Medicine Prices | అమెరికన్లకు భారీ ఊరట.. త‌గ్గ‌నున్న ఔష‌ధాల ధ‌ర‌లు..

Medicine Prices | అమెరికన్లకు ఔషధ ధరలను తగ్గించే దిశగా అధ్యక్షుడు డొనాల్డ్ ట్రంప్ తీసుకుంటున్న చారిత్రాత్మక చర్యలు ఫలితాలు ఇస్తున్నాయని వైట్‌హౌస్ వెల్లడించింది. ఔషధ తయారీ సంస్థలతో తాజాగా మరో 9 కొత్త ఒప్పందాలు కుదిరినట్లు వైట్‌హౌస్ తెలిపింది. ఇతర అభివృద్ధి చెందిన దేశాల్లో చెల్లిస్తున్న అత్యల్ప ధరలకు సమానంగా ఔషధ ధరలను తీసుకురావడమే ఈ ఒప్పందాల లక్ష్యమని పేర్కొంది. తాజా 9 ఒప్పందాలతో కలిపి ఔషధ తయారీ సంస్థలతో కుదిరిన మొత్తం ఒప్పందాల సంఖ్య 26కు చేరిందని వైట్‌హౌస్ వెల్లడించింది. ఈ ఒప్పందాలు బ్రాండెడ్ ఔషధాల మార్కెట్‌లో 89 శాతాన్ని కవర్ చేస్తున్నాయని తెలిపింది.

600 బిలియ‌న్ డాల‌ర్ల మేర ఆదా..

ఈ చర్యల ద్వారా అమెరికన్లకు గరిష్ఠంగా 600 బిలియన్ డాలర్ల వరకు ఆదా కలిగే అవకాశం ఉందని వైట్‌హౌస్ పేర్కొంది. ఔషధ ధరలను తగ్గించేందుకు ట్రంప్ ప్రభుత్వం తీసుకుంటున్న చర్యల్లో ఇది భారీ ముందడుగు అని తెలిపింది. ఈ ఒప్పందాల ద్వారా అమెరికా ప్రజలు ప్రస్తుతం అధిక ధరలకు కొనుగోలు చేస్తున్న బ్రాండెడ్ ఔషధాలను తక్కువ ధరలకు పొందే అవకాశం ఏర్పడుతుందని పేర్కొంది. ముఖ్యంగా ఇతర అభివృద్ధి చెందిన దేశాల్లో అమలులో ఉన్న అత్యల్ప ధరలను ప్రమాణంగా తీసుకోవడం ద్వారా అమెరికాలో ఔషధ ధరల వ్యత్యాసాన్ని తగ్గించేందుకు ప్రభుత్వం ప్రయత్నిస్తోంది. ఔషధాలపై కుటుంబాలు, రోగులు భరించాల్సి వస్తున్న ఆర్థిక భారాన్ని తగ్గించడం ఈ చర్యల ప్రధాన ఉద్దేశంగా కనిపిస్తోంది.

మొత్తం 26 ఔషధ తయారీ సంస్థలు ఈ ఒప్పందాల పరిధిలోకి రావడంతో అమెరికా బ్రాండెడ్ ఔషధాల మార్కెట్‌లో గణనీయమైన భాగం ప్రభావితమయ్యే అవకాశం ఉంది. 89 శాతం మార్కెట్‌ను కవర్ చేస్తున్న ఈ ఒప్పందాల ద్వారా దీర్ఘకాలంలో ఔషధాల ఖర్చు తగ్గి, ఆరోగ్య సంరక్షణపై ప్రజల వ్యయం కూడా తగ్గుతుందని వైట్‌హౌస్ అంచనా వేస్తోంది. ఈ చర్యల ఫలితంగా 600 బిలియన్ డాలర్ల వరకు పొదుపు సాధ్యమవుతుందని ట్రంప్ ప్రభుత్వం చెబుతోంది.