Income Tax Department | మీ సేవింగ్స్ అకౌంట్‌పై ‘ఐటీ’ కన్ను.. ఈ 10 లావాదేవీలు చేస్తే నోటీసులు గ్యారెంటీ..

Income Tax Department | మీ సేవింగ్స్ బ్యాంక్ అకౌంట్ మీ నెలవారీ అవసరాలైన జీతం, బిల్లుల చెల్లింపులు, ఈఎంఐలు లేదా డబ్బులు పంపించడం, తీసుకోవడం వంటి రోజువారీ పనులకు ఉపయోగపడుతుంటుంది. ఇదంతా సాధారణంగానే అనిపిస్తుంది. కానీ ఆదాయపు పన్ను శాఖ (ఇన్‌కమ్ టాక్స్ డిపార్ట్‌మెంట్) ఇలాంటి రోజువారీ లావాదేవీలపై కూడా చాలా నిశితంగా నిఘా ఉంచుతుంది. అవును, కేవలం వ్యాపారవేత్తలు లేదా సంపన్న వ్యక్తుల లావాదేవీలు మాత్రమే కాకుండా, సాధారణ బ్యాంక్ ఖాతాదారుల లావాదేవీలు సైతం ఇన్‌కమ్ టాక్స్ డిపార్ట్‌మెంట్ డేటా మానిటరింగ్ సిస్టమ్ పరిధిలోకి వచ్చాయి. పన్ను ఎగవేతను అరికట్టడానికి, అధిక విలువ కలిగిన ఆర్థిక లావాదేవీలను ట్రాక్ చేయడానికి ఐటీ శాఖ స్టేట్‌మెంట్ ఆఫ్ ఫైనాన్షియల్ ట్రాన్సాక్షన్ (SFT) కోసం ఒక డేటా మానిటరింగ్ సిస్టమ్ రిపోర్టింగ్ విధానాన్ని ఉపయోగిస్తోంది. ఒక నిర్దిష్ట సంవత్సరంలో మీరు అసాధారణంగా నగదు డిపాజిట్లు చేసినా లేదా తరచుగా నగదు లావాదేవీలు నిర్వహించినా మీ ఖాతాను నిశిత పరిశీలనకు పంపిస్తారు.

రూ.10 ల‌క్ష‌ల క‌న్నా ఎక్కువ‌గా డిపాజిట్ చేస్తే..

ఆదాయపు పన్ను శాఖ గత కొన్ని సంవత్సరాలుగా తన డిజిటల్ డేటా అనలిటిక్స్ సిస్టమ్‌ను గణనీయంగా బలోపేతం చేసింది. బ్యాంకులు, మ్యూచువల్ ఫండ్ హౌస్‌లు, పోస్టాఫీసులు, రిజిస్ట్రీ విభాగాలు ఇప్పుడు ప్రతి సంవత్సరం స్పెసిఫైడ్ ఫైనాన్షియల్ ట్రాన్సాక్షన్స్ (SFT) నివేదికను సమర్పించాల్సి ఉంటుంది. పన్ను ఎగవేత లేదా అనామక లావాదేవీలను గుర్తించడంలో సహాయపడటానికి, ఈ నివేదికలో గణనీయమైన లేదా అసాధారణమైన కార్యకలాపాలు ఉన్న అన్ని ఖాతాల వివరాలను చేరుస్తారు. ఒక ఆర్థిక సంవత్సరంలో (ఏప్రిల్ 1 నుండి మార్చి 31 వరకు) మీరు మీ సేవింగ్స్ ఖాతాలలో ఒకటి లేదా అంతకంటే ఎక్కువ ఖాతాల్లో రూ.10 లక్షలు లేదా అంతకంటే ఎక్కువ నగదు డిపాజిట్ చేస్తే, బ్యాంక్ ఈ సమాచారాన్ని ఆదాయపు పన్ను శాఖకు నివేదించాల్సి ఉంటుంది. ఈ మొత్తాన్ని ఒకేసారి డిపాజిట్ చేసినా లేదా వేర్వేరు తేదీల్లో డిపాజిట్ చేసినా, అది పరిశీలన పరిధిలోకి వస్తుంది. ఉదాహరణకు, ఒక వ్యక్తి తన ఖాతాలో రూ.12 లక్షల నగదును డిపాజిట్ చేసి, ఈ ఆదాయాన్ని తన ఇన్‌కమ్ టాక్స్ రిటర్న్ (ITR)లో చూపించకపోతే, శాఖ నోటీసు జారీ చేస్తుంది.

