Bond Yields | యుద్ధం మాత్ర‌మే కాదు.. ప్ర‌పంచ మార్కెట్ల‌ను కుదిపేస్తున్న ప్ర‌ధాన కార‌ణాలు ఇవే..

Bond Yields | ఇరాన్ యుద్ధం, చమురు ధరల పెరుగుదల వల్ల ద్రవ్యోల్బణం మళ్లీ ఎగిసిపడుతుందనే భయాలు ప్రపంచ మార్కెట్లను కుదిపేస్తున్నప్పటికీ, దీర్ఘకాలిక రుణ వ్యయాలు పెరగడానికి అసలు కారణాలు మరింత లోతైనవిగా కనిపిస్తున్నాయి. ముఖ్యంగా అమెరికా బాండ్ మార్కెట్లో రియల్ ఈల్డ్స్ పెరుగుదల ఇప్పుడు పెట్టుబడిదారులను ఎక్కువగా ఆందోళనకు గురిచేస్తోంది. సాధారణంగా బాండ్ ఈల్డ్స్‌లో ద్రవ్యోల్బణ ప్రభావాన్ని తీసేసిన తర్వాత మిగిలేది రియల్ ఈల్డ్. ప్రస్తుతం అమెరికాలో ఇవే వేగంగా పెరుగుతున్నాయి. అంటే మార్కెట్ కేవలం చమురు ధరల పెరుగుదల వల్ల వచ్చే ద్ర‌వ్యోల్బ‌ణానికి మాత్రమే భయపడటం లేదు. ప్రభుత్వ అప్పులు, భారీ ఫిస్కల్ లోట్లు, ఆర్టిఫిషియల్ ఇంటెలిజెన్స్ బూమ్, అలాగే ఫెడరల్ రిజర్వ్ వడ్డీ రేట్లు తగ్గించకుండా పెంచే అవకాశాలు కూడా బాండ్ మార్కెట్‌ను ఒత్తిడికి గురిచేస్తున్నాయి. బ్లూమ్‌బర్గ్ విశ్లేషణతో పాటు ఐఎన్‌జీ బ్యాంక్, గోల్డ్‌మన్ శాక్స్, బార్క్‌లేస్ వంటి సంస్థల వ్యూహకర్తలు ఓ కీలక అంశాన్ని ప్రస్తావిస్తున్నారు. చమురు ధరలు తగ్గినా, యుద్ధం ముగిసినా కూడా ప్రస్తుతం పెరిగిన దీర్ఘకాలిక ఈల్డ్స్ పూర్తిగా తగ్గకపోవచ్చని వారు హెచ్చరిస్తున్నారు. దీన‌ర్థం ప్రభుత్వాలు, కంపెనీలు, వినియోగదారులందరికీ రుణ వ్యయాలు ఎక్కువగానే కొనసాగే అవ‌కాశాలు ఉంటాయ‌ని స్ప‌ష్ట‌మ‌వుతోంది.

బ్రేక్ ఈవెన్ రేట్లు త‌క్కువ‌గానే..

బార్క్‌లేస్‌కు చెందిన జోనాథన్ హిల్ మాట్లాడుతూ ప్రస్తుతం జరుగుతున్న బాండ్ మార్కెట్ అమ్మకాలను కేవలం ద్ర‌వ్యోల్బ‌ణ‌ భయాలతో మాత్రమే వివరించడం కష్టమ‌ని, పెరుగుతున్న ప్రభుత్వ అప్పులు, అధిక న్యూట్రల్ రేట్లు, ఏఐ ప్రభావం కలిసి రియల్ రేట్లను పైకి నెడుతున్నాయ‌ని చెప్పారు. ఇక్కడ న్యూట్రల్ రేట్ అంటే ఆర్థిక వ్యవస్థను వేగవంతం చేయకుండా, మందగించకుండా ఉంచే వడ్డీ రేటు స్థాయి. ఈ స్థాయి పెరిగితే, మార్కెట్‌లో సాధారణంగా ఎక్కువ ఈల్డ్స్ ఉండటం సహజమవుతుంది. చమురు ధరల పెరుగుదల పెద్ద వార్తగా మారినప్పటికీ, అమెరికా, యూకే బాండ్ మార్కెట్లలో ద్రవ్యోల్బణ అంచనాలను సూచించే బ్రేక్-ఈవెన్ రేట్లు అంతగా పెరగలేదు. జోనాథన్ హిల్ తెలిపిన ప్రకారం ప్రస్తుతం యుద్ధం జరుగుతున్నప్పటికీ అమెరికాలో 10 ఏళ్ల బ్రేక్-ఈవెన్ రేట్లు 2022 ప్ర‌థ‌మార్థంలో ఫెడ్ దూకుడుగా వడ్డీ రేట్లు పెంచిన కాలంతో పోలిస్తే 50 బేసిస్ పాయింట్లు తక్కువగా ఉన్నాయి. అలాగే మధ్యకాలిక ద్ర‌వ్యోల్బ‌ణ‌ అంచనాలకు సూచికగా భావించే 5-ఇయర్, 5-ఇయర్ బ్రేక్-ఈవెన్ రేట్ ప్రస్తుతం 2.2 శాతం వద్ద ఉంది. ఇది గత డిసెంబర్ స్థాయిలతో సమానంగా ఉంది.

