Stock Markets | అమెరికా స్టాక్ మార్కెట్ల‌లో జోష్.. డౌ రికార్డ్ హై..

Stock Markets | మధ్యప్రాచ్య ఘర్షణ ముగింపుకు సంబంధించి చర్చల్లో పురోగతి కనిపించడం, కార్పొరేట్ ఆదాయ ఫలితాలు బలంగా రావడంతో శుక్రవారం అమెరికా స్టాక్ మార్కెట్లు భారీగా ఎగ‌బాకాయి. ఈ ఉత్సాహంతో డౌ జోన్స్ ఇండస్ట్రియల్ యావరేజ్ ఇంట్రాడే రికార్డ్ గరిష్ట స్థాయిని తాకింది. ఎస్‌అండ్‌పీ 500 సూచీ వరుసగా ఎనిమిదో వారంలోనూ లాభాల దిశగా కొన‌సాగింది. డిసెంబర్ 2023 తర్వాత ఇదే అత్యంత సుదీర్ఘ‌మైన‌ వారాల లాభాల పరంపరగా నిలిచింది. ఇటీవలి కాలంలో వాల్ స్ట్రీట్ ర్యాలీకి ప్రధాన బలం అందించిన సెమీకండక్టర్ స్టాక్స్ ఎక్కువగా లాభాల్లో ముగిశాయి. ఫిలడెల్ఫియా సెమీకండక్టర్ ఇండెక్స్ 2.5 శాతం ఎగసింది. ఇందులో క్వాల్‌కామ్ షేరు 12 శాతం దూసుకెళ్లగా, ఎన్‌విడియా మాత్రం 1.6 శాతం తగ్గింది. ఇరాన్‌తో ఒప్పందం దిశగా అమెరికా కొంత పురోగతి సాధించిందని, అయితే ఇంకా చర్చలు కొనసాగాల్సి ఉందని అమెరికా విదేశాంగ కార్యదర్శి మార్కో రుబియో తెలిపారు. మరోవైపు ఇరాన్ విదేశాంగ శాఖ ప్రతినిధి మాట్లాడుతూ రెండు దేశాల మధ్య ఇంకా గణనీయమైన విభేదాలు ఉన్నాయని పేర్కొన్నారు.

పెట్టుబ‌డిదారుల్లో పెరుగుతున్న ఆశావాదం..

కాలిఫోర్నియాలోని ఓషన్ పార్క్ అసెట్ మేనేజ్‌మెంట్ చీఫ్ ఇన్వెస్ట్‌మెంట్ ఆఫీసర్ జేమ్స్ ఆబిన్ మాట్లాడుతూ కార్పొరేట్ ఎర్నింగ్స్ సీజన్ చాలా బలంగా ఉందన్నారు. కొన్ని మినహాయింపులు తప్ప ఆర్థిక గణాంకాలు కూడా స్థిరంగా కనిపిస్తున్నాయని చెప్పారు. ఈక్విటీ మార్కెట్లకు యుద్ధ పరిస్థితులు ఒక ప్రధాన అడ్డంకిగా మారినా, తాజా పరిణామాలు పెట్టుబడిదారుల్లో ఆశావాదాన్ని పెంచాయని వివరించారు. డౌ జోన్స్ ఇండస్ట్రియల్ యావరేజ్ 428.65 పాయింట్లు పెరిగి 50,714.31 వద్ద ముగిసింది. ఎస్‌అండ్‌పీ 500 సూచీ 45.82 పాయింట్లు ఎగిసి 7,491.54కి చేరింది. నాస్‌డాక్ కంపోజిట్ 130.07 పాయింట్లు పెరిగి 26,423.17 వద్ద నిలిచింది. ఎస్‌అండ్‌పీ 500లోని 11 ప్రధాన రంగాల్లో తొమ్మిది రంగాలు లాభాల్లో ముగిశాయి. ముఖ్యంగా హెల్త్‌కేర్, ఇండస్ట్రియల్స్, టెక్నాలజీ స్టాక్స్ బలంగా పెరిగాయి. కమ్యూనికేషన్, కన్స్యూమర్ స్టేపుల్స్ రంగాలు మాత్రం ఒత్తిడిని ఎదుర్కొన్నాయి.

