ITR Filing | ఐటీఆర్ ఫైలింగ్ చేస్తున్నారా.. అయితే ఈ త‌ప్పుల‌ను చేయ‌కండి..

ITR Filing | ఇంకమ్ ట్యాక్స్ రిటర్న్స్ (ఐటీఆర్) ఫైలింగ్ ప్ర‌స్తుతం ఆన్‌లైన్ లేదా ఆఫ్‌లైన్ విధానాల ద్వారా సులభంగా అందుబాటులోకి వచ్చినప్పటికీ, పన్ను చెల్లింపుదారులు ఇంకా కొన్ని సాధారణ తప్పిదాలు చేస్తున్నారు. తప్పు ఫామ్ ఎంపిక నుండి పూర్తి ఆదాయం వెల్లడించకపోవడం వరకు అనేక పొరపాట్లు ఐటీఆర్ ప్రాసెసింగ్‌ను ప్రభావితం చేస్తాయి. అందుకే రిటర్న్స్ సమర్పించే ముందు ఈ కీలక అంశాలను తప్పనిసరిగా పరిశీలించాల్సి ఉంటుంది. ఫైనాన్షియల్ ఇయర్ 2025-26 (అసెస్‌మెంట్ ఇయర్ 2026-27) కోసం వ్యక్తిగత పన్ను చెల్లింపుదారుల ఐటీఆర్ ఫైలింగ్ చివరి తేదీ జూలై 31, 2026 కాగా ఐటీఆర్-3, ఐటీఆర్-4 ఫామ్‌లను ఉపయోగించే వారికి ఆగస్టు 31, 2026 వరకు గడువు ఉంది.

ఏయే ఫైలింగ్‌కు ఏ ఫామ్‌..

సరైన ఐటీఆర్ ఫామ్‌ ఎంపిక అత్యంత ముఖ్యం. ఫామ్‌ను తప్పుగా ఎంపిక చేస్తే ఆదాయ‌పు ప‌న్ను విభాగం నుంచి సరిదిద్దే నోటీసు వచ్చే అవకాశం ఉంటుంది. ఐటీఆర్-1 ఉప‌యోగించి ఒక హౌస్ ప్రాపర్టీతోపాటు జీతం, ఇతర ఆదాయాలు ఉన్న వారు రిట‌ర్న్స్ స‌మర్పించాలి. ఇక బిజినెస్ ఆదాయం లేని వ్యక్తులు లేదా హిందూ అన్‌డివైడెడ్ ఫ్యామిలీ (హెచ్‌యూఎఫ్) కోసం ఐటీఆర్-2 ను ఉప‌యోగించాలి. బిజినెస్ లేదా ప్రొఫెషన‌ల్‌ ఆదాయం ఉన్న వారు ఐటీఆర్-3ని వాడాలి. ప్రిజంప్టివ్ ఆదాయం ఉన్న వారికి ఐటీఆర్-4 వ‌ర్తిస్తుంది.

ఈ-వెరిఫై త‌ప్ప‌నిస‌రి..

ఐటీఆర్ ఫైలింగ్ సమయంలో ఈ సాధారణ తప్పిదాలను తప్పక నివారించాలి. సరైన ఫాం ఉపయోగించడం చాలా ముఖ్యం. తప్పు ఫాం వాడితే రిటర్న్ తిరస్కరణకు దారి తీస్తుంది. ఐటీఆర్ ఫైల్ చేసిన తరువాత దానిని ఈ-వెరిఫై చేయకపోతే అది సమర్పించనట్టే. నెట్ బ్యాంకింగ్, ఆధార్, లేదా ఈవీసీ ద్వారా 30 రోజుల్లోపు వెరిఫికేషన్ చేయాలి. అసెస్‌మెంట్ ఇయర్, పేరు, అడ్రస్, ఈ-మెయిల్, పాన్ నంబర్, ఫోన్ నంబర్, పుట్టిన తేదీ వంటి వివరాలను క‌చ్చితంగా నమోదు చేయాలి. తప్పు అసెస్‌మెంట్ ఇయర్ వల్ల డబుల్ ట్యాక్సేషన్ ప్రమాదం ఉంటుంది. తేదీ ఫార్మాట్ (DD/MM/YYYY) కూడా సరైనదిగా ఉండాలి. సరైన ట్యాక్స్ రీజీమ్ ఎంపిక చేయాలి. తప్పు రీజీమ్ వల్ల అవసరంలేని డిడక్షన్స్ కోల్పోతారు.

అన్ని ఆదాయాల‌ను తెలియ‌జేయాలి..

అన్ని ఆదాయ వనరులను వెల్లడించాలి. సేవింగ్స్ అకౌంట్ వడ్డీ, జీతం, అద్దె, క్యాపిటల్ గెయిన్స్, షార్ట్ టర్మ్ గెయిన్స్ వంటి అన్ని ఆదాయాలను పేర్కొనాలి. ఎక్సెంప్ట్ అయిన ఆదాయాన్ని కూడా చూపించి తరువాత మినహాయింపు క్లెయిమ్ చేయాలి. Form 26AS, యాన్యువల్ ఇన్ఫర్మేషన్ స్టేట్‌మెంట్ (ఏఐఎస్) వివరాలను సరిపోల్చాలి. టీడీఎస్, టీసీఎస్, అడ్వాన్స్ ట్యాక్స్ వంటి వివరాలు సరిపోలకపోతే రిఫండ్ ఆలస్యం అవుతుంది. ఒకే సంవత్సరంలో రెండు లేదా అంతకంటే ఎక్కువ ఉద్యోగాలు ఉంటే, అన్ని ఎంప్లాయర్ల నుంచి ఫామ్‌ 16 తీసుకుని ఆదాయం సరిగ్గా చూపాలి. అడ్వాన్స్ ట్యాక్స్ గడువులు పాటించాలి. జూన్ 15, సెప్టెంబర్ 15, డిసెంబర్ 15, మార్చి 15 తేదీల్లో చెల్లించాలి. ఆలస్యం అయితే 1 శాతం పెనాల్టీ విధిస్తారు. క్యాపిటల్ గెయిన్స్ పై మినహాయింపులు (సెక్షన్ 54, 54ఈసీ, 54ఎఫ్) క్లెయిమ్ చేయడం మర్చిపోవద్దు. ఆదాయ‌పు ప‌న్ను విభాగం నుంచి వచ్చే నోటీసులను నిర్లక్ష్యం చేయకూడదు. సమయానికి స్పందించకపోతే లీగల్ సమస్యలు తలెత్తే అవకాశం ఉంటుంది.

ఐటీఆర్ ఫైలింగ్‌లో చిన్న పొరపాట్లు కూడా పెద్ద సమస్యలకు దారి తీసే అవకాశముంటుంది. సరైన సమాచారం, సరైన ఫామ్‌, పూర్తి ఆదాయం వెల్లడించడం, సమయానికి వెరిఫికేషన్ వంటి అంశాలు పాటిస్తే రిటర్న్ ప్రాసెస్ సులభంగా పూర్తవుతుంది. సమగ్రంగా పరిశీలించి ఫైల్ చేయడం ద్వారా అనవసరమైన నోటీసులు, పెనాల్టీలను నివారించవచ్చు.