Telangana Irrigation Projects | ప్రాజెక్టులకు పూర్వ వైభవం.. జలాశయాల్లో డీసిల్టేషన్‌పై మంత్రి ఉత్తమ్ ఫోకస్, అధికారులకు కీలక ఆదేశాలు

Telangana Irrigation Projects | త్రినేత్ర.న్యూస్ : తెలంగాణలోని ప్రధాన నీటిపారుదల ప్రాజెక్టులు (Irrigation projects), జలాశయాల్లో పేరుకుపోయిన పూడికను పక్కా శాస్త్రీయ పద్ధతిలో తొలగించేందుకు రాష్ట్ర ప్రభుత్వం సిద్ధమైంది. ఈ మేరకు బుధవారం హైదరాబాద్‌లో నిర్వహించిన ఉన్నతస్థాయి సమీక్షలో నీటిపారుదల, పౌరసరఫరాల శాఖ మంత్రి ఎన్. ఉత్తమ్ కుమార్ రెడ్డి అధికారులకు కీలక ఆదేశాలు జారీ చేశారు. భవిష్యత్తులో వరద ముప్పును నివారించడంతో పాటు, ప్రాజెక్టుల నీటి నిల్వ సామర్థ్యాన్ని పెంచేలా స్థిరమైన నమూనాతో ముందుకు వెళ్లాలని స్పష్టం చేశారు.

బెస్ట్ ప్రాక్టీసెస్‌పై స్టడీ చేయాలి..

జలాశయాల్లో పూడికతీత (Desilting) పనుల కోసం ఇతర రాష్ట్రాల్లో అమలు చేస్తున్న ఉత్తమ విధానాలను (Best practices) ముందుగా అధ్యయనం చేయాలని మంత్రి సూచించారు. గోదావరి, కృష్ణా నదీ పరివాహక ప్రాంతాల్లోని రిజర్వాయర్ల ఒరిజినల్ స్టోరేజ్ కెపాసిటీని పునరుద్ధరించేందుకు కేంద్ర ప్రభుత్వ మార్గదర్శకాలను తెలంగాణ పరిస్థితులకు అనుగుణంగా అన్వయించుకోవాలన్నారు.

నిర్లక్ష్యం చేస్తే భారీ మూల్యం..

సకాలంలో పూడికతీత, డ్రైనేజీ సిస్టమ్స్‌ను మెరుగుపరచకపోతే ఎదురయ్యే నష్టాలను మంత్రి అధికారులకు వివరించారు. పూడికతీతను నిర్లక్ష్యం చేయడం వల్లే గత ఏడాది పంజాబ్ వరదల్లో 16 జిల్లాలు మునిగిపోయాయని, దాదాపు రూ. 2,000 కోట్ల నష్టం వాటిల్లిందని గుర్తు చేశారు. అదే సమయంలో, 2017లో కేరళలోని మంగళం డ్యామ్‌లో సైంటిఫిక్ పద్ధతిలో పూడికతీతను సక్సెస్‌ఫుల్‌గా నిర్వహించి ఆర్థిక ప్రయోజనాలు పొందారని, ఇలాంటి సక్సెస్ మోడల్స్‌ను (Success models) మనం ఫాలో అవ్వాలని సూచించారు.

ఆ ప్రాజెక్టుల పనులు స్పీడప్ చేయండి..

ప్రస్తుతం కడెం ప్రాజెక్టు, లోయర్ మానేరు డ్యామ్ (LMD), మిడ్ మానేరు (MMR) జలాశయాల్లో జరుగుతున్న డీసిల్టేషన్ పనుల పురోగతిని మంత్రి ఉత్తమ్ సమీక్షించారు. పనుల నిర్వహణలో ఎదురవుతున్న అడ్డంకులను వెంటనే తొలగించి, ప్రాక్టికల్ సొల్యూషన్స్‌తో స్పీడ్ పెంచాలని ఆదేశించారు.

ఎస్‌ఆర్‌ఎస్‌పీ, నిజాంసాగర్‌పై స్పెషల్ రిపోర్ట్..

శ్రీరాంసాగర్ (SRSP), నిజాంసాగర్ ప్రాజెక్టుల నీటి నిల్వ సామర్థ్యాన్ని (Storage capacity) తిరిగి పొందేందుకు, అక్కడ ఉన్న పూడిక పరిస్థితిపై కాంప్రహెన్సివ్ రిపోర్ట్ (Comprehensive report) ఇవ్వాలని సంబంధిత చీఫ్ ఇంజినీర్లను మంత్రి ఆదేశించారు. రాష్ట్రవ్యాప్తంగా సాగే ఈ పూడిక తొలగింపు కార్యక్రమాలకు ఇంజినీర్-ఇన్-చీఫ్ (O&M) నేతృత్వం వహిస్తారని ఆయన స్పష్టం చేశారు. ఈ సమీక్షలో నీటిపారుదల శాఖ ప్రిన్సిపల్ సెక్రటరీ ఇ. శ్రీధర్, గనుల శాఖ ప్రిన్సిపల్ సెక్రటరీ శ్రీధర్, ఈఎన్సీ ఓ. రమేశ్ బాబు తదితరులు పాల్గొన్నారు.