Telangana drought 2026 | ఎల్‌నినో ఎఫెక్ట్.. కరువు కోరల్లో తెలంగాణ.. రైతులకు ఎకరాకు రూ.50 వేల నష్టపరిహారం?

• తెలంగాణను కరువు రాష్ట్రంగా ప్రకటించండి
• సీఎం రేవంత్‌కు సీపీఎం లేఖ
• ఎకరాకు రూ.50 వేల పరిహారం, ఉచిత రేషన్ కిట్‌కు డిమాండ్

Telangana drought 2026 | త్రినేత్ర న్యూస్ : ఎల్ నినో (El Niño) ప్రభావంతో తెలంగాణ రాష్ట్రం తీవ్ర సంక్షోభంలో కూరుకుపోయిందని, ప్రభుత్వం కేవలం కొన్ని మండలాలకే పరిమితం కాకుండా రాష్ట్రం మొత్తాన్ని వెంటనే కరువు ప్రాంతంగా ప్రకటించాలని సీపీఐ(ఎం) డిమాండ్ చేసింది. ఈ మేరకు సోమవారం పార్టీ రాష్ట్ర కార్యదర్శి జాన్ వెస్లీ.. ముఖ్యమంత్రి ఎనుముల రేవంత్ రెడ్డికి సమగ్ర వినతిపత్రం రాశారు. కేంద్రం నుంచి రూ.50,000 కోట్ల ప్రత్యేక కరువు నిధులు సాధించేందుకు తక్షణమే అఖిలపక్ష బృందాన్ని ఢిల్లీకి తీసుకెళ్లాలని కోరారు.

365 మండలాలే కాదు.. రాష్ట్రమంతా కరువు ప్రకటించాలి

ఇటీవల ప్రభుత్వం జారీ చేసిన జీవో నెం. 03 (G.O.Ms.No.03) ప్రకారం 31 జిల్లాల్లోని 365 మండలాలను మాత్రమే కరువు ప్రాంతాలుగా ప్రకటించడం సరికాదని సీపీఎం పేర్కొంది. వర్షాభావం వల్ల నాగార్జునసాగర్, శ్రీశైలం వంటి కీలక ప్రాజెక్టుల్లో నీటిమట్టాలు అడుగంటిపోయాయని, భూగర్భ జలాలు ఇంకిపోయి సాగు, తాగునీరు, విద్యుత్ ఉత్పత్తి తీవ్ర ప్రమాదంలో పడ్డాయని ఆవేదన వ్యక్తం చేసింది. పల్లెల్లో తాగునీటి ఎద్దడి, పశుగ్రాసం కొరత తీవ్రమవుతున్నందున రాష్ట్రంలోని అన్ని మండలాలు, పట్టణాలను అధికారికంగా కరువు ప్రాంతాలుగా నోటిఫై చేయాలని కోరింది.

ఎకరాకు రూ.50 వేల నష్టపరిహారం.. రూ.2 లక్షల రుణమాఫీ

పంట నష్టాన్ని శాస్త్రీయంగా అంచనా వేసి అన్నదాతలను ఆదుకోవాలని పార్టీ కోరింది.

నష్టపోయిన వాణిజ్య పంటలకు ఎకరాకు రూ.50,000, ఇతర పంటలకు రూ.30,000 నేరుగా రైతుల ఖాతాల్లో (DBT పద్ధతిలో) జమ చేయాలి.

రైతులు, డ్వాక్రా మహిళలు, ఎస్సీ, ఎస్టీ, బీసీ, మైనారిటీలకు చెందిన రూ.2 లక్షల లోపు పంట, ఇతర రుణాలను పూర్తి స్థాయిలో మాఫీ చేయాలి. డ్వాక్రా రుణాలపై ఏడాది పాటు వడ్డీ లేని మోరటోరియం ప్రకటించాలి.

పంటలు వేయలేని స్థితిలో ఉన్న రైతులకు కూడా రైతు భరోసా, పీఎం కిసాన్ నిధులు వర్తింపజేయాలి. 5 ఎకరాల లోపు రైతులకు రైతు భరోసా రెట్టింపు చేయడంతో పాటు, కౌలు రైతులకు ఎకరాకు రూ.15,000 ఆర్థిక సాయం అందించాలి.

తెల్ల రేషన్ కార్డుదారులకు 14 రకాల సరుకులతో ఉచిత కిట్

ఓవైపు బహిరంగ మార్కెట్లో కిలో బియ్యం ధర రూ.100కి చేరడం, నిత్యావసరాలు భగ్గుమనడంతో సామాన్య ప్రజలు బతుకు భారంగా మారిందని లేఖలో ప్రస్తావించారు.

ప్రస్తుతం ఇస్తున్న సన్నబియ్యం కోటాను వ్యక్తికి 6 కిలోల నుంచి 12 కిలోలకు పెంచాలి.

తెల్ల రేషన్ కార్డుదారులందరికీ బియ్యం, కందిపప్పు, వంటనూనె, గోధుమపిండి, చక్కెర, చింతపండు సహా 14 రకాల నిత్యావసర వస్తువులతో కూడిన 'ఉచిత కరువు ఉపశమన కిట్' పంపిణీ చేయాలి.

గ్రామాల్లో పేదలు, వృద్ధుల దాహార్తి, ఆకలి తీర్చేందుకు ఉచిత రాగి జావ, మజ్జిగ అందించే భోజన కేంద్రాలు ప్రారంభించాలి.

ఉపాధి కూలీ రూ.800కి పెంపు.. 3-ఫేజ్ విద్యుత్ సరఫరా

గ్రామాల నుంచి వలసలను నివారించేందుకు ఉపాధి హామీ పనిదినాలను 200 రోజులకు, రోజువారీ కూలీని రూ.800కి పెంచాలని డిమాండ్ చేశారు. పంటలు ఎండిపోకుండా వ్యవసాయ బోర్లకు లో-వోల్టేజ్ సమస్యలు లేకుండా నిరంతరాయంగా నాణ్యమైన 3-ఫేజ్ కరెంట్ ఇవ్వాలని, వ్యవసాయ కూలీలకు ఏడాదికి రూ.12,000 భరోసా సాయం విడుదల చేయాలని కోరారు.

ఆడంబర ఖర్చులకు బ్రేక్.. ప్రభుత్వ పొదుపు చర్యలు

తీవ్ర సంక్షోభం నెలకొన్న వేళ ప్రభుత్వ ఖర్చుల్లో ఆడంబరాలకు స్వస్తి పలకాలని సీపీఎం హితవు పలికింది. మంత్రులు, ఉన్నతాధికారుల కాన్వాయ్ ఖర్చులు, విలాసవంతమైన కొత్త వాహనాలు, ఆఫీస్ ఫర్నిచర్ కొనుగోళ్లు, విందులు, ప్రకటనల ప్రచార వ్యయాలను తక్షణమే తగ్గించుకోవాలని సూచించింది. ప్రభుత్వ భవనాలు ఖాళీగా ఉండగా అద్దె భవనాల్లో కొనసాగుతున్న ప్రభుత్వ కార్యాలయాలను వెంటనే సొంత భవనాల్లోకి మార్చి, ఆ పొదుపు మొత్తాన్ని కరువు బాధితుల సహాయక చర్యలకు మళ్లించాలని స్పష్టం చేసింది.