TDS | మీకు ల‌భించే వ‌డ్డీపై బ్యాంకు టీడీఎస్ క‌ట్ చేసిందా..? అయితే ఈ విష‌యాల‌ను తెలుసుకోవాల్సిందే..!

TDS | కొత్త ఆదాయపు పన్ను చట్టం గ‌తేడాది ఏప్రిల్ 1 నుంచి అమల్లోకి వచ్చిన నేపథ్యంలో బ్యాంక్ వడ్డీపై టీడీఎస్ (TDS) పరిమితి మారుతుందా అనే సందేహాలకు ఆదాయ‌పు ప‌న్ను శాఖ స్పష్టత ఇచ్చింది. ఈ చట్టంలో బ్యాంకింగ్ కంపెనీ నిర్వచనంలో మార్పులు వచ్చినప్పటికీ, టీడీఎస్ నిబంధనలు యథాతథంగా కొనసాగుతాయని వెల్లడించింది. ఈ మేర‌కు ఆ శాఖ త‌న ఎక్స్ ఖాతాలో ఒక పోస్టులో ఈ వివ‌రాల‌ను వెల్ల‌డించింది. ప్రస్తుత నిబంధనల ప్రకారం బ్యాంకులు టీడీఎస్ మినహాయింపు పరిమితి వరకూ వడ్డీపై పన్ను కట్టాల్సిన అవసరం లేదని పేర్కొంది. ఇప్పటికే అమల్లో ఉన్న విధానంలో ఎలాంటి మార్పులు లేవని స్పష్టం చేసింది.

ప‌రిమితి ఆధారంగానే కొన‌సాగింపు..

కొత్త చట్టంలో బ్యాంకింగ్ కంపెనీ నిర్వచనాన్ని బ్యాంకింగ్ రెగ్యులేష‌న్ యాక్ట్ పరిధిలోకి వచ్చే సంస్థలకు విస్తరించినప్పటికీ, సెక్షన్ 51 కింద వచ్చే సంస్థలు స్పష్టంగా చేర్చబడలేదనే అంశం పన్ను చెల్లింపుదారుల్లో అనుమానాలను రేకెత్తించింది. దీంతో కొన్ని సంస్థల‌కు టీడీఎస్ పరిమితి లేకుండా పన్ను కట్టాల్సి వస్తుందా అనే సందేహాలు వ్యక్తమయ్యాయి. ఈ నేపథ్యంలో ఆదాయపు పన్ను శాఖ స్పందిస్తూ ఆ సంస్థలు కూడా బ్యాంకింగ్ కంపెనీ నిర్వచనంలోకే వస్తాయని ధ్రువీకరించింది. అంటే, వడ్డీపై టీడీఎస్ విధానం పరిమితి ఆధారంగానే కొనసాగుతుంది. వ్యక్తులు, వృద్ధులకు నిర్దేశించిన పరిమితి దాటినప్పుడే టీడీఎస్ వర్తిస్తుంది. గతంలో ఆదాయ‌పు ప‌న్ను చ‌ట్టం 1961 కింద సెక్యూరిటీయేతర వడ్డీపై టీడీఎస్ సెక్షన్ 194ఎ ప్రకారం అమలులో ఉండేది. వ్యక్తులకు సంవత్సరానికి రూ.50వేల వరకు, సీనియర్ సిటిజన్లకు రూ.1 ల‌క్ష వరకు వడ్డీపై బ్యాంకులు టీడీఎస్ కట్ చేయాల్సిన అవసరం ఉండేది కాదు.

కొత్త చ‌ట్టంలో మార్పులు లేవు..

కొత్త చట్టంలో ఈ పరిమితుల్లో ఎలాంటి మార్పు చేయలేదు. అంటే ఈ పరిమితిని మించిన వడ్డీపై మాత్రమే టీడీఎస్ వర్తిస్తుంది. ఆ తర్వాత, పాన్ వివరాలు ఇవ్వడం వంటి నిబంధనల ఆధారంగా సంబంధిత రేటు ప్రకారం పన్ను కట్ చేస్తారు. సాధారణంగా బ్యాంకులు, ఆర్థిక సంస్థలు, కంపెనీలు లేదా వ్యక్తులు చెల్లించే వడ్డీ, డిపాజిట్లు, రుణాలు లేదా అడ్వాన్సులపై చెల్లింపు సమయంలోనే టీడీఎస్ కట్ చేస్తారు. సాధారణ పరిస్థితుల్లో టీడీఎస్ రేటు 10 శాతంగా ఉంటుంది. అయితే సరైన పాన్ వివరాలు అందించకపోతే ఈ రేటు 20 శాతానికి పెరుగుతుంది. ఈ నిబంధనలు ప్రధానంగా దేశీయ నివాసితులకు మాత్రమే వర్తిస్తాయి, ఎన్ఆర్ఐలు చెల్లించే వడ్డీ ఈ పరిధిలోకి రాదు.

ఒక వ్యక్తి మొత్తం పన్ను పరిధిలోకి వచ్చే ఆదాయం, మినహాయింపు పరిమితి కంటే తక్కువగా ఉంటే, బ్యాంకులు టీడీఎస్ కట్ చేయవు. ఇందుకోసం కొత్తగా ఫామ్ 121 ను సమర్పించాలి, ఇది పాత ఫామ్ 15జి, 15హెచ్‌లకు ప్రత్యామ్నాయంగా అమల్లోకి వచ్చింది.