Stock Markets | క్లోజింగ్ వేలం ఎఫెక్ట్.. నిఫ్టీకి భారీ షాక్, ఐటీ షేర్లపై ఒత్తిడి..

Stock Markets | భారత స్టాక్ మార్కెట్ సూచీలు మంగళవారం జాగ్రత్త ధోరణితో ట్రేడింగ్‌ను ప్రారంభించాయి. ఫ్యూచర్స్ అండ్ ఆప్షన్స్ (ఎఫ్ అండ్ ఓ) షేర్లకు కొత్తగా అమలు చేసిన క్లోజింగ్ ఆక్షన్ సెషన్ (సీఏఎస్) తర్వాత తొలి పూర్తి ట్రేడింగ్ సెషన్ కావడంతో పెట్టుబడిదారులు పరిస్థితిని అంచనా వేస్తున్నారు. ఉదయం సుమారు 9:25 గంటల సమయంలో ఎన్‌ఎస్‌ఈ నిఫ్టీ 161 పాయింట్లు (0.65 శాతం) నష్టంతో 24,613 వద్ద ట్రేడవుతోంది. సోమవారం జరిగిన క్లోజింగ్ వేలం అనంతరం నగదు మార్కెట్, డెరివేటివ్స్ ధరల మధ్య ఏర్పడిన వ్యత్యాసాన్ని సర్దుబాటు చేసే ప్రక్రియ కొనసాగుతున్నట్లు మార్కెట్ వర్గాలు భావిస్తున్నాయి. అయితే సెన్సెక్స్ మాత్రం ప్రారంభ ట్రేడింగ్‌లో 173 పాయింట్లు లాభపడి 78,813 వద్ద కొనసాగింది. సోమవారం సాధారణ ట్రేడింగ్ ముగిసిన మధ్యాహ్నం 3:15 గంటల ధరతో పోలిస్తే, కొత్త క్లోజింగ్ ఆక్షన్ విధానంలో తుది ముగింపు ధర 200 పాయింట్లకు పైగా పెరిగి నమోదైంది. దీనిపై రాత్రి ఆలస్యంగా ఎన్‌ఎస్‌ఈ వివరణ ఇచ్చింది.

క్లోజింగ్ ఆక్ష‌న్ ఎఫెక్ట్‌..

డెరివేటివ్స్‌కు అనుసంధానమైన షేర్లలో కొత్త క్లోజింగ్ ఆక్షన్ విధానం అమల్లోకి రావడం వల్ల ఈ వ్యత్యాసం ఏర్పడిందని, వేలంలో నిర్ణయించిన తుది క్లోజింగ్ ధరనే సెటిల్‌మెంట్‌కు ఉపయోగిస్తామని తెలిపింది. కొత్త క్లోజింగ్ ఆక్షన్ సెషన్ అమలైన తర్వాత నేటి నిఫ్టీ ప్రారంభాన్ని మార్కెట్ సెంటిమెంట్ మార్పుగా కాకుండా సర్దుబాటు దశగా విశ్లేషకులు అభిప్రాయపడుతున్నారు. సోమవారం తొలిసారి కొత్త సెటిల్‌మెంట్ విధానంలో ట్రేడింగ్ పూర్తికావడంతో ట్రేడర్లు తమ పొజిషన్లను తిరిగి సమతుల్యం చేసుకుంటున్నారు. మధ్యాహ్నం 3:15 గంటల ట్రేడింగ్ ధరకు, వేలంలో నిర్ణయించిన తుది సెటిల్‌మెంట్ ధరకు మధ్య వచ్చిన తేడా కారణంగా ఇండెక్స్ స్థాయిలు, డెరివేటివ్స్ ధరల్లో ఏర్పడిన వ్యత్యాసం ఇప్పుడు నగదు మార్కెట్‌లో క్రమంగా సర్దుబాటు అవుతోంది. రంగాల వారీగా చూస్తే మార్కెట్ మిశ్రమ ధోరణిని ప్రదర్శించింది. నిఫ్టీ ఐటీ సూచీ ఒక శాతానికి పైగా పడిపోవడంతో అత్యధిక నష్టాలను చవిచూసింది. రియాల్టీ, ఎఫ్‌ఎంసీజీ, ఆటో, ఫార్మా, ఆయిల్ అండ్ గ్యాస్, ప్రైవేట్ బ్యాంకింగ్ రంగాల షేర్లు కూడా నష్టాల్లో ట్రేడయ్యాయి.

