Leopard Attack IIT Bombay | ఐఐటీ బాంబే క్యాంపస్‌లోకి అర్ధరాత్రి ప్రవేశించిన చిరుత.. వీధి కుక్కను దారుణంగా వేటాడి.. VIDEO

Leopard attack IIT Bombay | త్రినేత్ర.న్యూస్ : ముంబైలోని ప్రతిష్టాత్మక ఐఐటీ బాంబే (IIT-Bombay) క్యాంపస్‌లో ఓ చిరుతపులి సృష్టించిన బీభత్సం.. ఇప్పుడు అక్కడ ఉంటున్న స్టూడెంట్స్, స్టాఫ్ మెంబర్స్‌కు కంటిమీద కునుకు లేకుండా చేస్తోంది. జూన్ 19వ తేదీ తెల్లవారుజామున 2 గంటల ప్రాంతంలో పొవై క్యాంపస్‌లోని స్టాఫ్ హాస్టల్ ఏరియాలోకి చొరబడిన ఓ చిరుత.. వీధి కుక్కపై దాడి చేసి దారుణంగా చంపేసింది. ఈ ఘటనకు సంబంధించిన షాకింగ్ సీసీటీవీ ఫుటేజ్ ప్రస్తుతం వెలుగులోకి వచ్చి నెట్టింట వైరల్‌గా మారింది.

సీసీటీవీలో రికార్డైన దృశ్యాలు

వైరల్ అవుతున్న ఈ సీసీటీవీ వీడియోలో.. స్టాఫ్ హాస్టల్ మెట్ల దగ్గర నిల్చున్న ఓ వీధి కుక్క, ఏదో ప్రమాదం పొంచి ఉందన్నట్లుగా భయంతో కుడివైపు చూడటం మనం గమనించవచ్చు. ఆ తర్వాతి క్షణంలోనే ఫ్రేమ్‌లోకి సైలెంట్‌గా ఎంట్రీ ఇచ్చిన చిరుత.. ఒక్కసారిగా ఆ కుక్క మీదకు దూకింది.

తనను తాను కాపాడుకోవడానికి కుక్క కాసేపు పోరాడినా.. చిరుత బలం ముందు నిలబడలేకపోయింది. కేవలం కొన్ని సెకన్ల వ్యవధిలోనే కుక్క మెడను బలంగా పట్టుకున్న చిరుత, దాన్ని అక్కడికక్కడే మట్టుబెట్టింది. ఆ తర్వాత దాన్ని మెల్లగా చీకట్లోకి లాక్కెళ్లిపోయింది.

క్యాంపస్‌లో భయాందోళనలు

క్యాంపస్ పక్కనే అటవీ ప్రాంతం (Sanjay Gandhi National Park) ఉండటంతో గతంలో కూడా పొవై ఏరియాలో చిరుతలు కనిపించిన దాఖలాలు ఉన్నాయి. కానీ, ఈసారి ఏకంగా స్టాఫ్ హాస్టల్ లాంటి రెసిడెన్షియల్ ఏరియాలోకి వచ్చి ఇలా దాడికి పాల్పడటం స్థానికులను తీవ్రంగా కలవరపెడుతోంది.

ఈ వీడియో చూసిన తర్వాత క్యాంపస్‌లోని విద్యార్థులు, ప్రొఫెసర్లు, ఇతర సిబ్బంది ప్రాణభయంతో వణికిపోతున్నారు. ముఖ్యంగా రాత్రి పూట బయట తిరగాలంటేనే జంకుతున్నారు. క్యాంపస్‌లో నివసించే మనుషులతో పాటు, పెంపుడు జంతువుల భద్రతపై ఇప్పుడు తీవ్ర ఆందోళన వ్యక్తమవుతోంది. అధికారులు వెంటనే స్పందించి తగిన భద్రతా చర్యలు తీసుకోవాలని రెసిడెంట్స్ కోరుతున్నారు.

A Leopard Entered IIT Bombay Campus at Staff Hostel and Viciously Attacked a Dog Caught on CCTV Camera😳 pic.twitter.com/bsfcUvBTXS

— Ghar Ke Kalesh (@gharkekalesh) June 19, 2026