KPHB Open Plots Auction | కేపీహెచ్‌బీలో హాట్ కేకుల్లా ఓపెన్ ప్లాట్లు.. గజం ఏకంగా రూ.2.70 లక్షలు

• కూకట్‌పల్లి (KPHB) ఫేజ్-7లో 16 ఎంఐజీ ఓపెన్ ప్లాట్లకు బుధవారం జరిగిన వేలంలో రికార్డు ధరలు
• అత్యధికంగా ఒక చదరపు గజం భూమి ధర రూ. 2.70 లక్షలు పలికిన వైనం
• ఈ ఓపెన్ ఆక్షన్ ద్వారా హౌసింగ్ బోర్డుకు సుమారు రూ. 47.14 కోట్ల భారీ ఆదాయం
• కనీస ధర గజానికి రూ. 1.60 లక్షలు కాగా, సగటున రూ. 1.79 లక్షల ధర లభించిందని తెలిపిన వైస్ ఛైర్మన్ వీపీ గౌతం

KPHB Open Plots Auction | త్రినేత్ర.న్యూస్ : హైదరాబాద్ రియల్ ఎస్టేట్ (Real Estate) మార్కెట్‌లో కూకట్‌పల్లి హౌసింగ్ బోర్డు (KPHB) భూములకు ఉన్న క్రేజ్ మరోసారి రుజువైంది. ఎటువంటి వివాదాలు లేని, అన్ని మౌలిక వసతులున్న కేపీహెచ్‌బీ ఫేజ్-7లోని 16 ఎంఐజీ (MIG) ఓపెన్ ప్లాట్లకు బుధవారం నిర్వహించిన బహిరంగ వేలంలో రికార్డు స్థాయి ధరలు పలికాయి.

పోటీపడ్డ బిడ్డర్లు.. రికార్డు బ్రేక్ చేసిన ధరలు

ఆగస్టు 10న విడుదల చేసిన నోటిఫికేషన్ ప్రకారం జరిగిన ఈ వేలంలో (Auction).. తమకు నచ్చిన ప్లాట్లను దక్కించుకోవడానికి మొత్తం 19 మంది బిడ్డర్లు (Bidders) తీవ్రంగా పోటీపడ్డారు. హౌసింగ్ బోర్డు గజం కనీస ధర రూ. 1.60 లక్షలుగా నిర్ణయించగా, అత్యధికంగా ఒక ప్లాట్ గజానికి రూ. 2.70 లక్షల చొప్పున అమ్ముడుపోయి సరికొత్త రికార్డు సృష్టించింది. మరో ప్లాట్‌ను ఒకరు గజం రూ. 2.36 లక్షలకు కొనుగోలు చేయగా, ఇంకో రెండు ప్లాట్లను రూ. 2.06 లక్షలకు బిడ్డర్లు సొంతం చేసుకున్నారు.

బోర్డుకు కాసుల వర్షం

పూర్తి పారదర్శకంగా సాగిన ఈ ఆక్షన్‌లో సగటున చదరపు గజం ధర సుమారు రూ. 1.79 లక్షలు పలికిందని హౌసింగ్ బోర్డు వైస్ ఛైర్మన్ వి.పి. గౌతం వెల్లడించారు. ప్లాట్లకు భారీ డిమాండ్ ఏర్పడటంతో, ఈ ఒక్క వేలం ద్వారానే హౌసింగ్ బోర్డుకు ఏకంగా రూ. 47.14 కోట్ల భారీ ఆదాయం సమకూరిందని ఆయన వివరించారు.