MSME | ఎంఎస్ఎంఈలకు గుడ్‌న్యూస్.. ఆలస్య చెల్లింపులపై కొత్త చట్టం, వివాదాలకు త్వరిత పరిష్కారం..

MSME | రాజ్యసభలో మైక్రో, స్మాల్ అండ్ మీడియం ఎంటర్‌ప్రైజెస్ డెవలప్‌మెంట్ (సవరణ) బిల్లు ఆమోదం పొందడంతో ఎంఎస్‌ఎంఈలకు సంబంధించిన ఆలస్య చెల్లింపులు, వివాదాల పరిష్కారం, చెల్లింపు వ్యవస్థలపై మరోసారి దృష్టి కేంద్రీకృతమైంది. ఈ సవరణల ద్వారా 2006లో అమల్లోకి వచ్చిన ఎంఎస్‌ఎంఈ డెవలప్‌మెంట్ చట్టంలో మార్పులు ప్రతిపాదించారు. బకాయిల చెల్లింపుల్లో జరుగుతున్న జాప్యాన్ని తగ్గించడం, ఎంఎస్‌ఎంఈ సరఫరాదారులు, కొనుగోలుదారుల మధ్య తలెత్తే వివాదాల పరిష్కార ప్రక్రియను మరింత సమర్థవంతంగా చేయడమే ఈ బిల్లు ప్రధాన లక్ష్యంగా రూపొందించారు. అయితే ఈ మార్పుల అసలు ప్రభావం అమలు తీరుపైనే ఆధారపడి ఉంటుంది. ముఖ్యంగా వివాదాల పరిష్కార వ్యవస్థ ఎంత సమర్థవంతంగా పనిచేస్తుందో, ప్రతిపాదించిన డిజిటల్ చెల్లింపు విధానాలను ఎంత విస్తృతంగా అమలు చేస్తారో అన్న అంశ‌మే కీలకం.

స‌మ‌స్య‌గా మారిన ఆల‌స్య‌పు చెల్లింపులు..

ఎంఎస్‌ఎంఈలకు ఆలస్యంగా చెల్లింపులు జరగడం చాలా కాలంగా ప్రధాన సమస్యగా ఉంది. దీనివల్ల నగదు ప్రవాహం, వర్కింగ్ క్యాపిటల్ నిర్వహణ తీవ్రంగా దెబ్బతింటోంది. ఈ సమస్యను పరిష్కరించేందుకు కొత్త సవరణల్లో ఆలస్య చెల్లింపులకు సంబంధించిన వివాదాల పరిష్కారానికి నిర్దిష్ట కాలపరిమితులను ప్రవేశపెట్టడంతోపాటు, బకాయిల వసూలు వ్యవస్థను మరింత బలోపేతం చేయాలని ప్రతిపాదించారు. మధ్యవర్తిత్వం ద్వారా కుదిరిన ఒప్పందాలు, ఆర్బిట్రేషన్ తీర్పుల ద్వారా నిర్ణయించిన బకాయిలను రాష్ట్ర ప్రభుత్వ అధికారుల ద్వారా భూ ఆదాయ బకాయిల మాదిరిగా వసూలు చేసే అవకాశం కూడా బిల్లులో కల్పించారు. ఈ నిబంధనలు ఎంఎస్‌ఎంఈలకు బకాయిల వసూలు ప్రక్రియలో కీలక మార్పు తీసుకువ‌చ్చే అవ‌కాశం ఉంద‌ని నిపుణులు అభిప్రాయపడుతున్నారు. అయితే వివాదాలు ఎంత వేగంగా పరిష్కారమవుతాయో, బకాయిలు ఎంత త్వరగా అందుతాయో అన్న విష‌యంపైనే వాటి విజయవంతమైన అమలు ఆధారపడి ఉంటుంద‌ని చెబుతున్నారు.

టీఆర్ఈడీఎస్ అంటే..

