Emotional Monkey Video Viral | కంటతడి పెట్టిస్తున్న వీడియో: ఏళ్ల తరబడి అన్నం పెట్టిన అవ్వ మరణం.. మృతదేహాన్ని పట్టుకుని వెక్కి వెక్కి ఏడ్చిన కోతి

Emotional Monkey Video Viral | త్రినేత్ర.న్యూస్ : మనుషులకు చేసిన మేలు మర్చిపోతారేమో కానీ, మూగజీవాలకు చూపే చిన్నపాటి ప్రేమను అవి జీవితాంతం గుర్తుపెట్టుకుంటాయి. వాటికి మాటలు రాకపోవచ్చు కానీ, వాటిలో ఉండే కృతజ్ఞతా భావం మనుషుల కంటే ఎన్నో రెట్లు గొప్పది. ఈ వాస్తవాన్ని మరోసారి నిరూపించే ఒక హృదయ విదారక వీడియో ప్రస్తుతం నెట్టింట వైరల్ అవుతోంది. తనకు ఏళ్ల తరబడి కడుపునిండా అన్నం పెట్టిన ఒక వృద్ధురాలి మరణాన్ని తట్టుకోలేక ఓ కోతి కన్నీరు పెట్టుకున్న తీరు ప్రతి ఒక్కరినీ కంటతడి పెట్టిస్తోంది.

అసలేం జరిగిందంటే..

కర్ణాటక రాష్ట్రం, రాయర దొడ్డి ప్రాంతానికి చెందిన 85 ఏళ్ల వృద్ధురాలు పార్వతమ్మ వయోభారంతో అనారోగ్యానికి గురై సోమవారం కన్నుమూశారు. పార్వతమ్మకు మూగజీవాలంటే ఎంతో ఇష్టం. తన ఇంటి పరిసరాల్లోకి వచ్చే కోతులకు ఆమె రోజూ క్రమం తప్పకుండా ఆహారం పెడుతూ వాటి ఆలనా పాలనా చూసేవారు. చాలామంది కోతులను ఒక బెడదగా భావించి తరిమేస్తుంటే.. పార్వతమ్మ మాత్రం వాటిని తన సొంత బిడ్డల్లా, తోడుగా భావించి ప్రేమను పంచేవారు. ఈ క్రమంలో ఆ వానరాలతో ఆమెకు విడదీయరాని అనుబంధం ఏర్పడింది.

కన్నీరు పెట్టిస్తున్న తుది వీడ్కోలు

పార్వతమ్మ మరణవార్త తెలుసుకున్న బంధువులు, గ్రామస్థులు ఆమెకు తుది వీడ్కోలు పలికేందుకు ఇంటి వద్దకు చేరుకున్నారు. ఇంతలో ఎవరూ ఊహించని విధంగా ఒక కోతి అక్కడికి వచ్చింది. అది ఆహారం కోసం వెతకలేదు, జనాలను చూసి భయపడలేదు. ఎంతో ప్రశాంతంగా, మౌనంగా నడుచుకుంటూ వచ్చి పార్వతమ్మ మృతదేహం పక్కన కూర్చుంది.

ఆ తర్వాత పార్వతమ్మ మృతదేహంపై పడి గట్టిగా హత్తుకుంది. తన తలను ఆమె తలకేసి ఆనించి కళ్లు మూసుకుని విలపించింది. తనకు ప్రాణంగా చూసుకున్న అవ్వతో బహుశా అదే తన చివరి క్షణం అని ఆ మూగజీవికి అర్థమైనట్లుంది. ఆ దృశ్యం చూసి అక్కడున్న వారంతా కన్నీటి పర్యంతమయ్యారు.

సోషల్ మీడియాలో నెటిజన్ల ఎమోషనల్ కామెంట్స్

మనిషికి, జంతువుకు మధ్య ఉన్న ఈ అద్భుతమైన బంధాన్ని బంధువులు వీడియో తీసి సోషల్ మీడియాలో పోస్ట్ చేయగా, అది కాస్తా వైరల్‌గా మారింది. ఈ వీడియో చూసిన నెటిజన్లు తీవ్ర భావోద్వేగానికి గురవుతున్నారు.

"ఆ కోతి ఆమెను హత్తుకున్న విధానం చూస్తుంటే, ప్రేమకు భాషతో, జాతితో సంబంధం లేదని అర్థమవుతోంది" అని ఒక నెటిజన్ కామెంట్ చేశారు.

"నిజమైన మనుషులు అంటే ఈ జంతువులే" అని మరొకరు కామెంట్ చేశారు.

"దయ, జాలి అనేది ఒక విత్తనం లాంటిది. అది మొలకెత్తితే, ఆ బంధాన్ని మరణం కూడా విడదీయలేదు అనడానికి ఈ ఘటనే నిదర్శనం" అని ఇంకొకరు భావోద్వేగపూరితంగా స్పందించారు.

'కేరళ హచికో' గుర్తుందిగా..

మనిషి మరణించిన తర్వాత కూడా జంతువులు ప్రేమ చూపించడం ఇదే తొలిసారి కాదు. 2023లో కేరళలోని కన్నూర్‌లో కూడా ఇలాంటి ఘటనే జరిగింది. తన యజమాని చనిపోయి మార్చురీలో ఉండటంతో, ఆయన కోసం ఒక పెంపుడు కుక్క (దీనిని కేరళ హచికో అని పిలిచారు) ఏకంగా నాలుగు నెలల పాటు ఆసుపత్రి మార్చురీ బయటే పడిగాపులు కాసింది. 'యజమాని ఇంకా ఇక్కడే ఉన్నాడు, తనకోసం బయటకు వస్తాడు' అన్న ఆశతో ఆ కుక్క నాలుగు నెలల పాటు అక్కడి నుంచి కదల్లేదు.

తాజాగా కర్ణాటకలో వెలుగుచూసిన ఈ కోతి ఘటన కూడా, జంతువుల స్వచ్ఛమైన ప్రేమను, కృతజ్ఞతను ప్రపంచానికి చాటిచెబుతోంది.

Monkey Mourns Elderly Woman Who Fed It For Years In Karnataka, Emotional Video Viral pic.twitter.com/tqUWn1ocFE

— NDTV (@ndtv) April 1, 2026