భారీగా ఎగ‌బాకిన కంప్యూట‌ర్ త‌యారీ కంపెనీల షేర్లు..

చైనా కంపెనీ లెనోవో గ్రూప్ అంచనాలకు మించిన ఫలితాలు ప్రకటించడంతో అమెరికా కంప్యూటర్ తయారీ సంస్థల షేర్లు భారీగా ఎగిశాయి. లెనోవో త్రైమాసిక ఆదాయం 27 శాతం పెరిగినట్లు వెల్లడించింది. దీంతో డెల్ టెక్నాలజీస్ షేరు 17 శాతం ఎగిసి రికార్డ్ హైని తాకగా, హెచ్‌పీ ఇంక్ షేరు 15 శాతం పైగా పెరిగింది. ఇటీవల గరిష్టాలకు చేరిన దీర్ఘకాలిక ప్రభుత్వ బాండ్ ఈల్డ్స్ తగ్గుముఖం పట్టాయి. అమెరికా 10 ఏళ్ల ట్రెజరీ నోట్ ఈల్డ్ 2.6 బేసిస్ పాయింట్లు తగ్గి 4.558 శాతానికి చేరింది. బాండ్ మార్కెట్ ఇప్పుడు కొంత చల్లబడుతోందని, ఈల్డ్స్ తగ్గడం పెట్టుబడిదారులకు సానుకూల సంకేతమని జేమ్స్ ఆబిన్ అన్నారు. ఇరాన్ ఘర్షణ కారణంగా పెరిగిన ఇంధన ధరలు ద్రవ్యోల్బణాన్ని పెంచుతూ వినియోగదారుల భావోద్వేగాలపై ప్రభావం చూపుతున్న సమయంలో కెవిన్ వార్ష్ శుక్రవారం ఫెడరల్ రిజర్వ్ చైర్మన్‌గా ప్రమాణ స్వీకారం చేశారు. మెమోరియల్ డే వీకెండ్‌కు ముందు సీబీఓఈ వోలాటిలిటీ ఇండెక్స్ రెండు వారాల కనిష్టానికి పడిపోయింది.

పెరిగిన షేర్లే అధికం..

కాస్మెటిక్స్ దిగ్గజం ఎస్టీ లాడర్, స్పెయిన్‌కు చెందిన పర్ఫ్యూమరీ సంస్థ పూయిగ్ మధ్య విలీన చర్చలు ముగియడంతో ఎస్టీ లాడర్ షేరు 12 శాతం ఎగిసింది. హ్యూమన్ రిసోర్సెస్ సాఫ్ట్‌వేర్ సంస్థ వర్క్‌డే తొలి త్రైమాసిక ఆదాయం, లాభాలు అంచనాలను మించడంతో ఆ కంపెనీ షేరు 5 శాతం పెరిగింది. న్యూయార్క్ స్టాక్ ఎక్స్చేంజ్‌లో పెరిగిన షేర్లు, పడిపోయిన షేర్ల కంటే 1.83 రెట్లు అధికంగా ఉన్నాయి. ఎన్‌వైఎస్‌ఈలో 309 కొత్త గరిష్టాలు నమోదవగా, 68 కొత్త కనిష్టాలు నమోదయ్యాయి. ఎస్‌అండ్‌పీ 500లో 28 కొత్త 52 వారాల గరిష్టాలు నమోదయ్యాయి. ఎలాంటి కొత్త కనిష్టాలు నమోదు కాలేదు. నాస్‌డాక్ కంపోజిట్‌లో 116 కొత్త గరిష్టాలు, 65 కొత్త కనిష్టాలు నమోదయ్యాయి.