Telangana Tourism Policy 2025 | తెలంగాణ టూరిజంలో నయా జోష్: వెయ్యి రోజుల పాలనలో రూ.22 వేల కోట్ల పెట్టుబడులు!

Telangana Tourism Policy 2025 | త్రినేత్ర.న్యూస్ : సీఎం రేవంత్ రెడ్డి (CM Revanth Reddy) నేతృత్వంలోని ప్రజా ప్రభుత్వం 1000 రోజులు పూర్తి చేసుకున్న సందర్భంగా.. తెలంగాణ పర్యాటక రంగం (Tourism Sector) మునుపెన్నడూ లేని స్థాయిలో దూసుకుపోతోంది. పర్యాటక, సాంస్కృతిక శాఖ మంత్రి జూపల్లి కృష్ణారావు విడుదల చేసిన తాజా ప్రగతి నివేదిక ప్రకారం.. రాష్ట్రం గ్లోబల్ టూరిజం హబ్‌గా రూపాంతరం చెందుతోంది.

కొత్త పాలసీ.. భారీ పెట్టుబడులు

తెలంగాణ నూతన పర్యాటక విధానం (Tourism Policy 2025–30) ద్వారా పర్యాటకులను ఆకర్షించడంలో దేశంలోనే టాప్-5 టూరిజం డెస్టినేషన్‌గా రాష్ట్రాన్ని నిలపాలని ప్రభుత్వం లక్ష్యంగా పెట్టుకుంది. రాష్ట్ర ఆదాయంలో టూరిజం వాటాను 10 శాతానికి పెంచేలా ప్రణాళికలు రచించారు. ఈ క్రమంలో తెలంగాణ టూరిజం కాంక్లేవ్, గ్లోబల్ సమ్మిట్ ద్వారా ఏకంగా రూ.22,324 కోట్ల పెట్టుబడుల ప్రతిపాదనలను ప్రభుత్వం ఆకర్షించింది. వీటి ద్వారా సుమారు 90 వేల మందికి ప్రత్యక్ష, పరోక్ష ఉపాధి (Employment) లభించనుంది. 2025లో 78 టూరిజం ప్రాజెక్టులు పూర్తి కాగా, మరో 45 ప్రాజెక్టులు వివిధ దశల్లో ఉన్నాయి.

టూరిజం 2.0 అండ్ వీకెండ్ వండర్స్

పర్యాటకులకు సరికొత్త అనుభూతిని పంచేందుకు "Tourism 2.0" కింద ఆధ్యాత్మిక, ఎకో-వెల్‌నెస్, హెరిటేజ్ క్లస్టర్లను (Clusters) అభివృద్ధి చేస్తున్నారు. వీకెండ్ టూరిజం కింద రాష్ట్రవ్యాప్తంగా 142 ప్రాంతాలను "100 Weekend Wonders" పేరుతో ప్రమోట్ చేస్తున్నారు. కేంద్ర ప్రభుత్వ సహకారంతో రూ. 275 కోట్లతో రామప్ప, బుద్ధవనం, అనంతగిరి, సోమశిల తదితర ప్రాంతాల్లో ప్రత్యేక ప్రాజెక్టులు వేగంగా జరుగుతున్నాయి.

గ్లోబల్ బ్రాండింగ్ - 'జరూర్ ఆనా'

అంతర్జాతీయ స్థాయిలో తెలంగాణ బ్రాండ్ ఇమేజ్ పెంచేందుకు "Zaroor Aana" (తప్పక రండి) అనే క్యాంపెయిన్‌తో ప్రచారం హోరెత్తిస్తున్నారు. లండన్, బెర్లిన్, మాస్కో, థాయ్‌లాండ్ వంటి గ్లోబల్ వేదికలపై మన టూరిజం సత్తా చాటుతోంది. ఫిల్మ్ టూరిజాన్ని (Film Tourism) ప్రోత్సహించేందుకు "Film in Telangana" అనే డిజిటల్ ప్లాట్‌ఫామ్ ద్వారా సింగిల్ విండో విధానాన్ని అమలు చేస్తున్నారు.

పెరిగిన పర్యాటకులు - హరిత హోటళ్ల జోరు

రాష్ట్రానికి వచ్చే పర్యాటకుల సంఖ్య ఏటేటా రికార్డు స్థాయిలో పెరుగుతోంది. 2026 ఆగస్టు నాటికే 7.71 కోట్ల మంది దేశీయ, 1.24 లక్షల మంది విదేశీ టూరిస్టులు తెలంగాణను సందర్శించారు. పర్యాటకుల సౌకర్యార్థం టీజీటీడీసీ (TGTDC) ఆధ్వర్యంలో 29 హరిత హోటళ్లను పకడ్బందీగా నిర్వహిస్తున్నారు. హుస్సేన్ సాగర్‌లో కొత్తగా 120 సీట్ల డబుల్ డెక్కర్ క్రూయిజ్ "ముచుకుంద"ను ప్రారంభించడంతో పాటు, 2026లో ఎలక్ట్రిక్ ఓపెన్-టాప్ డబుల్ డెక్కర్ టూరిస్ట్ బస్సులను కొనుగోలు చేసే ప్రక్రియకు శ్రీకారం చుట్టారు. జాతీయ స్థాయిలోనూ ఉత్తమ హెరిటేజ్, క్యూలినరీ అవార్డులను దక్కించుకుని తెలంగాణ పర్యాటక రంగం నయా జోష్‌తో సాగుతోంది.