Leprosy Cases | రాష్ట్రంలో మ‌ళ్లీ విజృంభిస్తున్న‌ కుష్టు.. కొత్త‌గా 2500 కేసులు

Leprosy Cases | త్రినేత్ర‌.న్యూస్‌: రాష్ట్రంలో మ‌ళ్లీ కుష్టు వ్యాధి (Leprosy) క‌ల‌క‌లం సృష్టిస్తున్న‌ది. 2005లో కుష్టు వ్యాధి నిర్మూల‌న ద‌శ‌కు చేరుకున్నామ‌ని ప్ర‌భుత్వాలు ప్ర‌క‌టించినప్ప‌టికీ.. ఈ మ‌హ‌మ్మారి బారిన‌ప‌డుతున్న వారి సంఖ్య రోజురోజుకు పెరుగుతూ వ‌స్తున్న‌ది. కొన్నేండ్లుగా వేల సంఖ్య‌లో కొత్త కేసులు (Leprosy Cases) న‌మోదుకావ‌డం ఆదోళ‌న క‌లిగిస్తున్న‌ది. ప్ర‌భుత్వ గ‌ణాంకాల ప్ర‌కారం రాష్ట్రంలో 2024-25లో 2,376 కుష్టు వ్యాధి కేసులు నమోదు కాగా, 2025–-26 నాటికి ఈ సంఖ్య 2,592కు చేరింది. గతేడాది 85 మంది పిల్లల్లో వ్యాధి ల‌క్ష‌ల‌ణాలు కనిపించగా, ఈ ఏడాది వారి సంఖ్య 100కు పెరిగింది.

ఎలా వ‌స్తుందంటే..

మైకోబాక్టీరియం లెప్రా (Mycobacterium Leprae) అనే బ్యాక్టీరియా వల్ల కుష్టు వ‌స్తుంది. ఇది దీర్ఘకాలిక అంటువ్యాధి. ప్రధానంగా చర్మం, నరాలు, కళ్లపై ప్రభావం చూపుతుంది. చర్మంపై లేత రంగు, ఎర్రటి మచ్చలు రావడం ప్రధాన లక్షణాలు. చేతులు, కాళ్ల దగ్గర నరాలు గట్టిపడటం, తిమ్మిర్లు పట్టడం, చూపు మందగించడం వంటి లక్షణాలు కూడా ఉంటాయిన వైద్యులు తెలిపారు. వ్యాధి ఉన్న వ్యక్తి దగ్గినా, తుమ్మిన‌ప్పుడు ఇది ఇత‌రుల‌కు సోకుతుంది. అయితే, బాధితులతో ఎక్కువ కాలం సన్నిహితంగా ఉంటేనే ఇది సోకే ప్రమాదం ఉంటుందన్నారు. కుష్టు వ్యాధిని తొలి దశలోనే గుర్తించి చికిత్స తీసుకోవాల‌ని, లేన‌ట్ల‌యితే చేతులు, కాళ్ల వేళ్లు వంకర్లు పోవడం, స్పర్శ లేకపోవడం వల్ల కాళ్లకు అయ్యే గాయాలు పుండ్లుగా మారి పాదాలను తొలగించాల్సిన పరిస్థితి వస్తుంద‌ని హెచ్చ‌రించారు.

వ్యాధి నివారణకు ప్రభుత్వ హాస్పిటల్స్ ఉచిత చికిత్స అంటుబాటులో ఉందని చెప్పారు. వ్యాధి తీవ్రతను బట్టి 6 నుంచి 12 నెలల పాటు మందులు వాడితే ఈ మ‌హ్మారి నుంచి బయటపడవచ్చని తెలిపారు. మందులు వాడ‌టం ప్రారంభ‌మైన‌ప్ప‌టి నుంచి వ్యాధి ఇత‌రుల‌కు సోక‌డం త‌గ్గిపోతుంద‌ని వెల్ల‌డించారు.