Airport Privatisation | మ‌రో 11 విమానాశ్రయాల ప్రైవేటీకరణ.. దుబాయ్, సింగపూర్‌లో రోడ్‌షోలు..

Airport Privatisation | దేశంలోని 11 విమానాశ్రయాల ప్రైవేటీకరణ ప్రక్రియలో భాగంగా అంతర్జాతీయ పెట్టుబడిదారులను ఆకర్షించేందుకు కేంద్ర ప్రభుత్వం కీలక చర్యలు చేపడుతోంది. ఇందులో భాగంగా దుబాయ్‌, సింగపూర్‌తోపాటు ముంబై వంటి ప్రధాన ఆర్థిక కేంద్రాల్లో ప్రచార రోడ్‌షోలు నిర్వహించేందుకు ప్రణాళికలు సిద్ధం చేస్తోంది. ఈ వ్యవహారంతో సంబంధం ఉన్న వ్యక్తులు వెల్లడించిన వివరాల ప్రకారం.. ప్రపంచవ్యాప్తంగా ఉన్న పెట్టుబడిదారులకు విమానాశ్రయాల నిర్వహణ ఒప్పందాల విధానాన్ని వివరించడంతోపాటు, వారి అభిప్రాయాలను సేకరించడమే ఈ కార్యక్రమాల ప్రధాన ఉద్దేశం. ఈ 11 విమానాశ్రయాల ప్రైవేటీకరణకు సంబంధించిన బిడ్డింగ్ ప్రక్రియను డిసెంబర్‌ నాటికి ప్రారంభించాలని ప్రభుత్వం లక్ష్యంగా పెట్టుకుంది. 2027 మార్చి 31తో ముగిసే ఆర్థిక సంవత్సరం చివరి నాటికి ఒప్పందాలను ఖరారు చేయాలని భావిస్తోంది. ఈసారి తొలిసారిగా భారత విమానాశ్రయాల ప్రాధికార సంస్థ (ఏఏఐ) విమానాశ్రయాలను విడివిడిగా కాకుండా ఐదు గ్రూపులుగా విభజించి ప్రైవేటు సంస్థలకు అప్పగించనుంది. చిన్న విమానాశ్రయాలను పెద్ద విమానాశ్రయాలతో జతచేసి 50 ఏళ్ల లీజు ఒప్పందాల కింద నిర్వహణకు అప్పగించనున్నారు.

గ్రూపులుగా విభ‌జించి అప్ప‌గింత‌..

ఇప్పటివరకు విమానాశ్రయాలను ఒక్కొక్కటిగా ప్రైవేటు సంస్థలకు అప్పగించే విధానం ఉండగా, ఈసారి గ్రూపులుగా అందించడం కొత్త విధానమని సంబంధిత వర్గాలు వెల్లడించాయి. ఈ విధానంపై బిడ్డింగ్‌లో పాల్గొనాలనుకునే సంస్థలకు అవగాహన కల్పించేందుకు ప్రపంచవ్యాప్తంగా రోడ్‌షోలు నిర్వహించనున్నట్లు ఓ అధికారి తెలిపారు. ఈ కార్యక్రమాల ద్వారా పెట్టుబడిదారుల సందేహాలను నివృత్తి చేసి, వారి అభిప్రాయాలను తెలుసుకోవడంతోపాటు బిడ్డింగ్‌లో మరిన్ని సంస్థలు పాల్గొనేలా ప్రోత్సహించవచ్చని పేర్కొన్నారు. ఈ ప్రణాళికలో భాగంగా దుబాయ్‌, సింగపూర్‌తోపాటు ముంబైలోనూ రోడ్‌షోలు నిర్వహించనున్నారు. అంతర్జాతీయ పెట్టుబడిదారులతోపాటు భారతీయ సంస్థలను కూడా ఆకర్షించడంపై ప్రభుత్వం దృష్టి సారించింది. ప్రస్తుతం విమానాశ్రయాల నిర్వహణ రంగంలో ఉన్న జీఎంఆర్‌ గ్రూప్‌, అదానీ గ్రూప్‌ వంటి సంస్థలతోపాటు కొత్త పెట్టుబడిదారులు కూడా ఈ బిడ్డింగ్‌లో పాల్గొంటారని ప్రభుత్వం ఆశిస్తోంది.

వేటిని వేటితో క‌లుపుతారు..

విమానాశ్రయాల గ్రూపుల విభజనలో భాగంగా వారణాసి విమానాశ్రయాన్ని గయా, కుశీనగర్‌ విమానాశ్రయాలతో కలపనున్నారు. అమృత్‌సర్‌ విమానాశ్రయాన్ని కాంగ్రాతో, భువనేశ్వర్‌ విమానాశ్రయాన్ని హుబ్బళ్లితో, రాయ్‌పూర్‌ విమానాశ్రయాన్ని ఔరంగాబాద్‌తో, తిరుచిరాపల్లి విమానాశ్రయాన్ని తిరుపతి విమానాశ్రయంతో జతచేయనున్నారు. ఈ విధంగా పెద్ద విమానాశ్రయాలతోపాటు చిన్న విమానాశ్రయాలనూ ఒకే గ్రూపులో చేర్చడం ద్వారా వాటి నిర్వహణకు పెట్టుబడులు సమకూర్చడమే లక్ష్యంగా పెట్టుకున్నారు. పశ్చిమాసియాలోని సార్వభౌమ సంపద నిధులు (సావరిన్‌ వెల్త్‌ ఫండ్స్‌) కూడా ఈ రంగంలో పెట్టుబడులు పెట్టేందుకు ఆసక్తి చూపుతున్నట్లు సంబంధిత వర్గాలు తెలిపాయి. భారతీయ కార్పొరేట్‌ సంస్థల్లో జేఎస్‌డబ్ల్యూ గ్రూప్‌ కూడా విమానాశ్రయాలను కొనుగోలు చేసేందుకు ఆసక్తి కనబరుస్తున్నట్లు సమాచారం. అయితే, ఈ పరిణామాలపై మీడియా పంపిన ప్రశ్నలకు భారత విమానాశ్రయాల ప్రాధికార సంస్థ స్పందించలేదు.

గుత్తాధిప‌త్యానికి చెక్‌..?

మరోవైపు, విమానయాన రంగంలో కొద్దిమంది సంస్థల ఆధిపత్యం పెరగకుండా ప్రభుత్వం జాగ్రత్తలు తీసుకుంటోంది. ఒకే సంస్థ ఎక్కువ సంఖ్యలో విమానాశ్రయాలను సొంతం చేసుకోవడం వల్ల మార్కెట్‌ గుత్తాధిపత్యం ఏర్పడే ప్రమాదం ఉందన్న ఆందోళనల నేపథ్యంలో, ఈసారి ఒక్కో సంస్థ ఎన్ని విమానాశ్రయాల కోసం బిడ్డింగ్‌లో పాల్గొనవచ్చనే దానిపై పరిమితి విధించనుంది. పోటీని ప్రోత్సహించడం, పెట్టుబడిదారుల భాగస్వామ్యాన్ని పెంచడం, విమానయాన రంగంలో మార్కెట్‌ సమతుల్యతను కాపాడడం ఈ నిర్ణయం వెనుక ప్రధాన లక్ష్యాలుగా కనిపిస్తున్నాయి.