రియ‌ల్ ఈల్డ్స్ అన్నింటికీ కార‌ణం..

బ్యాంక్ ఆఫ్ అమెరికా ఆర్థికవేత్తలు క్లాడియో ఇరిగోయెన్, ఆంటోనియో గాబ్రియెల్ మాట్లాడుతూ ఈల్డ్ కర్వ్‌లో మార్పులను బట్టి మార్కెట్ అసలు ఏ దిశగా కదులుతోందో అర్థమవుతోందన్నారు. స్వ‌ల్ప‌కాలిక, దీర్ఘకాలిక బాండ్ ఈల్డ్స్ మధ్య వ్యత్యాసమే ఈల్డ్ కర్వ్. వారి అభిప్రాయం ప్రకారం ఫెడరల్ రిజర్వ్ మళ్లీ వడ్డీ రేట్లు పెంచే పరిస్థితి వస్తే, అప్పటికే పెరిగిన ప్రభుత్వ అప్పులు, వాటి సర్వీసింగ్ ఖర్చులు మరింత ఫిస్కల్ లోటును పెంచుతాయి. దీంతో దీర్ఘకాలిక బాండ్లపై పెట్టుబడిదారులు మరింత అధిక రాబడిని డిమాండ్ చేస్తారు. బ్లూమ్‌బర్గ్ విశ్లేషణ ప్రకారం అమెరికాలో మొత్తం ఈల్డ్స్ పెరుగుదలకు ప్రధాన కారణం రియల్ ఈల్డ్స్. అయితే జపాన్, జర్మనీలో మాత్రం ద్ర‌వ్యోల్బ‌ణ‌ అంచనాలే ప్రధాన ప్రభావం చూపుతున్నాయి. ఇరాన్ యుద్ధం కారణంగా మూత‌ప‌డిన‌ హోర్ముజ్ జలసంధిని మళ్లీ తెరిచినా కూడా, రియల్ ఈల్డ్స్ ఎక్కువగానే ఉంటే అమెరికా ట్రెజరీ ఈల్డ్స్ భారీగా పడిపోవని ఐఎన్‌జీ అమెరికాస్ రీసెర్చ్ హెడ్ ప్యాడ్రాయిక్ గార్వే హెచ్చరించారు. అమెరికా 10 ఏళ్ల ట్రెజరీ ఈల్డ్ 4.5 శాతం దాటిన మొత్తం పెరుగుదల దాదాపు పూర్తిగా రియల్ ఈల్డ్స్ వల్లే వచ్చింది. ఈ ఈల్డ్ గ‌త వారంలో 4.70 శాతం వరకు చేరి, తాజాగా 4.56 శాతం వద్దకు తగ్గింది.

అధిక రాబ‌డి డిమాండ్ చేస్తున్న పెట్టుబ‌డిదారులు..

మ్యూరియల్ సీబర్ట్ అండ్ కో చీఫ్ ఇన్వెస్ట్‌మెంట్ ఆఫీసర్ మార్క్ మాలెక్ మాట్లాడుతూ బాండ్ మార్కెట్ ఒక వార్తకు మాత్రమే స్పందించడం లేద‌ని, ఇది ఒక నిర్మాణాత్మక సమస్యను మళ్లీ ధరలలో ప్రతిబింబిస్తోంద‌ని అన్నారు. దీన్ని కేవలం రాజకీయ ప్రకటనలతో లేదా తాత్కాలిక ఒప్పందాలతో పరిష్కరించలేమ‌ని అన్నారు. అమెరికా అధ్యక్షుడు డొనాల్డ్ ట్రంప్ భారీ పన్ను తగ్గింపులను ముందుకు తీసుకెళ్లాలని చూస్తుండటం, ఇప్పటికే పెరిగిన ప్రభుత్వ అప్పులకు మరింత భారం కావొచ్చని మార్కెట్ భయపడుతోంది. దీని వల్ల మరిన్ని ట్రెజరీ బాండ్లు జారీ చేయాల్సి వ‌స్తుంది. అదే సమయంలో ట్రేడ్ వార్ సరఫరా చెయిన్ లను దెబ్బతీస్తుండటం కూడా ఒత్తిడిని పెంచుతోంది. జేపీ మోర్గాన్ చీఫ్ ఎగ్జిక్యూటివ్ జేమీ డైమన్ ఇటీవల బ్లూమ్‌బర్గ్ టెలివిజన్ ఇంటర్వ్యూలో మాట్లాడుతూ ప్రభుత్వ అప్పులు పెరుగుతుండటంతో అమెరికా వడ్డీ రేట్లు ఇంకా గణనీయంగా పెరిగే అవకాశముందని హెచ్చరించారు. గోల్డ్‌మన్ శాక్స్‌కు చెందిన ఫిలిప్ లీ తెలిపిన ప్రకారం భారీ ఫిస్కల్ లోటు, ఎక్కువ ట్రెజరీ జారీలు, ప్రభుత్వ అప్పుల స్థిరత్వంపై పెరుగుతున్న అనుమానాలు పెట్టుబడిదారులు దీర్ఘకాలిక బాండ్లపై అధిక రాబడిని డిమాండ్ చేయడానికి ప్రధాన కారణాలుగా మారాయ‌ని అన్నారు.

