TRS vs TRS | క‌విత పార్టీపై ఈసీకి టీఆర్ఎస్ ఫిర్యాదు.. కార‌ణం ఇదే..!

TRS vs TRS | త్రినేత్ర‌.న్యూస్ : క‌ల్వ‌కుంట్ల క‌వితకు ఆదిలోనే ఊహించ‌ని షాక్ ఎదురైంది. కొత్త పార్టీ ప్ర‌క‌టించిన నాలుగు రోజుల‌కే క‌విత పార్టీపై టీఆర్ఎస్ పార్టీ ఫిర్యాదు చేసింది. దీంతో క‌వితతో పాటు ఆ పార్టీ శ్రేణులు తీవ్ర గంద‌ర‌గోళానికి గుర‌వుతున్న‌ట్లు స‌మాచారం. ఇప్ప‌టికే క‌విత పార్టీపై బీఆర్ఎస్ నిప్పులు గ‌క్కుతున్న‌ట్లు స‌మాచారం. బీఆర్ఎస్ పార్టీ కూడా రేపోమాపో కేంద్ర ఎన్నిక‌ల సంఘానికి ఫిర్యాదు చేసేందుకు సిద్ధ‌మైన‌ట్లు వార్త‌లు వినిపిస్తున్నాయి. టీఆర్ఎస్‌పై బీఆర్ఎస్ కూడా ఫిర్యాదు చేస్తే.. క‌వితకు ఈ వ్య‌వ‌హారం మ‌రింత త‌ల‌నొప్పిగా మారే అవ‌కాశం ఉంది.

ఫిర్యాదుకు కార‌ణం ఇదే..!

తెలంగాణ రాజ్య స‌మితి(టీఆర్ఎస్) పార్టీ 2023లో సికింద్రాబాద్ అడ్ర‌స్‌తో రిజిస్ట‌ర్ అయింది. ఈ పార్టీ అధ్య‌క్షుడు తుపాకుల బాల‌రంగం. ఇక క‌విత పార్టీ పేరు తెలంగాణ రాష్ట్ర సేన‌(టీఆర్ఎస్).. బాల‌రంగం పార్టీ పేరు కూడా తెలంగాణ రాజ్య స‌మితి(టీఆర్ఎస్).. పేర్లు వేరు అయిన‌ప్ప‌టికీ.. అబ్రివేష‌న్లు ఒకే మాదిరిగా ఉండ‌డం స‌మ‌స్య‌గా మారింది. దీంతో త‌మ టీఆర్ఎస్ పార్టీకి డ్యామేజ్ అవుతుంద‌ని, ఈ నేప‌థ్యంలో క‌విత పార్టీ పేరు రిజిస్ట‌ర్ చేయొద్దంటూ కేంద్ర ఎన్నిక‌ల సంఘానికి ఈ నెల 27న బాల‌రంగం లేఖ రాశారు. తెలంగాణ రాష్ట్ర సేన పేరుతో కల్వకుంట్ల కవిత సొంత పార్టీని పెట్టుకుంటున్నట్లు ప్రకటించారని ఆ లేఖలో ప్రస్తావించారు. తెలంగాణ రాజ్య సమితి పేరుతో (టీఆర్ఎస్) పార్టీని దాదాపు నాలుగేండ్లుగా తాను నిర్వహిస్తున్నానని, టీఆర్ఎస్ అనే మూడు అక్షరాల అబ్రివేషన్ (ఆక్రోనిమ్)పై తనకు హక్కులు ఉన్నాయని పేర్కొన్నారు.