ఈ బిల్లు ప్రకారం కేంద్ర ప్రభుత్వ రంగ సంస్థలు ఎంఎస్‌ఎంఈల నుంచి కొనుగోలు చేసిన వస్తువులు, సేవలకు సంబంధించిన ఇన్‌వాయిస్‌ల చెల్లింపుల కోసం ట్రేడ్ రిసీవబుల్స్ డిస్కౌంటింగ్ సిస్టమ్ (టీఆర్‌ఈడీఎస్)ను తప్పనిసరిగా వినియోగించాలని ప్రతిపాదించారు. టీఆర్‌ఈడీఎస్ ద్వారా ఎంఎస్‌ఎంఈలు చెల్లింపులు అందని ఇన్‌వాయిస్‌ల ఆధారంగా భాగస్వామ్య ఆర్థిక సంస్థల నుంచి ముందస్తు నిధులు పొందే అవకాశం ఉంటుంది. ఈ చర్యతో అర్హత ఉన్న లావాదేవీలలో ఇన్‌వాయిస్ డిస్కౌంటింగ్ ప్లాట్‌ఫామ్‌ల వినియోగం పెరిగే అవకాశం ఉంది. అయితే కొనుగోలుదారులు, ఎంఎస్‌ఎంఈలు, ఆర్థిక సంస్థలు ఎంత మేరకు ఇందులో భాగస్వామ్యం అవుతాయన్న అంశంపైనే దీని ప్రభావం ఆధారపడి ఉంటుంది. చెల్లింపుల్లో జాప్యం ఎంఎస్‌ఎంఈల వర్కింగ్ క్యాపిటల్ నిర్వహణపై నేరుగా ప్రభావం చూపుతోంది. దీంతో నిల్వల నిర్వహణ, కొత్త ఉద్యోగుల నియామకం, వ్యాపార విస్తరణ, కొత్త ఆర్డర్ల స్వీకరణ వంటి కీలక నిర్ణయాలు కూడా ప్రభావితమవుతున్నాయి.

కొత్త ప‌రిమితుల‌తో ఊర‌ట‌..

ఇండియామార్ట్ ఇంటర్‌మెష్ చీఫ్ ఆపరేటింగ్ ఆఫీసర్ దినేష్ గులాటి మాట్లాడుతూ ఆలస్య చెల్లింపులు ఎంఎస్‌ఎంఈ రంగానికి పెద్ద సవాలుగా మారాయని తెలిపారు. మధ్యవర్తిత్వం, ఆర్బిట్రేషన్, డిజిటల్ చెల్లింపు వ్యవస్థలకు స్పష్టమైన కాలపరిమితులు రావడం వల్ల చెల్లింపు చక్రాలపై మరింత స్పష్టత ఏర్పడుతుందని చెప్పారు. అలాగే మెరుగైన చెల్లింపు రికార్డులు ఉండడం వల్ల సరఫరాదారులు కొత్త వ్యాపార అవకాశాలను స్వీకరించే ముందు కొనుగోలుదారుల చెల్లింపు చరిత్రను అంచనా వేసే అవకాశం కూడా పెరుగుతుందని ఆయన పేర్కొన్నారు. భారతీయ యువ శక్తి ట్రస్ట్ వ్యవస్థాపకురాలు, మేనేజింగ్ ట్రస్టీ లక్ష్మీ వెంకటరామన్ వెంకటేశన్ మాట్లాడుతూ వర్కింగ్ క్యాపిటల్‌ను సమర్థంగా నిర్వహించడానికి స్థిరమైన రుణ పరిస్థితులు, సకాలంలో చెల్లింపులు రెండూ ఎంఎస్‌ఎంఈలకు అత్యంత అవసరమని అన్నారు.

ఈ సవరణలు ఆలస్య చెల్లింపుల సమస్య పరిష్కారానికి ఒక బలమైన చట్టపరమైన వ్యవస్థను అందిస్తున్నప్పటికీ, వాటి విజయవంతమైన అమలు చట్ట అమలు సామర్థ్యం, ఎంఎస్‌ఎంఈలలో అవగాహన, కొనుగోలుదారుల నిబంధనల పాటింపుపైనే ఆధారపడి ఉంటుందని నిపుణులు అభిప్రాయపడుతున్నారు.