Onion Prices | ఘాటెక్కిన ఉల్లి.. త‌ల్ల‌డిల్లుతున్న గృహిణి

Onion Prices | త్రినేత్ర‌.న్యూస్ : హైద‌రాబాద్ న‌గ‌రంలో ఉల్లి ధ‌ర‌లు ఘాటెక్కాయి. దీంతో గృహిణులు త‌ల్ల‌డిల్లిపోతున్నారు. రెండు నెల‌ల క్రితం వ‌ర‌కు న‌గ‌రంలో కిలో ఉల్లి ధ‌ర రూ. 20 ఉండేది. గత నెల‌లో రూ. 35 వ‌ర‌కు ఉండ‌గా.. ప్ర‌స్తుతం ఆ ధ‌ర‌లు రెండింత‌లు అయ్యాయి. తాజాగా మార్కెట్‌లో ఉల్లి కొనాలంటే కిలోకు రూ. 60పైనే చెల్లించాల్సి వ‌స్తోంది. రాబోయే రోజుల్లో ఈ ఉల్లి ధ‌ర రూ. 100కు చేరే అవ‌కాశం ఉంది. ఎందుకంటే ఎల్‌నినో కార‌ణంగా ఉల్లి పంట దిగుబ‌డి గ‌ణ‌నీయంగా త‌గ్గ‌డ‌మే.

సోమ‌వారం 11,870 క్వింటాళ్లు మాత్ర‌మే దిగుమ‌తి

న‌గ‌రంలో ఉల్లికి భారీగా డిమాండ్ ఉంటుంది. ఎందుకంటే హోట‌ల్స్, రెస్టారెంట్లు, ఫాస్ట్ ఫుడ్ సెంట‌ర్ల నిర్వాహ‌కులు ఉల్లిని భారీగా కొనుగోలు చేస్తుంటారు. దీంతో గ‌తంలో రోజుకు 20 నుంచి 25 వేల క్వింటాళ్ల వ‌ర‌కు ఉల్లి దిగుమ‌తి అయ్యేది. కానీ ఆగ‌స్టు 31న మాత్రం కేవ‌లం 11870 క్వింటాళ్లు మాత్ర‌మే దిగుమ‌తి అయింది.

కిలో ఉల్లి ధ‌ర రూ. 60

హైద‌రాబాద్ న‌గ‌రానికి ప్ర‌ధానంగా మ‌హారాష్ట్రలోని నాసిక్ నుంచి అధికంగా ఉల్లి వ‌స్తుంది. అక్క‌డ వ‌ర్షాభావ ప‌రిస్థితుల కార‌ణంగా.. ఖ‌రీఫ్ పంట సాగు ఆల‌స్య‌మైంది. పాత ఉల్లి ఉంటే.. అది అకాల వ‌ర్షాల‌కు త‌డిసిపోయి దెబ్బ‌తిన్న‌ది. దీంతో స‌ర‌ఫ‌రా త‌గ్గిపోయింది. కొత్త పంట మార్కెట్‌లోకి వ‌చ్చేందుకు ఆల‌స్యం కావ‌డం, పాత నిల్వ‌లు అయిపోవ‌డంతో.. హోల్ సేల్ మార్కెట్‌లోకి వ‌చ్చే ఉల్లి ప‌రిమాణం గ‌ణ‌నీయంగా త‌గ్గిపోయింది. దీంతో ఉల్లికి భారీగా డిమాండ్ ఏర్ప‌డుతుంది. నాణ్య‌మైన ఉల్లి ధ‌ర రూ. 60(కిలో) ప‌లుకుతోంది. రైతుబజార్లలో రూ.35-40 వరకు ఉండగా మహబూబ్‌మాన్షన్, బోయిన్‌పల్లి, గుడిమల్కాపూర్‌ మార్కెట్లలో క్వింటాల్‌ రూ.3,200 నుంచి రూ.4,000 వరకు ఉంది.