Google | వినియోగ‌దారుల‌కు షాకిచ్చిన గూగుల్‌.. యూజ‌ర్ల డేటాతో ఏఐ మోడ‌ల్స్ ట్రెయినింగ్‌..?

Google | గూగుల్‌కు చెందిన సేవ‌ల‌ను మీరు త‌ర‌చూ ఉప‌యోగిస్తున్నారా.. అయితే మీ డేటాను ఉప‌యోగించి గూగుల్ త‌న ఏఐ ప్లాట్‌ఫామ్‌కు ట్రెయినింగ్ ఇస్తోంది. ఈ విష‌యం చాలా మందికి తెలియ‌దు. ముఖ్యంగా గూగుల్ సెర్చ్ లేదా లెన్స్‌, ట్రాన్స్‌లేట్ వంటి సేవ‌ల‌ను త‌ర‌చూ ఉప‌యోగిస్తుంటే వాటిల్లో మీ డేటాను గూగుల్ త‌న ఏఐ ట్రెయినింగ్ కోసం వాడే అవ‌కాశం అధికంగా ఉంద‌ని టెక్ నిపుణులు చెబుతున్నారు. ఈ డేటా ప్ర‌స్తుతం గూగుల్ ఏఐ మోడ‌ల్స్‌కు వ‌రంగా మారింది. దీంతో యూజ‌ర్ల‌కు తెలియ‌కుండానే ఈ ప్ర‌క్రియ జ‌రుగుతోంది. అయితే యూజ‌ర్లు తమ డేటాను ఏఐ వాడ‌కుండా అడ్డుకోవ‌చ్చు. ట్రెయినింగ్ కోసం ఉప‌యోగించ‌కుండా ముందుగానే ప‌లు సెట్టింగ్స్‌ను మార్చుకోవాల్సి ఉంటుంది. దీంతో గూగుల్ మీ డేటాను ఏఐ ట్రెయినింగ్ కోసం వాడదు. ఇక అందుకు అనుస‌రించాల్సిన స్టెప్స్ ఇలా ఉన్నాయి.

యూజ‌ర్ల‌కు నియంత్ర‌ణ‌..

యూజ‌ర్లు త‌మ డేటాను ఏఐ ట్రెయినింగ్ కోసం వాడాలా, వ‌ద్దా అనే విష‌యంపై నియంత్ర‌ణ‌ను క‌లిగి ఉంటారు. అందువ‌ల్ల ఆ సెట్టింగ్స్‌ను వ‌ద్ద‌నుకుంటే ఆఫ్ చేయ‌వ‌చ్చు. ముందుగా సెర్చ్ సర్వీసెస్ హిస్టరీ, సెర్చ్ సర్వీసెస్ పర్సనలైజేషన్ సెట్టింగ్‌లకు వెళ్లాలి. సెర్చ్ సర్వీసెస్ హిస్టరీలో సేవ్ మీడియా అనే ఆప్షన్ కనిపిస్తుంది. అవసరమైతే దీనిని విడిగా ఆఫ్ చేయవచ్చు. లేదా సెర్చ్ సర్వీసెస్ హిస్టరీతోపాటు రెండింటినీ పూర్తిగా ఆఫ్ చేయవచ్చు. అక్కడే గూగుల్ మీ డేటాను ఎంతకాలం భద్రపరచాలో కూడా నిర్ణయించుకోవచ్చు. మూడు నెలలు, 18 నెలలు లేదా 36 నెలల ఆటో డిలీట్ ఆప్ష‌న్‌లు అందుబాటులో ఉంటాయి. మీ అవసరానికి అనుగుణంగా ఒకదాన్ని ఎంచుకోవచ్చు. అదే సమయంలో వెబ్ అండ్ యాప్ యాక్టివిటీ, టైమ్‌లైన్, యూట్యూబ్ హిస్టరీ వంటి ఇతర ప్రైవసీ సెట్టింగ్‌లను కూడా ఒకసారి పరిశీలించడం మంచిది.

రెండు భాగాల్లోనూ..

