హైదరాబాద్‌లో సుప్రీంకోర్టు..!

• తెలంగాణ రాజధానిలో సుప్రీం కోర్టు శాశ్వత బెంచ్ ఏర్పాటు చేయండి
• రాజ్యసభలో బీఆర్ఎస్ కీలక డిమాండ్

Supreme Court Bench in Hyderabad | త్రినేత్ర.న్యూస్ : దేశంలో పేరుకుపోతున్న కేసుల పరిష్కారానికి సుప్రీం కోర్టులో న్యాయమూర్తుల సంఖ్యను పెంచడం ఎంత అవసరమో.. దక్షిణ భారత ప్రజలకు న్యాయాన్ని చేరువ చేసేందుకు హైదరాబాద్‌లో శాశ్వత ధర్మాసనాన్ని (Supreme Court Bench) ఏర్పాటు చేయడం అంతే ముఖ్యమని బీఆర్ఎస్ పార్లమెంటరీ పార్టీ నేత, ఎంపీ వద్దిరాజు రవిచంద్ర స్పష్టం చేశారు.

రాజ్యసభలో బుధవారం ప్రవేశపెట్టిన 'సుప్రీం కోర్టు (న్యాయమూర్తుల సంఖ్య) సవరణ బిల్లు - 2026'పై జరిగిన చర్చలో ఆయన పాల్గొని మాట్లాడారు. బీఆర్ఎస్ పార్టీ తరఫున ఈ బిల్లుకు సంపూర్ణ మద్దతు ప్రకటిస్తున్నట్లు వెల్లడించారు.

జడ్జిల పెంపు స్వాగతించదగ్గ పరిణామం

సుప్రీం కోర్టులో ప్రస్తుతం 92 వేలకు పైగా కేసులు పెండింగ్‌లో ఉన్నాయని, ఈ భారీ భారాన్ని తగ్గించాలంటే న్యాయమూర్తుల సంఖ్యను 33 నుంచి 37కు పెంచడం సరైన సమయాల్లో తీసుకున్న సరైన నిర్ణయమని ఎంపీ వద్దిరాజు వ్యాఖ్యానించారు. ఈ నిర్ణయం వల్ల మరిన్ని రాజ్యాంగ ధర్మాసనాలను (Constitutional Benches) ఏర్పాటు చేసి, కేసుల విచారణను వేగవంతం చేసే అవకాశం లభిస్తుందన్నారు.

ఢిల్లీకి రావాలంటే ఖర్చులతో కూడుకున్న పని

ఈ సందర్భంగా కేంద్ర ప్రభుత్వానికి ఒక చరిత్రాత్మక సూచన చేశారు బీఆర్ఎస్ ఎంపీ. స్వాతంత్య్రం వచ్చినప్పటి నుంచి ప్రతి చిన్న, పెద్ద కేసు కోసం దక్షిణాది రాష్ట్రాల ప్రజలు ఢిల్లీ వరకు రావాల్సి వస్తోందని ఆయన ఆందోళన వ్యక్తం చేశారు.

"సాధారణ రైతు, నిరుద్యోగి, ఉద్యోగి లేదా మధ్యతరగతి కుటుంబాలకు ఢిల్లీకి వెళ్లి రావడం, అక్కడ వసతి, లాయర్ల ఫీజులు భరించడం చాలా భారంగా మారింది. న్యాయం అందరికీ సమానంగా అందాలంటే, అది పొందే అవకాశం కూడా అందరికీ సులభంగా ఉండాలి."

బెంచ్‌కి హైదరాబాద్‌ ఎందుకు సరైన ప్రదేశం?

దక్షిణ భారతదేశానికి శాశ్వత సుప్రీం కోర్టు బెంచ్ ఏర్పాటు చేయాలనుకుంటే హైదరాబాద్ నగరమే అత్యంత అనువైన ప్రాంతమని ఎంపీ వద్దిరాజు వెల్లడించారు. అందుకు గల బలమైన కారణాలను సభ దృష్టికి తీసుకెళ్లారు.

కేంద్ర బిందువు: హైదరాబాద్ భౌగోళికంగా తెలంగాణ, ఆంధ్రప్రదేశ్, కర్ణాటక, తమిళనాడు, కేరళ, పుదుచ్చేరి, లక్షద్వీప్‌లకు మధ్యలో ఉండి సులభంగా చేరుకునేలా ఉంది.

వరల్డ్ క్లాస్ ఇన్‌ఫ్రాస్ట్రక్చర్: హైదరాబాద్ గ్లోబల్ ఐటీ, ఫార్మా, స్పేస్, లైఫ్ సైన్సెస్, పరిశోధనా రంగాలు, రక్షణ శాఖ కేంద్రాలకు జాతీయ హబ్‌గా ఉంది.

భాషా వెసులుబాటు: నగరంలో హిందీ మాట్లాడే వారి సంఖ్య చాలా ఎక్కువ. కాబట్టి దేశంలోని ఏ మూల నుంచి వచ్చే వ్యాజ్యదారులు (Litigants), న్యాయవాదులు, అధికారులైనా ఇక్కడ చాలా సౌకర్యవంతంగా ఉండగలరు.

న్యాయమూర్తుల సంఖ్య పెంపు ఒక మంచి ప్రారంభమని, అయితే సుప్రీం కోర్టును ప్రజల వద్దకు తీసుకెళ్లడమే నిజమైన న్యాయ సంస్కరణ అవుతుందని వద్దిరాజు రవిచంద్ర స్పష్టం చేశారు. ఇది కేవలం తెలంగాణ డిమాండ్ మాత్రమే కాదని, మొత్తం దక్షిణాది ప్రజల దశాబ్దాల ఆకాంక్ష అని, దీనిపై కేంద్ర ప్రభుత్వం సానుకూలంగా స్పందించాలని విజ్ఞప్తి చేశారు.