దీర్ఘకాలంలో మంచిదే.. కానీ ఇప్ప‌టి సంగ‌తి..?

ఈ ఏడాది ప్రారంభంలో ఫెడ్ వడ్డీ రేట్లు తగ్గిస్తుందని భావించిన మార్కెట్, ఇప్పుడు పరిస్థితులు మారడంతో రేట్లు పెరిగే అవకాశాలపై కూడా పందేలు కాస్తోంది. ఏఐ రంగం దీర్ఘకాలంలో ఉత్పాదకత పెంచి ద్రవ్యోల్బణాన్ని తగ్గించవచ్చని భావించినప్పటికీ, తక్షణ కాలంలో మాత్రం సెమీకండక్టర్లపై భారీ డిమాండ్, పెద్ద డేటా సెంటర్ల నిర్మాణం, టెక్ కంపెనీల అధిక అప్పులు మార్కెట్లో ద్రవ్యోల్బణ ఒత్తిడిని పెంచుతున్నాయని బాండ్ ట్రేడర్లు భావిస్తున్నారు. అలాగే ఏఐ బూమ్ ఆర్థిక వృద్ధిని వేగవంతం చేస్తే, పెట్టుబడిదారులు ఈక్విటీల వైపు మొగ్గుచూపే అవకాశం ఉంది. దీంతో బాండ్లలో పెట్టుబడి పెట్టేందుకు ఎక్కువ ఈల్డ్స్ అవసరం అవుతాయి. బ్లూమ్‌బర్గ్ ఎకనామిక్స్ డైరెక్టర్ జేమీ రష్ విశ్లేషణ ప్రకారం గత ఐదు దశాబ్దాలుగా ప్రపంచవ్యాప్తంగా పొదుపులు పెరగడం, పెట్టుబడుల అవసరం తగ్గడం వల్ల వడ్డీ రేట్లు క్రమంగా దిగివచ్చాయి. ఇప్పుడు పరిస్థితి పూర్తిగా మారిపోయిందని, ఇకపై ప్రపంచం అధిక వడ్డీ రేట్ల యుగంలోకి ప్రవేశించే అవకాశముందని ఆయన పేర్కొన్నారు.

ప్ర‌భావం చూపిస్తున్న ద్ర‌వ్యోల్బ‌ణం..

జపాన్, జర్మనీల్లో యుద్ధం ప్రారంభమైనప్పటి నుంచి 10 ఏళ్ల ఈల్డ్స్ పెరుగుదలకు ప్రధాన కారణం ద్ర‌వ్యోల్బ‌ణ‌ అంచనాలేనని డేటా చెబుతోంది. యూరప్‌లో గ్యాస్ ధరలు పెరుగుతుండగా, జపాన్‌లో ఇప్పటికే ద్రవ్యోల్బణ ఒత్తిడి పెరిగింది. అయితే బ్యాంక్ ఆఫ్ జపాన్ వడ్డీ రేట్లు పెంచడంలో వెనుకంజ వేయడం పెట్టుబడిదారులను మరింత అధిక రాబడులు కోరేలా చేస్తోంది. యూకేలో ప్రధాని కీర్ స్టార్మర్‌పై రాజకీయ ఒత్తిడి పెరుగుతుండటంతో మరింత విస్తృత ఫిస్కల్ విధానాలు, గిల్ట్ జారీలు పెరిగే అవకాశాలపై మార్కెట్ ఆందోళన చెందుతోంది. ఫెడరేటెడ్ హెర్మెస్‌కు చెందిన జాన్ సిదావి మాట్లాడుతూ గిల్ట్స్‌పై దీర్ఘకాలిక పెట్టుబడి వ్యూహం తీసుకోవాలంటే కూడా ఇప్పుడు టాక్టికల్‌గా వ్యవహరించాల్సిందేన‌ని అన్నారు. రాజకీయ అనిశ్చితి కారణంగా యూకే బాండ్లలో ఎప్పటికీ ఒక అదనపు ప్రీమియం ఉండే అవకాశం ఉంద‌న్నారు.