భారీ మొత్తంలో క్రెడిట్ కార్డు బిల్లుల‌ను చెల్లిస్తుంటే..

మీరు మీ క్రెడిట్ కార్డ్ బిల్లులను నగదు రూపంలో లేదా పెద్ద బ్యాంక్ లావాదేవీల ద్వారా చెల్లిస్తుంటే, అది కూడా రిపోర్టబుల్ కేటగిరీ కిందకు వస్తుంది. మీ ఖర్చులకు అనుగుణంగా మీ డిక్లేర్డ్ ఆదాయం ఉందో లేదో డిపార్ట్‌మెంట్ చూస్తుంది. మీ వార్షిక ఆదాయం రూ.6 లక్షలు అనుకుందాం, కానీ మీరు ప్రతి నెలా 1 లక్ష రూపాయల కంటే ఎక్కువ క్రెడిట్ కార్డ్ బిల్లులను చెల్లిస్తుంటే, మీ అసలు ఆదాయం ఐటీఆర్‌లో చెప్పిన‌ దానికంటే ఎక్కువగా ఉందని డిపార్ట్‌మెంట్ భావిస్తుంది. దీంతో ఆ శాఖ మీకు నోటీసులు పంపిస్తుంది. చాలా మంది తరచూ వ్యాపార లేదా వివాహ వేడుకల కోసం బ్యాంక్ నుండి పెద్ద మొత్తంలో డబ్బును ఉపసంహరించుకుంటారు లేదా డిపాజిట్ చేస్తారు. ఇది చట్టబద్ధమైనదే అయినప్పటికీ, నగదు లావాదేవీలు పదేపదే, స్పష్టమైన కారణం లేకుండా జరిగితే, బ్యాంక్ దానిని అనుమానాస్పద కార్యకలాపంగా భావిస్తుంది. అటువంటి పరిస్థితుల్లో ఆదాయపు పన్ను అధికారులు ఆ డబ్బు ఎక్కడి నుండి వచ్చింది, ఎక్కడికి వెళ్లింది అనే మూలాధారాల గురించి విచారిస్తారు.

ఆస్తుల‌ను విక్ర‌యించినా, కొనుగోలు చేసినా..

మీరు రూ.30 లక్షలు లేదా అంతకంటే ఎక్కువ విలువైన ఆస్తి కొనుగోలు లేదా విక్రయ లావాదేవీని చేస్తే డిపార్ట్‌మెంట్ స్వయంచాలకంగా ఆ సమాచారాన్ని అందుకుంటుంది. మీ బ్యాంక్ ఖాతా అకస్మాత్తుగా యాక్టివ్‌గా మారి, పెద్ద మొత్తంలో డబ్బు బదిలీ చోటు చేసుకున్నా లేదా ఖాతాలోకి వచ్చినా, ఆ మొత్తం ఆస్తి లావాదేవీకి సంబంధించినదా కాదా అని అధికారులు దర్యాప్తు చేస్తారు. ఇటీవల నగదు రూపంలో జరిగిన ఆస్తి లావాదేవీలను పన్ను అధికారులకు నివేదించని పలు కేసులను డిపార్ట్‌మెంట్ గుర్తించినట్లు వివిధ నివేదికలు చెబుతున్నాయి. మీరు విదేశీ ప్రయాణాలు, విదేశీ విద్య లేదా ఫారెక్స్ కార్డ్‌ల కోసం రూ.10 లక్షల కన్నా ఎక్కువ ఖర్చు చేస్తే ఇది కూడా డిపార్ట్‌మెంట్ రిపోర్టింగ్ పరిమితిలోకి వస్తుంది. విదేశీ మారకద్రవ్యం మూలం చట్టబద్ధమైనదేనా అని నిర్ధారించడమే దీని ముఖ్య ఉద్దేశం. కొన్నిసార్లు ప్రజలు పాత ఖాతాను ఉపయోగించరు, కానీ అకస్మాత్తుగా అందులో పెద్ద మొత్తం డిపాజిట్ అవుతుంది లేదా బదిలీ జ‌రుగుతుంది. అటువంటి పరిస్థితిలో బ్యాంక్ ఈ లావాదేవీని అనుమానాస్పదంగా పరిగణించి డిపార్ట్‌మెంట్‌కు నివేదిస్తుంది. ప్రత్యేకించి ఆ ఖాతాలో అంతకుముందు క్రమబద్ధమైన కార్యకలాపాలు లేనప్పుడు ఇలా జరుగుతుంది.