అయితే సేవ్ మీడియాను ఆఫ్ చేయడం మాత్రమే సరిపోదు. గూగుల్ మీ సెర్చ్ హిస్టరీ, లొకేషన్, మీరు సందర్శించే వెబ్‌సైట్ల వివరాలను కూడా వ్యక్తిగతీకరణ కోసం ఉపయోగిస్తుంది. ముఖ్యంగా మీకు కనిపించే ప్రకటనలపై ఇవి ప్రభావం చూపుతాయి. అయితే ఇటీవ‌ల గూగుల్ ఇచ్చిన అప్ డేట్ కు ముందు వెబ్ అండ్ యాప్ యాక్టివిటీ సెట్టింగ్‌ల ద్వారానే సెర్చ్ డేటాను నియంత్రించే అవకాశం ఉండేది. ఇప్పుడు ఆ వ్యవస్థను రెండు భాగాలుగా విభజించారు. ఒకటి పాత వెబ్ అండ్ యాప్ యాక్టివిటీ కాగా మరొకటి కొత్త సెర్చ్ డేటా సెట్టింగ్. ఈ కొత్త సెట్టింగ్ డిఫాల్ట్‌గా ఆన్‌లో ఉంటుంది. అందువల్ల గతంలో వెబ్ అండ్ యాప్ యాక్టివిటీని ఆఫ్ చేసిన వారు పూర్తిగా డేటా సేకరణ నిలిచిపోయిందని భావిస్తే అది సరైంది కాదు. గూగుల్ సెర్చ్ యాక్టివిటీ నుంచి పూర్తిగా తప్పుకోవాలంటే కొత్త సెర్చ్ సర్వీసెస్ హిస్టరీ సెట్టింగ్‌ను కూడా విడిగా పరిశీలించి అవసరమైతే ఆఫ్ చేయాల్సి ఉంటుంది. ఇలా ఏఐ కోసం మీ డేటాను గూగుల్ వాడ‌కుండా జాగ్ర‌త్త ప‌డ‌వ‌చ్చు.

ఏదైనా గూగుల్ సేవ‌ను వాడి ఉంటే..

గూగుల్ సెర్చ్, గూగుల్ లెన్స్ లేదా గూగుల్ ట్రాన్స్‌లేట్‌ను ఇటీవల ఉపయోగించి ఉంటే, మీకు తెలియకుండానే మీ డేటా ప్రస్తుతం గూగుల్ ఏఐ మోడళ్లకు ట్రైనింగ్ కోసం ఇప్ప‌టికే వినియోగంలో ఉండే అవకాశం ఉంది. ముఖ్యంగా చాలా మంది వినియోగదారులను నేరుగా అడగకుండానే ఈ మార్పు అమల్లోకి వచ్చినట్లు తెలుస్తోంది. గూగుల్ తన ప్రైవసీ సెట్టింగ్‌లలో చేసిన కొత్త మార్పులతో, వినియోగదారుల ఫొటోలు, ఫైళ్లు, ఆడియో, వీడియో రికార్డింగ్‌లతోపాటు మరింత‌ డేటాను భద్రపరచి, తన ఏఐ మోడళ్లను మెరుగుపరచేందుకు ఉపయోగించుకునే అవకాశం కల్పించింది. సరళంగా చెప్పాలంటే, ఇటీవల మీరు గూగుల్ సెర్చ్ సేవల్లో ఏదైనా ఫొటో, ఆడియో లేదా ఇతర మీడియాను అప్‌లోడ్ చేసి ఉంటే, అది ఇప్పటికే గూగుల్ ఏఐ ట్రైనింగ్ ప్రక్రియలో భాగమై ఉండే అవ‌కాశం ఉంటుంది. మీరు స్వయంగా ఈ ఆప్షన్‌ను ఆఫ్ చేయకపోతే, మీ డేటా వినియోగానికి అవకాశం ఉంటుంది.

ఈ-మెయిల్‌లో చెప్పింది, ప్ర‌చారం చేయ‌లేదు..

అయితే ఈ మార్పును గూగుల్ పెద్దగా ప్రచారం చేయలేదు. జూన్ నెలలో వినియోగదారులకు పంపిన ఒక ఈ-మెయిల్ ద్వారా మీ సేవ్ చేసిన హిస్టరీ, వ్యక్తిగత సిఫార్సులపై మరింత నియంత్రణ కల్పిస్తున్నామని తెలిపింది. కానీ వాస్తవానికి చాలా మంది వినియోగదారులను డిఫాల్ట్‌గా విస్తృతమైన డేటా సేకరణ వ్యవస్థలోకి చేర్చినట్లు సమాచారం. ఈ మార్పులో భాగంగా గూగుల్ రెండు కొత్త సెట్టింగ్‌లను ప్రవేశపెట్టింది. వాటిలో ఒకటి సెర్చ్ సర్వీసెస్ హిస్టరీ, మరొకటి పర్సనలైజ్డ్ రికమెండేషన్స్. ఈ రెండు సెట్టింగ్‌లు కలిసి, మీ యాక్టివిటీని గూగుల్ సేవలను వ్యక్తిగతీకరించడానికి ఎలా ఉపయోగిస్తుందో, అలాగే మీ డేటాను ఎంతకాలం భద్రపరచి తర్వాత తొలగిస్తుందో నిర్ణయిస్తాయి. ఈ మార్పు కేవలం గూగుల్ సెర్చ్‌కే పరిమితం కాదు. గూగుల్ మ్యాప్స్, షాపింగ్, ఫ్లైట్స్, హోటల్స్, ట్రాన్స్‌లేట్, గూగుల్ న్యూస్ వంటి సేవలన్నింటికీ ఇది వర్తిస్తుంది. అందువల్ల చాలా మంది ఊహించిన దానికంటే దీని ప్రభావం ఎక్కువగా ఉంటుంది. ఉదాహరణకు, గూగుల్ లెన్స్‌తో ఏదైనా వస్తువును గుర్తించేందుకు ఫొటో తీస్తే, ఆ చిత్రం ఏఐ ట్రైనింగ్ కోసం సేవ్ అయ్యే అవకాశం ఉంటుంది.

