 షేర్లు లాభాల్లో ఉండగా, 1,437 షేర్లు నష్టాల్లో ట్రేడయ్యాయి. మరో 152 షేర్లలో ఎలాంటి మార్పు నమోదు కాలేదు.

లాభాల స్వీకరణతో ఒత్తిడి..

సెన్సెక్స్ 74,500 స్థాయిని, నిఫ్టీ 23,050 స్థాయిని అధిగమించిన తర్వాత మదుపరులు లాభాల స్వీకరణకు దిగారు. గత సెషన్‌లో ఈ రెండు సూచీలు నాలుగు నెలల్లోనే అతిపెద్ద ఒక్కరోజు లాభాలను నమోదు చేశాయి. అంతర్జాతీయంగా ఏఐ ఆధారిత షేర్లలో కొనుగోళ్లు పుంజుకోవడం, కంపెనీల ఆర్థిక ఫలితాలు మార్కెట్‌కు మద్దతునివ్వడం ఇందుకు కారణమయ్యాయి. అయితే భారీ ర్యాలీ తర్వాత మదుపరులు లాభాలను స్వీకరించడంతో సూచీలపై ఒత్తిడి పెరిగింది. మార్కెట్‌లో ఒడిదొడుకులను సూచించే ఇండియా విక్స్ కూడా పెరిగింది. దాదాపు 3 శాతం పెరిగి 14.42 స్థాయికి చేరుకుంది. విక్స్ పెరుగుదల సమీప కాలంలో మార్కెట్‌లో అస్థిరత కొనసాగే అవకాశాలను సూచిస్తోంది. దీంతో మదుపరులు అప్రమత్తంగా వ్యవహరించే పరిస్థితి ఏర్పడింది.

నిఫ్టీకి 23,050 కీలక స్థాయి..

సాంకేతిక విశ్లేషణ ప్రకారం నిఫ్టీ మరింత బుల్లిష్ ధోరణిలోకి వెళ్లాలంటే 23,050 స్థాయిని స్పష్టంగా అధిగమించాల్సి ఉంటుందని విశ్లేషకులు చెబుతున్నారు. ప్రస్తుతం 23,000-23,100 పరిధి నిఫ్టీకి కీలక నిరోధ స్థాయిగా మారింది. గత పతనంలో కీలకంగా నిలిచిన ప్రాంతం, ధరల పునరుద్ధరణ స్థాయిలు కూడా ఈ పరిధిలోనే ఉండడంతో మార్కెట్ తదుపరి దిశను నిర్ణయించడంలో ఈ స్థాయి కీలకం కానుంది. బజాజ్ బ్రోకింగ్ డిప్యూటీ వైస్ ప్రెసిడెంట్‌-రీసెర్చ్ పబిత్రో ముఖర్జీ అభిప్రాయం ప్రకారం నిఫ్టీ 23,100 స్థాయిని నిలకడగా అధిగమిస్తే ప్రస్తుత రికవరీ మరింత బలపడి 23,500 స్థాయికి చేరే అవకాశం ఉంటుందని చెప్పారు. అయితే ఈ నిరోధ పరిధిని అధిగమించడంలో విఫలమైతే 22,500-23,100 మధ్య కొంతకాలం కన్సాలిడేషన్‌ కొనసాగే అవకాశం ఉంద‌ని తెలిపారు. నిఫ్టీ 22,500 స్థాయికి పైన కొనసాగినంత వరకు సమీప కాలంలో కొనసాగుతున్న రికవరీ ధోరణికి మద్దతు ఉంటుందని ఆయన పేర్కొన్నారు.

ఇక అంత‌ర్జాతీయ మార్కెట్‌లో ముడి చ‌మురు ధ‌ర‌లు ఈ సెష‌న్‌లో కాస్త త‌గ్గాయి. బ్రెంట్ క్రూడ్ ధ‌ర 0.36 శాతం త‌గ్గి బ్యారెల్‌కు 103 డాల‌ర్ల‌కు చేర‌గా, డ‌బ్ల్యూటీఐ క్రూడ్ ధ‌ర 0.36 శాతం త‌గ్గి బ్యారెల్‌కు 97 డాల‌ర్ల‌కు చేరింది. ఫారెక్స్ మార్కెట్‌లో వ‌రుస‌గా 4వ సెష‌న్‌లోనూ భార‌త రూపాయి బ‌ల‌ప‌డింది. అమెరికా డాల‌ర్‌తో పోలిస్తే 94.85 వ‌ద్ద ఉన్న రూపాయి ఈ సెష‌న్‌లో 0.20 శాతం లాభ‌ప‌డింది.