FII Buying | భార‌త మార్కెట్ల‌కు పోటెత్తుతున్న విదేశీ పెట్టుబ‌డులు.. అత్య‌ధికంగా కొంటున్న స్టాక్స్ ఇవే..

FII Buying | భారత స్టాక్ మార్కెట్లలో విదేశీ సంస్థాగత పెట్టుబడిదారులు (ఎఫ్ఐఐలు) మళ్లీ భారీగా కొనుగోళ్లు చేపట్టారు. అక్టోబర్ 30 నుంచి నవంబర్ 4 వరకు కేవలం నాలుగు ట్రేడింగ్ సెషన్లలోనే రూ.20,834.04 కోట్ల నికర పెట్టుబడులు పెట్టారు. 2023 తర్వాత ఇదే అత్యధిక నాలుగు రోజుల కొనుగోళ్లుగా నిలిచింది. టెలికాం, ఐటీ రంగాలపై విదేశీ పెట్టుబడిదారుల ఆసక్తి కనిపిస్తుండగా, కొన్ని కంపెనీల షేర్లలో భారీ బల్క్ డీల్స్ కూడా నమోదయ్యాయి.

ఊపందుకున్న కొనుగోళ్లు..

భారత ఈక్విటీ మార్కెట్లలో విదేశీ పెట్టుబడిదారుల కొనుగోళ్లు ఒక్కసారిగా ఊపందుకున్నాయి. అక్టోబర్ 30న రూ.3,598.54 కోట్లు, నవంబర్ 2న రూ.3,114.68 కోట్లు, నవంబర్ 3న రూ.6,836.81 కోట్లు, నవంబర్ 4న రూ.7,284.03 కోట్ల విలువైన షేర్లను ఎఫ్ఐఐలు నికరంగా కొనుగోలు చేశారు. నాలుగు రోజుల్లో మొత్తం రూ.20,834.04 కోట్ల పెట్టుబడులు వచ్చాయి. ఇదే సమయంలో దేశీయ సంస్థాగత పెట్టుబడిదారులు (డీఐఐలు) రూ.8,600.79 కోట్ల విలువైన షేర్లను విక్రయించారు. నవంబర్ 4న విదేశీ పెట్టుబడిదారుల కొనుగోళ్లు ఈ నాలుగు రోజుల వ్యవధిలోనే అత్యధిక స్థాయికి చేరాయి.

ఏయే షేర్లను కొంటున్నారు..

అయితే విదేశీ పెట్టుబడిదారులు ఏ కంపెనీల షేర్లను కొనుగోలు చేస్తున్నారనే అంశంపై అందుబాటులో ఉన్న ఎక్స్ఛేంజ్ బల్క్, బ్లాక్ డీల్ వివరాలు ఆసక్తికరంగా ఉన్నాయి. అక్టోబర్ 30న స్విగ్గీ షేర్లలో సొసైటీ జనరల్ సంస్థ రూ.428.86 కోట్ల విలువైన షేర్లను కొనుగోలు చేసింది. మోర్గాన్ స్టాన్లీ ఆసియా సింగపూర్ సంస్థ రూ.238.28 కోట్ల విలువైన స్విగ్గీ షేర్లను, గోల్డ్‌మన్ సాక్స్ బ్యాంక్ యూరప్ రూ.190.59 కోట్ల విలువైన షేర్లను కొనుగోలు చేసింది. అదే రోజు సెజిలిటీ కంపెనీలో బీఎన్‌పీ పారిబాస్ ఫైనాన్షియల్ మార్కెట్స్ రూ.240.19 కోట్లు, సొసైటీ జనరల్ రూ.203.09 కోట్ల విలువైన షేర్లను కొనుగోలు చేశాయి. గోల్డ్‌మన్ సాక్స్ ఇండియా ఈక్విటీ పోర్ట్‌ఫోలియో కూడా సుమారు రూ.116 కోట్ల కొనుగోలు చేసింది. నవంబర్ 3న ఎమ్‌ఓఎస్ యుటిలిటీ షేర్లలో అల్బులా ఇన్వెస్ట్‌మెంట్ ఫండ్ 40 లక్షల షేర్లను కొనుగోలు చేయగా, నవంబర్ 4న ఎమ్‌కే సన్స్ ఫైన్ జ్యువెల్స్‌లో అడ్వెంట్ గ్లోబల్ ఫండ్ పీసీసీ 2.95 లక్షల షేర్లను కొనుగోలు చేసింది. ఇవి వెల్లడైన బల్క్, బ్లాక్ డీల్స్ మాత్రమే.

ప్ర‌భావం చూపుతున్న అంశాలు ఏమిటి..?

ఈ కొనుగోళ్ల వెనుక ప్రధానంగా అంతర్జాతీయ పరిణామాలు, దేశీయ కంపెనీల ఆర్థిక ఫలితాలు ప్రభావం చూపుతున్నాయి. అంతర్జాతీయ మార్కెట్లో బ్రెంట్ క్రూడ్ ధర ఒక్కరోజే 8.7 శాతం తగ్గి బ్యారెల్‌కు 94.62 డాలర్లకు చేరడం భారత్‌కు సానుకూలంగా మారింది. అమెరికా డాలర్ బలహీనపడడం, అమెరికా మధ్యంతర ఎన్నికల ఫలితాల నేపథ్యంలో ఇరాన్‌తో యుద్ధం ముగిసే అవకాశాలపై అంచనాలు పెరగడం కూడా ఇన్వెస్టర్ల సెంటిమెంట్‌ను మెరుగుపరిచాయి. మరోవైపు రిలయన్స్ ఇండస్ట్రీస్, హెచ్‌డీఎఫ్‌సీ బ్యాంక్, ఐసీఐసీఐ బ్యాంక్, ఎల్‌అండ్‌టీ వంటి దిగ్గజ కంపెనీల క్యూ2 ఫలితాలు అంచనాలను మించడం విదేశీ పెట్టుబడిదారులకు భారత మార్కెట్లపై విశ్వాసాన్ని పెంచాయి.

ఏయే రంగాల్లో పెట్టుబ‌డులు వ‌స్తున్నాయి..

రంగాల వారీగా విదేశీ పెట్టుబడుల ధోరణిని పరిశీలిస్తే, అక్టోబర్ 16 నుంచి 31 వరకు అందుబాటులో ఉన్న ఎన్‌ఎస్‌డీఎల్ పక్షంవారీ గణాంకాల ప్రకారం టెలికాం రంగంలో రూ.11,065 కోట్లు, ఇన్ఫర్మేషన్ టెక్నాలజీ రంగంలో రూ.10,915 కోట్ల నికర విదేశీ పెట్టుబడులు నమోదయ్యాయి. అయితే ఫైనాన్షియల్ సర్వీసెస్, ఎఫ్‌ఎంసీజీ వంటి కొన్ని రంగాల్లో విదేశీ పెట్టుబడుల ఉపసంహరణ కనిపించింది. మరోవైపు నవంబర్ 4న డాలర్‌తో పోలిస్తే రూపాయి విలువ 17 పైసలు బలపడి రూ.94.58కు చేరడం కూడా సానుకూల పరిణామంగా నిలిచింది. గతంలో భారీగా పెట్టుబడులను ఉపసంహరించుకున్న విదేశీ ఇన్వెస్టర్లు తిరిగి భారత మార్కెట్లలో కొనుగోళ్లు చేపట్టడం మార్కెట్ తదుపరి కదలికలపై ఆసక్తిని పెంచుతోంది.