TPCC Chief Mahesh Goud | గాంధీ భవన్‌కు పిలిచినా రాలేదు.. అధిష్టానానికి తేల్చి చెప్పిన పీసీసీ చీఫ్

• మంత్రి వర్సెస్ ఎమ్మెల్యే రగడపై ఏఐసీసీకి మహేష్ గౌడ్ నివేదిక

TPCC Chief Mahesh Goud | త్రినేత్ర న్యూస్ : తెలంగాణ కాంగ్రెస్‌లో అంతర్గత కుమ్ములాటలు, నేతల మధ్య పెరుగుతున్న మాటల యుద్ధం పార్టీ అధిష్టానం గడపకు చేరింది. ఇటీవల ఢిల్లీ పర్యటనలో మంత్రి దామోదర రాజనర్సింహ, జుక్కల్ ఎమ్మెల్యే తోట లక్ష్మీకాంతరావు మధ్య చోటుచేసుకున్న ఘర్షణ సహా పలువురు నేతల వివాదాస్పద వ్యాఖ్యలపై టీపీసీసీ అధ్యక్షుడు బొమ్మ మహేష్ కుమార్ గౌడ్ తీవ్ర ఆగ్రహం వ్యక్తం చేశారు. ఈ మొత్తం వ్యవహారంపై ఆయన ఏఐసీసీ (AICC)కి సమగ్ర నివేదిక సమర్పించినట్లు విశ్వసనీయ వర్గాల సమాచారం.

పిలిచినా రాలేదు.. హైకమాండ్ ముందు పెడుతున్నా

వివాదంలో ఉన్న నేతలను స్వయంగా గాంధీ భవన్‌కు పిలిపించి మాట్లాడేందుకు ప్రయత్నించినా వారు హాజరుకాలేదని మహేష్ గౌడ్ తీవ్ర అసంతృప్తి వ్యక్తం చేసినట్లు తెలుస్తోంది. క్రమశిక్షణ ఉల్లంఘిస్తూ పార్టీ ప్రతిష్టను దెబ్బతీసేలా ప్రవర్తించడమే కాకుండా, పీసీసీ ఇచ్చిన పిలుపును కూడా లెక్కచేయకపోవడంపై ఆయన అధిష్టానానికి రాసిన లేఖలో ప్రత్యేకంగా ప్రస్తావించారు. "నేను పిలిచినా రాలేదు.. అందుకే ఈ వ్యవహారాన్ని నేరుగా ఏఐసీసీ పెద్దల ముందే ఉంచుతున్నాను" అని ఆయన పేర్కొన్నట్లు సమాచారం.

నిధుల వివాదాలు.. బహిరంగ విమర్శలు

మంత్రి, ఎమ్మెల్యే మధ్య వివాదంతో పాటు రాష్ట్రంలోని పలు నియోజకవర్గాల్లో పార్టీ నేతల మధ్య నెలకొన్న గ్రూపు విభేదాలను సైతం ఈ నివేదికలో పొందుపరిచారు. ప్రధానంగా..

• నిధుల కేటాయింపు, అభివృద్ధి పనులపై జడ్చర్ల ఎమ్మెల్యే అనిరుధ్ రెడ్డి చేసిన కామెంట్లు
• మునుగోడు ఎమ్మెల్యే కోమటిరెడ్డి రాజగోపాల్ రెడ్డి ఇటీవల చేసిన బహిరంగ వ్యాఖ్యలు
• ఎంపీ గడ్డం వంశీకృష్ణకు సంబంధించిన వివాదాస్పద వ్యవహారాలు

ఈ పరిణామాలు ప్రభుత్వ ఇమేజ్‌పై, పార్టీ క్యాడర్ నైతిక స్థైర్యంపై ఎలాంటి ప్రభావం చూపుతున్నాయో నివేదికలో స్పష్టంగా వివరించారు.

క్రమశిక్షణపై పీసీసీ నజర్.. హైకమాండ్ నిర్ణయంపై ఉత్కంఠ

అధికారంలో ఉన్న వేళ ప్రభుత్వ సంక్షేమ పథకాలను ప్రజల్లోకి బలంగా తీసుకెళ్లాల్సిన సమయంలో, ఇలాంటి అంతర్గత విభేదాలు పార్టీని రక్షణలో పడేస్తున్నాయని మహేష్ గౌడ్ ఏఐసీసీ పెద్దల వద్ద ఆందోళన వ్యక్తం చేశారు. పార్టీ లైన్ దాటిన వారిపై కఠిన చర్యలు తీసుకోవాల్సిందేనని తేల్చిచెప్పారు. ఈ నివేదికపై అధిష్టానం ఎలాంటి క్రమశిక్షణా చర్యలు తీసుకుంటుందోనన్న అంశం ఇప్పుడు రాష్ట్ర రాజకీయ వర్గాల్లో తీవ్ర ఉత్కంఠ రేపుతోంది.