Stock Markets | మ‌ళ్లీ మొద‌లైన యుద్ధ ఉద్రిక్త‌త‌లు.. ఫ్లాట్‌గా ట్రేడ‌వుతున్న సూచీలు..

Stock Markets | అమెరికా-ఇరాన్‌ల మ‌ధ్య మ‌ళ్లీ యుద్ధ ఉద్రిక్త‌త‌లు మొద‌ల‌వ‌డంతో అంత‌ర్జాతీయ ఈక్విటీ మార్కెట్ల‌లో ఆందోళ‌న నెల‌కొంది. పెట్టుబ‌డిదారులు అప్ర‌మ‌త్తంగా వ్య‌వ‌హ‌రిస్తున్నారు. మార్కెట్లు ఇప్ప‌టికే ర్యాలీలో ఉండ‌గా గ‌త సెష‌న్ ముగింపులో పెట్టుబ‌డిదారులు సుదీర్ఘ వారాంతం కార‌ణంగా ప్రాఫిట్ బుకింగ్‌కు మొగ్గు చూపారు. దీంతో సూచీల్లో కాస్త క‌రెక్ష‌న్ వ‌చ్చింది. అయితే మ‌ధ్య ప్రాచ్యంలో మ‌ళ్లీ దాడులు ప్రారంభ‌మైన నేప‌థ్యంలో ఈక్విటీ మార్కెట్ల ర్యాలీకి బ్రేక్ ప‌డింది. సోమ‌వారం సెష‌న్‌లో సూచీలు స్వ‌ల్ప న‌ష్టాల‌తో ఫ్లాట్‌గా ట్రేడ‌వుతున్నాయి. అమెరికా-ఇరాన్‌ల మ‌ధ్య యుద్ధం కొన‌సాగుతుందా, శాంతి ఒప్పందానికి క‌ట్టుబ‌డి ఉంటారా అనే విష‌యంపై పెట్టుబ‌డిదారుల్లో సందిగ్ధ‌త నెల‌కొంది. నిఫ్టీ 50 సూచీ 40 పాయింట్లు త‌గ్గి 24,000 వ‌ద్ద ట్రేడ‌వుతుండ‌గా, సెన్సెక్స్ 240 పాయింట్లు ప‌డిపోయి 76,850 వ‌ద్ద కొన‌సాగుతోంది.

పెరిగిన చ‌మురు ధ‌ర‌లు..

అంత‌ర్జాతీయ మార్కెట్ల‌లో క్రూడ్ ఆయిల్ ధ‌ర‌లు మ‌ళ్లీ పెరిగాయి. చ‌మురు స‌ర‌ఫ‌రాకు అత్యంత కీల‌కంగా ఉన్న హోర్ముజ్ జ‌ల‌సంధి ద్వారా నౌక‌ల రాక‌పోక‌లు య‌థావిధిగా కొన‌సాగుతున్న‌ప్ప‌టికీ యుద్ధ ఉద్రిక్త‌త‌లు మొద‌ల‌వ్వ‌డంతో మ‌ళ్లీ చ‌మురు స‌ర‌ఫ‌రాకు ఆటంకం ఏర్ప‌డుతుంద‌నే ఆందోళ‌న నెల‌కొంది. దీంతో చ‌మురు ధ‌ర‌లు మ‌ళ్లీ పెరిగాయి. బ్రెంట్ క్రూడ్ ధ‌ర 0.21 శాతం పెరిగి బ్యారెల్‌కు 73 డాల‌ర్ల వ‌ద్ద ఉండ‌గా, డ‌బ్ల్యూటీఐ క్రూడ్ ధ‌ర 0.26 శాతం పెరిగి బ్యారెల్‌కు 69 డాల‌ర్ల వ‌ద్ద నిలిచింది. ఫారెక్స్ మార్కెట్లో రూపాయి విలువ కాస్త బ‌ల‌ప‌డింది. అమెరికా డాల‌ర్‌తో పోలిస్తే రూపాయి 0.06 శాతం పెరిగి 94.33 వ‌ద్ద ఉంది.