Telangana World Bank Report | తెలంగాణ ఆర్థిక స్థితిపై వరల్డ్ బ్యాంక్ సంచలన రిపోర్ట్

• తెలంగాణకు వరల్డ్ బ్యాంక్ అరుదైన గుర్తింపు
• వరల్డ్ బ్యాంక్ రిపోర్ట్‌తో బట్టబయలైన కాంగ్రెస్ అబద్ధాలు
• రేవంత్‌పై కేటీఆర్ ఫైర్
• కేసీఆర్ పాలనపై కేటీఆర్ సంచలన వ్యాఖ్యలు

Telangana World Bank Report | త్రినేత్ర.న్యూస్ : పదేళ్ల కాలంలో తెలంగాణ సాధించిన అసాధారణ ఆర్థిక ప్రగతికి అంతర్జాతీయ స్థాయిలో అరుదైన గుర్తింపు లభించింది. రాష్ట్రాన్ని 'ఎగువ మధ్య-ఆదాయ' (Upper-Middle-Income) ఆర్థిక వ్యవస్థల జాబితాలో చేరుస్తూ ప్రపంచ బ్యాంక్ తాజాగా కీలక ప్రకటన చేసింది. ఈ రిపోర్ట్ ఆధారంగా బీఆర్ఎస్ వర్కింగ్ ప్రెసిడెంట్ కేటీఆర్.. మాజీ సీఎం కేసీఆర్ దార్శనికతను కొనియాడుతూనే, ప్రస్తుత కాంగ్రెస్ ప్రభుత్వంపై తీవ్ర స్థాయిలో విరుచుకుపడ్డారు.

కేసీఆర్ దార్శనికతకు దక్కిన గ్లోబల్ గుర్తింపు

2025-26 ఆర్థిక సంవత్సరానికి గాను తెలంగాణ తలసరి ఆదాయం రూ.4.19 లక్షలకు (సుమారు 5,407 డాలర్లు) చేరుకుందని కేటీఆర్ తెలిపారు. ఈ అద్భుతమైన మైలురాయిని సాధించిన భారతీయ రాష్ట్రాల్లో తెలంగాణ ఒకటి కావడం గర్వకారణమన్నారు. ఇది కేవలం ఒక మ్యాజిక్ ఫిగర్ కాదని.. దశాబ్దాల పాటు నిర్లక్ష్యానికి గురైన రాష్ట్రాన్ని పదేళ్ల వ్యవధిలోనే దేశంలో అత్యంత వేగంగా అభివృద్ధి చెందుతున్న సంపన్న రాష్ట్రంగా మార్చిన కేసీఆర్ (KCR) అడ్మినిస్ట్రేషన్‌కు దక్కిన రియల్ సక్సెస్ అని ఆయన స్పష్టం చేశారు.

గేమ్ చేంజర్‌గా మారిన ఆ పథకాలు

ఇతర రాష్ట్రాల మాదిరిగా తెలంగాణకు మొదటి నుంచి పారిశ్రామిక అనుకూలతలు లేవని, కేవలం లీడర్‌షిప్ విజన్, సాహసోపేతమైన సంస్కరణల వల్లే ఈ అద్భుతం సాధ్యమైందని కేటీఆర్ వివరించారు. టీఎస్-ఐపాస్ (TS-iPASS) ద్వారా పారిశ్రామిక అనుమతుల్లో విప్లవాత్మక మార్పులు తెచ్చి భారీగా ఇన్వెస్ట్‌మెంట్స్ ఆకర్షించామన్నారు.

"దీనికి తోడు కాళేశ్వరం ప్రాజెక్టు, మిషన్ కాకతీయ, రైతుబంధు వంటి ప్రతిష్టాత్మక స్కీమ్స్.. రాష్ట్రంలో అగ్రికల్చర్, ఇండస్ట్రియల్ సెక్టార్స్‌ను పరుగులు పెట్టించి ఉపాధి అవకాశాలకు బలమైన పునాది వేశాయి. రొటీన్ సిస్టమ్‌ను (Status Quo) చాలెంజ్ చేసే సంస్కర్త, రిజల్ట్స్ రాబట్టే కార్యదక్షుడు కేసీఆర్ అని వరల్డ్ బ్యాంక్ రిపోర్ట్ ప్రూవ్ చేసింది." అని కేటీఆర్ కొనియాడారు.

సీఎం రేవంత్‌కు కేటీఆర్ స్ట్రాంగ్ కౌంటర్

ఇదే క్రమంలో ప్రస్తుత కాంగ్రెస్ ప్రభుత్వంపై కేటీఆర్ ఫైర్ అయ్యారు. ఎన్నికల హామీలను అమలు చేయలేక, తమ ఫెయిల్యూర్స్‌ను కవర్ చేసుకునేందుకు సీఎం రేవంత్ రెడ్డి (CM Revanth Reddy) తెలంగాణను 'దివాలా తీసిన రాష్ట్రం'గా ప్రచారం చేస్తున్నారని మండిపడ్డారు.

రాష్ట్రం ఆర్థిక సంక్షోభంలో ఉందంటూ పదేపదే చెబుతున్న అబద్ధాలు.. వరల్డ్ బ్యాంక్ ఇచ్చిన తాజా ఎకనామిక్ ఇండికేటర్స్ సాక్షిగా బట్టబయలయ్యాయని ఆయన ఎద్దేవా చేశారు. బీఆర్ఎస్ (BRS) హయాంలో వేసిన బలమైన ఆర్థిక పునాదుల వల్లే తెలంగాణ ఈ స్థాయిలో నిలబడిందని కేటీఆర్ నొక్కిచెప్పారు. దార్శనికతతో రాష్ట్రాన్ని ప్రగతి పథంలో నడిపించిన తమకు.. తప్పుడు ప్రచారాలతో పబ్బం గడుపుకుంటున్న ప్రస్తుత ప్రభుత్వానికి మధ్య ఉన్న తేడాను తెలంగాణ ప్రజలు గమనిస్తున్నారని ఆయన స్పష్టం చేశారు.