Stock Markets | స్టాక్ మార్కెట్‌ల‌లో భారీ ర్యాలీ.. 850 పాయింట్లకు పైగా పెరిగిన సెన్సెక్స్..

Stock Markets | దేశీయ స్టాక్ మార్కెట్లు గురువారం లాభాల బాట పట్టాయి. ఐటీ షేర్లలో కొనుగోళ్లు, తక్కువ స్థాయిల వద్ద మదుపరులు షేర్లను కొనుగోలు చేయడం వంటి కారణాలతో బెంచ్‌మార్క్ సూచీలు భారీగా పుంజుకున్నాయి. సెన్సెక్స్, నిఫ్టీ ఒక దశలో 1.1 శాతానికి పైగా లాభాలను నమోదు చేశాయి. ఉదయం 10:07 గంటల సమయానికి బీఎస్ఈ సెన్సెక్స్ 900.77 పాయింట్లు (1.24 శాతం) పెరిగి 73,682.66 వద్ద ట్రేడవగా.. ఎన్ఎస్ఈ నిఫ్టీ 260.80 పాయింట్లు (1.15 శాతం) లాభపడి 22,883.50 స్థాయికి చేరుకుంది. అయితే మార్కెట్లో షేర్ల కదలికలు మిశ్రమంగా కనిపించాయి. మొత్తం 1,471 షేర్లు లాభాల్లో ఉండగా.. 1,899 షేర్లు నష్టాల్లో ట్రేడయ్యాయి. మరో 182 షేర్లలో ఎలాంటి మార్పు లేదు.

ఐటీ షేర్ల‌లో జోష్‌..

మార్కెట్ ర్యాలీకి ప్రధాన కారణాల్లో ఐటీ షేర్లలో కొనుగోళ్లు ఒకటి. ఐటీ ఇండెక్స్ 1.5 శాతం పెరిగింది. హెచ్‌సీఎల్ టెక్నాలజీస్ ప్రకటించిన ఆశాజనక ఫలితాల నేపథ్యంలో ఐటీ సూచీ గత మూడు ట్రేడింగ్ సెషన్లలో కలిపి సుమారు 7.8 శాతం లాభపడింది. మార్కెట్లు గత ఆరు నెలల కనిష్ఠ స్థాయిల సమీపంలో ట్రేడవుతుండడంతో, తక్కువ ధరలకు లభిస్తున్న షేర్లను కొనుగోలు చేసేందుకు మదుపరులు ఆసక్తి చూపిస్తున్నారు. ఈ వాల్యూ బయ్యింగ్ కూడా సూచీల పెరుగుదలకు దోహదపడింది. సాంకేతిక విశ్లేషణ ప్రకారం, నిఫ్టీ 22,600 స్థాయికి దిగువన ట్రేడైతేనే మార్కెట్లో బేరిష్ ధోరణి బలపడే అవకాశం ఉందని విశ్లేషకులు పేర్కొంటున్నారు.

త‌గ్గిన చ‌మురు ధ‌ర‌లు..

థిన్‌క్రెడ్‌బ్లూ సెక్యూరిటీస్ వ్యవస్థాపకుడు గౌరవ్ ఉదానీ మాట్లాడుతూ.. సెన్సెక్స్ వీక్లీ ఎక్స్‌పైరీ నేపథ్యంలో మార్కెట్లో ఒడిదొడుకులు ఎక్కువగా ఉంటాయ‌ని తెలిపారు. నిఫ్టీ నిలకడగా కోలుకుంటే 22,750-22,850 స్థాయిల వైపు కదిలే అవకాశం ఉందని, అదే సమయంలో 22,500 స్థాయిని స్పష్టంగా దిగువకు బ్రేక్ చేస్తే మళ్లీ అమ్మకాల ఒత్తిడి పెరుగుతుంద‌ని పేర్కొన్నారు. ట్రేడర్లు కీలక ధరల స్థాయిల వద్ద మార్కెట్ కదలికలను జాగ్రత్తగా గమనించాలని, ఆకస్మిక పెరుగుదలలను చూసి తొందరపడి కొనుగోళ్లు చేయకుండా ఉండాలని సూచించారు. ఇక అంత‌ర్జాతీయ మార్కెట్‌ల‌లో ముడి చ‌మురు ధ‌ర‌లు భారీగా త‌గ్గ‌డం కూడా ఈక్విటీ సూచీల ర్యాలీకి కార‌ణ‌మైంది. బ్రెంట్ క్రూడ్ ధ‌ర 1.88 శాతం త‌గ్గి బ్యారెల్‌కు 102 డాల‌ర్ల‌కు చేర‌గా, డ‌బ్ల్యూటీఐ క్రూడ్ ధ‌ర 1.40 శాతం ప‌త‌న‌మై బ్యారెల్‌కు 94 డాల‌ర్ల‌కు వ‌చ్చింది. ఫారెక్స్ మార్కెట్‌లో వ‌రుస‌గా మూడో రోజు కూడా భార‌త రూపాయి బ‌ల‌ప‌డింది. అమెరికా డాల‌ర్‌తో పోలిస్తే 94.99 వ‌ద్ద ఉన్న రూపాయి ఈ సెష‌న్‌లో 0.16 శాతం లాభ‌ప‌డింది.