India | భారత్‌ నుంచి సింగపూర్‌కు 3,000 కి.మీ. విద్యుత్‌ కారిడార్‌..

India | భారత్‌, సింగపూర్‌ మధ్య విద్యుత్‌ సరఫరా కోసం సుమారు 3వేల కిలోమీటర్ల పొడవైన అంతర్జాతీయ విద్యుత్‌ ప్రసార మార్గాన్ని ఏర్పాటు చేసే ప్రతిపాదన పరిశీలనలో ఉంది. ఈ మార్గం ఈశాన్య భారతదేశంలోని ఇంఫాల్‌ నుంచి మయన్మార్‌, థాయ్‌లాండ్‌, మలేషియా మీదుగా సింగపూర్‌ను అనుసంధానించే అవకాశం ఉంది. అయితే, ఇది ఇంకా పరిశీలన దశలో ఉన్న ప్రతిపాదన మాత్రమే.

ఈ ప్రాజెక్టు ద్వారా భారత్‌, సింగపూర్‌ మధ్య 2వేల మెగావాట్ల సామర్థ్యంతో సరిహద్దులు దాటి విద్యుత్‌ సరఫరా చేసేందుకు అవకాశం కల్పించాలనేది లక్ష్యం. ఫిలిప్పీన్స్‌లోని మనీలాలో జరిగిన 20వ తూర్పు ఆసియా సదస్సు ఇంధన మంత్రుల సమావేశంలో భారత విద్యుత్‌, పునరుత్పాదక ఇంధన శాఖ సహాయ మంత్రి శ్రీపాద్‌ యెస్సో నాయక్‌ ఈ ప్రతిపాదనకు సంబంధించిన వివరాలను వెల్లడించారు.

ఈ విద్యుత్‌ కారిడార్‌ అందుబాటులోకి వస్తే ప్రాంతీయ విద్యుత్‌ వాణిజ్యానికి ఊతం లభించడంతోపాటు, పునరుత్పాదక ఇంధన వినియోగం పెరిగేందుకు అవకాశం ఉంటుందని భావిస్తున్నారు. అలాగే ఆసియా దేశాల మధ్య ఇంధన భద్రతను బలోపేతం చేయడంలో ఈ అనుసంధానం కీలక పాత్ర పోషిస్తుంది. అయితే, ప్రాజెక్టు సాధ్యాసాధ్యాలు, అమలు ప్రణాళిక, నిర్మాణ వ్యయం, కాలపరిమితిపై స్పష్టత రావాల్సి ఉంది.