మ్యూచువ‌ల్ ఫండ్స్ విష‌యంలో..

మ్యూచువల్ ఫండ్స్ నుండి వచ్చే వడ్డీ లేదా డివిడెండ్‌లు మీ బ్యాంక్ ఖాతాకు జమ అవుతూ వాటిని మీరు మీ ఐటీఆర్‌లో నివేదించకపోతే, ఇది ఐటీ డిపార్ట్‌మెంట్ రికార్డులలో వ్యత్యాసాలను సృష్టిస్తుంది. డిపార్ట్‌మెంట్ మీ బ్యాంక్ ఎంట్రీలు, రిటర్న్‌లు రెండింటినీ సరిపోల్చే ఆటోమేటిక్ మ్యాచింగ్ సిస్టమ్ ద్వారా ఈ డేటాను మ్యాచ్ చేస్తుంది. చాలా మంది సౌలభ్యం కోసం మూడు లేదా నాలుగు బ్యాంక్ ఖాతాలను నిర్వహిస్తుంటారు. ఒకటి జీతం కోసం, ఒకటి ఇంటి ఖర్చుల కోసం, ఒకటి పెట్టుబడుల కోసం. అయితే, చాలా సార్లు, వారు ఈ ఖాతాల నుండి వచ్చే వడ్డీ లేదా లావాదేవీలను తమ ఐటీఆర్‌లో చేర్చరు. ఇప్పుడు ఈ డేటా పాన్ (PAN), ఆధార్ (Aadhaar) లింకింగ్ ద్వారా డిపార్ట్‌మెంట్‌కు సులభంగా చేరుకుంటుంది. మీ ఖాతాలో పెద్ద మొత్తంలో డబ్బు డిపాజిట్ అయి, దానికి సంబంధించిన మూలం స్పష్టంగా లేనట్లయితే, అంటే స్నేహితుడి నుండి అప్పు తీసుకున్నాను, ఇంటి పొదుపు లేదా బహుమతి అని చెబితే అది పన్ను శాఖకు అనుమానాలను కలిగిస్తుంది. అటువంటి కేసులలో, ఎటువంటి పత్రాలు లేదా ఆధారాలు లేకపోతే, దాన్ని లెక్క‌లోకి రాని ఆదాయంగా పరిగణిస్తారు.

ఐటీ శాఖ ట్రాకింగ్ ఇలా..

మీ ఖాతాను థర్డ్ పార్టీ ఉపయోగిస్తే, అంటే మీ ఖాతా నుండి ఎవరైనా చెల్లింపులు చేసినా లేదా వేరొకరి పేరుతో డబ్బు అందుకున్నా, ఇది కూడా రిస్క్ కేటగిరీ కిందకు వస్తుంది. డిపార్ట్‌మెంట్ దీనిని మనీ లాండరింగ్ లేదా బినామీ లావాదేవీగా పరిగణించే అవకాశం ఉంటుంది. దాదాపు అన్ని బ్యాంకులు, ఆర్థిక సంస్థలు ఇప్పుడు ప్రతి సంవత్సరం ఆదాయపు పన్ను శాఖకు ఎస్‌ఎఫ్‌టీ (SFT) నివేదికను సమర్పించాల్సి ఉంటుంది. ఈ నివేదికలో రూ.10 లక్షల క‌న్నా ఎక్కువ విలువ క‌లిగిన నగదు లావాదేవీలు, ప్రధాన పెట్టుబడులు, రియల్ ఎస్టేట్ ఒప్పందాలు, క్రెడిట్ కార్డ్ ఖర్చుల సమాచారం ఉంటుంది. ఆదాయపు పన్ను శాఖ ఈ డేటాను పాన్ నంబర్లు, ఆధార్ నంబర్లతో లింక్ చేస్తుంది, తద్వారా దీనికి ఎవరు బాధ్యులో సులభంగా గుర్తిస్తుంది. అందువ‌ల్ల ఆదాయ‌పు ప‌న్ను శాఖ నుంచి నోటీసులు రాకుండా ఉండాలంటే ఆయా విష‌యాల్లో పౌరులు జాగ్ర‌త్త‌గా వ్య‌వ‌హ‌రించాల్సి ఉంటుంది.