సానుకూలంగానే ప‌రిణామాలు..

మరోవైపు నిఫ్టీ మెటల్ సూచీ సుమారు 0.5 శాతం లాభపడింది. టాటా స్టీల్, హిండాల్కోతో పాటు ఇతర మెటల్ కంపెనీల్లో కొనుగోళ్లు పెరగడం ఇందుకు కారణమైంది. కొన్ని స్మాల్‌క్యాప్, మైక్రోక్యాప్ సూచీలు కూడా లాభాల్లో ట్రేడవడం వల్ల విస్తృత మార్కెట్‌ల‌లో కొనుగోలు ఆసక్తి కొనసాగుతున్నట్లు కనిపించింది. సెన్సెక్స్‌లో ఏషియన్ పెయింట్స్, టాటా స్టీల్, కోటక్ మహీంద్రా బ్యాంక్, అదానీ పోర్ట్స్, ట్రెంట్, బజాజ్ ఫైనాన్స్, మహీంద్రా అండ్ మహీంద్రా షేర్లు ప్రధాన లాభదారులుగా నిలిచాయి. మరోవైపు ఇన్ఫోసిస్, టీసీఎస్, హెచ్‌డీఎఫ్‌సీ బ్యాంక్, మారుతి సుజుకి, టైటాన్, హిందుస్తాన్ యూనిలీవర్ షేర్లు ఒత్తిడిని ఎదుర్కొన్నాయి. ప్రపంచ మార్కెట్ల నుంచి వచ్చిన సంకేతాలు మాత్రం సానుకూలంగానే ఉన్నాయి. పశ్చిమ ఆసియాలో ఉద్రిక్తతలు తగ్గుముఖం పట్టే సూచనలు కనిపించడం పెట్టుబడిదారుల విశ్వాసాన్ని పెంచింది. అమెరికా అధ్యక్షుడు డొనాల్డ్ ట్రంప్ ఇరాన్‌తో చర్చలు కొనసాగుతున్నాయని, ప్రస్తుతం జరుగుతున్న చర్చలు ఒప్పందానికి చివరి అవకాశం అని వ్యాఖ్యానించడం మార్కెట్లకు ఊరటనిచ్చింది.

మిశ్ర‌మంగా ఆసియా మార్కెట్లు..

గత వారం భారీగా పడిపోయిన తర్వాత ముడి చమురు ధరలు బ్యారెల్‌కు సుమారు 80 డాలర్ల వద్ద స్థిరపడ్డాయి. దిగుమతులపై ఆధారపడే భారత్ వంటి దేశాలకు ఇది ద్రవ్యోల్బణ ఆందోళనలను కొంత మేర తగ్గించే అంశంగా విశ్లేష‌కులు చెబుతున్నారు. ఆసియా మార్కెట్లు మాత్రం మిశ్రమంగా ట్రేడయ్యాయి. జపాన్ నిక్కీ సూచీ అర శాతానికి పైగా పడిపోగా, ఇటీవల ర్యాలీ అనంతరం లాభాల స్వీకరణ కారణంగా దక్షిణ కొరియా కోస్పీ సూచీ ఒక శాతానికి పైగా నష్టపోయింది. ఈ వారం చివర్లో రిజర్వ్ బ్యాంక్ ఆఫ్ ఇండియా ద్రవ్య విధాన కమిటీ సమావేశ నిర్ణయంపై పెట్టుబడిదారులు దృష్టి సారించారు. వడ్డీ రేట్లు, ద్రవ్యోల్బణం, ఆర్థిక వృద్ధిపై ఆర్బీఐ నుంచి వచ్చే సంకేతాలు మార్కెట్ దిశను ప్రభావితం చేసే అవకాశం ఉంది. ఇక ఫారెక్స్ మార్కెట్‌లో మంగ‌ళ‌వారం సెష‌న్‌లోనూ భార‌త రూపాయి కాస్త బ‌ల‌ప‌డింది. అమెరికా డాల‌ర్‌తో పోలిస్తే 95.29 వ‌ద్ద ఉన్న రూపాయి సెష‌న్‌లో 0.04 శాతం లాభ‌ప‌డింది.