Stock Markets | స్టాక్ మార్కెట్ల‌కు చమురు సెగ.. భారీ న‌ష్టాల్లో సూచీలు..

Stock Markets | దేశీయ స్టాక్ మార్కెట్లు గురువారం ఉదయం నష్టాలతో ప్రారంభమయ్యాయి. అంతర్జాతీయ మార్కెట్లలో ముడి చమురు ధరలు అధిక స్థాయిలో కొనసాగుతుండటం ఇన్వెస్టర్ల సెంటిమెంట్‌పై ఒత్తిడి పెంచింది. అయితే కొన్ని ఐటీ, వినియోగ రంగ షేర్లు మార్కెట్‌కు కొంత మద్దతు అందించాయి. మరోవైపు అంతర్జాతీయ మార్కెట్ల పరిణామాలతోపాటు ముడి చమురు ధరల భవిష్యత్ గమనంపై ఇన్వెస్టర్లు దృష్టి సారించారు. ముడి చమురు ధరలు భారత స్టాక్ మార్కెట్లకు కీలకమైన రిస్క్‌గా కొనసాగుతున్నాయి. బీఎస్ఈ సెన్సెక్స్‌ 78,111.91 పాయింట్ల వద్ద ప్రారంభమై, ఉదయం 9:22 గంటలకు 161.17 పాయింట్లు (0.21 శాతం) నష్టంతో 77,805.18 పాయింట్ల వద్ద కొనసాగింది. ఎన్ఎస్ఈ నిఫ్టీ 50 సూచీ 24,431.60 పాయింట్ల వద్ద ప్రారంభమై, 90.55 పాయింట్లు (0.37 శాతం) క్షీణించి 24,345.40 పాయింట్ల వద్ద ట్రేడైంది.

స్వ‌ల్పంగా పెరిగిన చ‌మురు ధ‌ర‌లు..

మార్కెట్ ప్రారంభంలో మిశ్రమ ధోరణి కనిపించింది. కొన్ని భారీ మార్కెట్ విలువ కలిగిన షేర్లు లాభాల్లో ఉండగా, పలు బ్యాంకింగ్, ఇంధన, పారిశ్రామిక రంగ షేర్లు ఒత్తిడికి లోనయ్యాయి. నిఫ్టీ స్మాల్‌క్యాప్ 100 సూచీ 0.26 శాతం లాభపడగా, నిఫ్టీ మిడ్‌క్యాప్ 50, నిఫ్టీ మిడ్‌క్యాప్ 100, నిఫ్టీ 200 సూచీలు వరుసగా 0.11 శాతం, 0.09 శాతం, 0.28 శాతం నష్టపోయాయి. అంత‌ర్జాతీయ మార్కెట్ల‌లో ముడి చ‌మురు ధ‌ర‌లు స్వ‌ల్పంగా పెరిగాయి. బ్రెంట్ క్రూడ్ ధ‌ర 0.26 శాతం మేర పెరిగి బ్యారెల్‌కు 91 డాల‌ర్ల‌కు చేర‌గా, డ‌బ్ల్యూటీఐ క్రూడ్ ధ‌ర 0.40 శాతం పెరిగి బ్యారెల్‌కు 83 డాల‌ర్ల‌కు చేరుకుంది. ఫారెక్స్ మార్కెట్‌లో భార‌త రూపాయి మ‌ళ్లీ బ‌ల‌హీన ప్ర‌ద‌ర్శ‌న చేసింది. అమెరికా డాల‌ర్‌తో పోలిస్తే 95.36 వ‌ద్ద ఉన్న రూపాయి ఈ సెష‌న్‌లో 0.04 శాతం న‌ష్ట‌పోయింది.

భారత్ భారీ స్థాయిలో ముడి చమురును దిగుమతి చేసుకునే దేశం కావడంతో అధిక చమురు ధరలు ఆందోళన కలిగిస్తున్నాయి. ముడి చమురు ధరలు దీర్ఘకాలం పెరిగిన స్థాయిలో కొనసాగితే దేశ దిగుమతి బిల్లు పెరగడంతోపాటు ద్రవ్యోల్బణంపై ఒత్తిడి పెరుగుతుంది. అదే సమయంలో కంపెనీల లాభాల మార్జిన్లపై కూడా ప్రభావం పడే అవకాశం ఉంటుంది.