Telangana SIR Portal | తెలంగాణ ఓటర్లకు బిగ్ రిలీఫ్: SIR పోర్టల్‌లో కొత్త అప్‌డేట్.. ఆ 11 డాక్యుమెంట్లు అప్‌లోడ్ చేసుకోవచ్చు!

Telangana SIR Portal | త్రినేత్ర.న్యూస్ : తెలంగాణలోని ఓటర్ల (Voters) కోసం రాష్ట్ర ఎన్నికల ప్రధాన అధికారి (CEO) ఒక కీలక నిర్ణయం తీసుకున్నారు. ఆన్‌లైన్ ఓటరు వెరిఫికేషన్ కోసం ఉద్దేశించిన స్పెషల్ ఇంటెన్సివ్ రివిజన్ (SIR) పోర్టల్‌లో ఉన్న టెక్నికల్ అడ్డంకులను తొలగించారు. ఇకపై SIR నోటీసులు అందుకున్న ఓటర్లు తమ వద్ద ఉన్న 11 రకాల అధికారిక డాక్యుమెంట్లలో దేనినైనా నేరుగా ఆన్‌లైన్‌లో అప్‌లోడ్ చేసి, ఎలాంటి ఆటంకాలు లేకుండా తమ ఓటు హక్కును కాపాడుకోవచ్చు.

పాత సిస్టమ్‌తో వచ్చిన ఇబ్బందులు ఏంటి?

గతంలో ఆన్‌లైన్ పోర్టల్‌లో తమ వివరాలు వెరిఫై చేసుకునేందుకు యూజర్లకు కేవలం 3 ఆప్షన్లు మాత్రమే ఉండేవి. బర్త్ సర్టిఫికెట్, ఎడ్యుకేషనల్ సర్టిఫికెట్ (టెన్త్ మెమో), పాస్‌పోర్ట్ ఉంటేనే అప్‌లోడ్ చేయడానికి వీలుండేది. అయితే, గ్రామీణ ప్రజలు, నిరక్షరాస్యులు, వృద్ధుల వద్ద ఈ డాక్యుమెంట్లు ఉండకపోవడంతో వారు ఆన్‌లైన్ సేవలు వినియోగించుకోలేక ఇబ్బందులు పడేవారు. ఈ డిజిటల్ అడ్డంకిని హం ఫౌండేషన్‌కు (Hum Foundation) చెందిన న్యాయవాదులు నేహా అమ్రీన్, ఖుద్సియా తబస్సుమ్.. CEO దృష్టికి తీసుకెళ్లారు. దీనికి స్పందించిన అధికారులు వెంటనే పోర్టల్‌లోని డ్రాప్‌డౌన్ మెనూను (dropdown menu) అప్‌డేట్ చేశారు.

ఆన్‌లైన్‌లో అప్‌లోడ్ చేయగల 11 డాక్యుమెంట్లు ఇవే..

తాజా అప్‌డేట్ తర్వాత కింద పేర్కొన్న డాక్యుమెంట్లలో దేనినైనా అప్‌లోడ్ (Upload) చేయొచ్చు

ప్రభుత్వ ఉద్యోగి/పెన్షనర్ ఐడీ కార్డు: కేంద్ర, రాష్ట్ర ప్రభుత్వాలు లేదా పీఎస్‌యూలు జారీ చేసినవి.

1987 నాటి పత్రాలు: జూలై 1, 1987కి ముందు బ్యాంకులు, పోస్టాఫీసులు, ఎల్ఐసీ లేదా స్థానిక సంస్థలు జారీ చేసిన అధికారిక పత్రాలు.

బర్త్ సర్టిఫికెట్ (Birth Certificate): మున్సిపల్ లేదా గ్రామ పంచాయతీ అధికారులు జారీ చేసిన జనన ధ్రువీకరణ.

ఇండియన్ పాస్‌పోర్ట్ (Passport): వ్యాలిడిటీ ఉన్న పాస్‌పోర్ట్.

ఎడ్యుకేషనల్ సర్టిఫికెట్: గుర్తింపు పొందిన బోర్డుల నుంచి పొందిన టెన్త్ మెమో లేదా మార్క్‌షీట్లు.

నివాస ధ్రువీకరణ (Residence Certificate): ప్రభుత్వం జారీ చేసిన శాశ్వత నివాస ధ్రువీకరణ పత్రం.

అటవీ హక్కుల సర్టిఫికెట్: గిరిజన, అటవీ ప్రాంత వాసులకు ఇచ్చే పత్రాలు.

కుల ధ్రువీకరణ పత్రం (Caste Certificate): ఎస్సీ, ఎస్టీ, ఓబీసీ కమ్యూనిటీ సర్టిఫికెట్లు.

ఫ్యామిలీ రిజిస్టర్: స్థానిక అధికారుల వద్ద ఉండే ఎన్ఆర్‌సీ లేదా ఫ్యామిలీ రిజిస్టర్ పత్రాలు.

పట్టా/అలాట్‌మెంట్ పత్రాలు: ప్రభుత్వం జారీ చేసిన ఇల్లు లేదా భూమికి సంబంధించిన పత్రాలు.

ఓటరు జాబితా ఆధారాలు: పాత ఎలక్టోరల్ రోల్ (Electoral Roll) కు సంబంధించిన ఆధారాలు.

ఈ మార్పుతో ఓటర్లకు కలిగే లాభం ఏంటి?

కేవలం మూడు డాక్యుమెంట్లకు మాత్రమే పరిమితం చేయడం వల్ల తలెత్తిన టెక్నికల్ సమస్య ఇప్పుడు పూర్తిగా పరిష్కారమైంది. అర్హులైన వృద్ధులు, గ్రామీణ ఓటర్లు కేవలం బర్త్ సర్టిఫికెట్ లేదన్న కారణంతో తమ ఓటును కోల్పోయే ప్రమాదం ఇక లేదు. అంతేకాకుండా, సరైన డాక్యుమెంట్ లేదని భయపడి ఎన్నికల ఆఫీసుల చుట్టూ (in-person visits) తిరగాల్సిన శ్రమ కూడా తప్పింది. ఈ అప్‌డేట్ వల్ల ఓటర్ల వివరాలు గల్లంతు కాకుండా రక్షించబడతాయని, అర్హులైన ప్రతి పౌరుడికి న్యాయం జరుగుతుందని న్యాయవాది నేహా అమ్రీన్ హర్షం వ్యక్తం చేశారు.