ఆడియో, ఫొటోలు, వీడియోలు..

గూగుల్ యాప్‌లో సెర్చ్ లైవ్ ద్వారా వాయిస్‌తో సెర్చ్ చేస్తే, ఆ వాయిస్ రికార్డింగ్ కూడా స్టోర్ అవుతుంది. అలాగే గూగుల్ ట్రాన్స్‌లేట్‌లో ఉచ్చారణ సాధన కోసం మాట్లాడిన ఆడియో కూడా సేవ్ అయ్యే అవకాశం ఉంటుంది. అయితే దీనిని గూగుల్ పూర్తిగా గోప్యంగా ఉంచ‌లేదు. వినియోగదారులకు పంపిన ఈ-మెయిల్‌లో, సేవ్ చేసిన మీడియాను గూగుల్ సేవలు, ఏఐ మోడళ్లు, భద్రతా వ్యవస్థలను మెరుగుపరచడానికి ఉపయోగిస్తామని స్పష్టంగా పేర్కొంది. గూగుల్ హెల్ప్ డాక్యుమెంటేషన్‌లో కూడా సేవ్ చేసిన హిస్టరీ జనరేటివ్ ఏఐ మోడళ్లకు ట్రైనింగ్ ఇవ్వడానికి, అవసరమైన చోట మానవ సమీక్షకుల సహాయంతో ఉపయోగిస్తామ‌ని పేర్కొంది. కొన్ని సందర్భాల్లో ఈ డేటాను తాత్కాలికంగా మాత్రమే నిల్వ చేసినా, గూగుల్ అంగీకరించినట్లుగా సేవ్ చేసిన మీడియాను ప్రత్యేకంగా ఏఐ ట్రైనింగ్ కోసం కూడా నిల్వ ఉంచుతుంది. ఇదే వినియోగదారులు ఎక్కువగా గమనించాల్సిన అంశం.

అన్ని కంపెనీల్లోనూ స‌హ‌జంగానే..

అయితే ఇది కేవలం గూగుల్‌కు సంబంధించిన విషయం మాత్రమే కాదు. ప్రస్తుతం టెక్నాలజీ రంగంలో జరుగుతున్న పెద్ద మార్పులో భాగం. గతంలో ఏఐ మోడళ్లకు ట్రైనింగ్ ఇవ్వడానికి కంపెనీలు ప్రధానంగా ఇంటర్నెట్‌లో అందుబాటులో ఉన్న ఓపెన్ వెబ్ డేటాను ఉపయోగించేవి. ఇప్పుడు మాత్రం వినియోగదారులు రోజువారీగా యాప్‌లలో స్వచ్ఛందంగా అప్‌లోడ్ చేసే ఫొటోలు, వీడియోలు, ఆడియో, ఇతర కంటెంట్‌పై ఎక్కువగా ఆధారపడుతున్నాయి. మెటా కూడా ఇదే తరహా విధానాన్ని అనుసరిస్తోంది. వినియోగదారుల ఫొటోలు, ఇతర మీడియా, అలాగే తన ఏఐ గ్లాసెస్ ద్వారా సేకరించిన కంటెంట్‌ను కూడా ఏఐ ట్రైనింగ్‌కు ఉపయోగిస్తోంది. అంటే ఇది ఒక్క గూగుల్‌కే పరిమితం కాకుండా, పెద్ద టెక్ కంపెనీల్లో వేగంగా, సాధారణంగా మారుతున్న ధోరణిగా కనిపిస్తోంది. అందువ‌ల్ల వినియోగ‌దారులు త‌మ డేటాకు ప్రైవ‌సీ ఉండాలంటే ఆయా సెట్టింగ్ ల‌ను ఆఫ్ చేయ‌డం మంచిది.