Stock Markets | స్టాక్ మార్కెట్ల లాభాల‌కు బ్రేక్‌.. భారీగా ప‌త‌న‌మైన సూచీలు..

Stock Markets | దేశీయ స్టాక్ మార్కెట్లు మంగళవారం నష్టాల్లో ముగిశాయి. గ్లోబల్ మార్కెట్లలో బలహీన సంకేతాలు, ముడి చమురు ధరల పెరుగుదల కారణంగా ఇన్వెస్టర్లు ప్రాఫిట్ బుకింగ్‌కు దిగడంతో వరుసగా రెండు రోజుల లాభాలకు బ్రేక్ పడింది. బీఎస్‌ఈ సెన్సెక్స్ 479 పాయింట్లు (0.63 శాతం) పడిపోయి 76,009.70 వద్ద ముగిసింది. ఇక ఎన్‌ఎస్‌ఈ నిఫ్టీ 50 ఇండెక్స్ 118 పాయింట్లు (0.49 శాతం) తగ్గి 23,913.70 వద్ద స్థిరపడింది. మిడ్‌క్యాప్, స్మాల్‌క్యాప్ సూచీలు మాత్రం మెరుగైన ప్రదర్శన చేశాయి. బీఎస్‌ఈ 150 మిడ్‌క్యాప్ ఇండెక్స్ 0.33 శాతం పెరగగా, బీఎస్‌ఈ 250 స్మాల్‌క్యాప్ ఇండెక్స్ 0.21 శాతం లాభపడింది. మిడ్‌క్యాప్, స్మాల్‌క్యాప్ సెగ్మెంట్లలో వచ్చిన లాభాలతో బీఎస్‌ఈలో లిస్టెడ్ కంపెనీల మొత్తం మార్కెట్ క్యాపిటలైజేషన్ దాదాపు స్థిరంగానే నిలిచింది. మొత్తం మార్కెట్ క్యాప్ రూ.469 లక్షల కోట్ల వద్ద కొనసాగింది. గత సెషన్‌లో ఇది రూ.468.7 లక్షల కోట్లుగా నమోదైంది.

భారీగా పెరిగిన చ‌మురు ధ‌ర‌లు..

నిఫ్టీ 50లో మొత్తం 32 షేర్లు నష్టాల్లో ముగిశాయి. ఇందులో అపోలో హాస్పిటల్స్ ఎంటర్‌ప్రైజ్, విప్రో, భారతి ఎయిర్‌టెల్, ట్రెంట్, టీసీఎస్, టైటాన్ కంపెనీ షేర్లు ఎక్కువగా పడిపోయాయి. మరోవైపు అదానీ ఎంటర్‌ప్రైజెస్, టాటా మోటార్స్ ప్యాసింజర్ వెహికల్స్, టెక్ మహీంద్రా, ఎటర్నల్ షేర్లు లాభాల్లో నిలిచాయి. సెక్టోరల్ ఇండెక్స్‌లలో ఎక్కువ భాగం నష్టాల్లో ముగిశాయి. నిఫ్టీ కన్స్యూమర్ డ్యూరబుల్స్ ఇండెక్స్ 1 శాతానికి పైగా పడిపోయింది. బ్యాంక్ నిఫ్టీ 0.36 శాతం తగ్గగా, ప్రైవేట్ బ్యాంక్ ఇండెక్స్ 0.62 శాతం, పీఎస్‌యూ బ్యాంక్ ఇండెక్స్ 0.46 శాతం నష్టపోయాయి. నిఫ్టీ ఫైనాన్షియల్ సర్వీసెస్ ఇండెక్స్ 0.65 శాతం క్షీణించింది. అయితే నిఫ్టీ మెటల్ ఇండెక్స్ మాత్రం ట్రెండ్‌కు విరుద్ధంగా 1.10 శాతం పెరిగింది. ఇక భారత రూపాయి కూడా బలహీనపడింది. డాలర్‌తో పోలిస్తే రూపాయి విలువ‌ 47 పైసలు పడిపోయి 95.73 వద్ద ముగిసింది. బ్రెంట్ క్రూడ్ ధరలు 3 శాతానికి పైగా ఎగిసి బ్యారెల్‌కు 99 డాలర్లకు పైగా ట్రేడ్ కావడం మార్కెట్లపై ఒత్తిడి పెంచింది.

అప్ర‌మ‌త్త‌త అవ‌స‌రం..

అమెరికా-ఇరాన్ ల మ‌ధ్య యుద్ధం ముగిసే సూచ‌న‌లు క‌నిపించ‌క‌పోవ‌డం, శాంతి చ‌ర్చ‌ల‌పై నెల‌కొన్న సందిగ్ధ‌త‌ల‌తో పెట్టుబ‌డిదారులు ఎంతో జాగ్ర‌త్త‌గా వ్య‌వ‌హ‌రిస్తున్నారు. అయితే ఇలాంటి స‌మ‌యంలో అప్ర‌మ‌త్తంగా ఉండాల‌ని నిపుణులు సూచిస్తున్నారు. న‌ష్టాలు భారీగా రాకుండా చూసుకోవాల‌ని, దీర్ఘ‌కాలంలో మార్కెట్లు బుల్ ర్యాలీని కొన‌సాగించే అవ‌కాశాలు ఉన్న‌ప్ప‌టికీ, పెట్టుబ‌డిదారులు ఎప్ప‌టిక‌ప్పుడు మార్కెట్ ప‌రిస్థితుల‌కు అనుగుణంగా న‌డుచుకోవాల‌ని వారు సూచిస్తున్నారు.