US Bond Yield | అమెరికా బాండ్లపై అమ్మకాల ఒత్తిడి.. 24 ఏళ్ల గరిష్ఠానికి 30 ఏళ్ల బాండ్ ఈల్డ్..

US Bond Yield | అమెరికా 30 ఏళ్ల ప్రభుత్వ బాండ్ ఈల్డ్ బుధవారం కొత్త 24 ఏళ్ల గరిష్ఠానికి చేరుకుంది. ద్రవ్యోల్బణం పెరుగుదల, ప్రభుత్వ రుణభారం వంటి ఆందోళనలతో ప్రపంచ బాండ్ మార్కెట్లలో అమ్మకాల ఒత్తిడి మళ్లీ పెరిగింది. అంతకుముందు రోజు కొంత ఉపశమనం కనిపించినప్పటికీ, బుధవారం మళ్లీ బాండ్ల ఈల్డ్స్ పైకి ఎగబాకాయి. అమెరికా ఫెడరల్ రిజర్వ్ సెప్టెంబర్ సమావేశానికి సంబంధించిన మినిట్స్ విడుదలకు ముందు 30 ఏళ్ల ట్రెజరీ బాండ్ ఈల్డ్ స్వల్పకాలంలో 5.7041 శాతానికి చేరుకుంది. ఇది 24 ఏళ్లలో అత్యధిక స్థాయి కావడం గమనార్హం. పెట్టుబడిదారులు ఫెడ్ తదుపరి వడ్డీ రేటు నిర్ణయాలపై ఎలాంటి సంకేతాలు ఇస్తుందో తెలుసుకునేందుకు ఈ మినిట్స్ కోసం ఎదురుచూస్తున్నారు.

నేడు, రేపు వేలం..

ద్రవ్యోల్బణం, ప్రభుత్వ ఆర్థిక పరిస్థితులపై ఆందోళనలు కొనసాగుతుండడంతో ప్రపంచవ్యాప్తంగా ప్రభుత్వ బాండ్ల ఈల్డ్స్ మళ్లీ పెరిగాయి. దీనికి తోడు చమురు ధరలు కూడా మరోసారి పెరగడం మార్కెట్లపై ఒత్తిడిని పెంచింది. బ్రెంట్ క్రూడ్ ఆయిల్ ఫ్యూచర్స్ బుధవారం ఒక శాతానికి పైగా పెరిగి బ్యారెల్‌కు సుమారు 101.54 డాలర్ల వద్ద ట్రేడయ్యాయి. అమెరికా ట్రెజరీ బాండ్లకు పెట్టుబడిదారుల నుంచి ఎంత డిమాండ్ ఉందో తెలుసుకునేందుకు బుధవారం జరగనున్న 10 ఏళ్ల ట్రెజరీ బాండ్ వేలం కీలకంగా మారింది. గురువారం 30 ఏళ్ల ట్రెజరీ బాండ్ వేలం జరగనుంది. ఈ రెండు వేలాలు అధిక ఈల్డ్స్ నేపథ్యంలో అమెరికా ప్రభుత్వ బాండ్లపై పెట్టుబడిదారుల ఆసక్తికి మరో కీలక పరీక్షగా నిలవనున్నాయి.

అమెరికా బాండ్ ఈల్డ్స్ పెరగడం ప్రపంచ మార్కెట్లకు ప్రతికూల సంకేతంగా పరిగణిస్తారు. ముఖ్యంగా అమెరికా బాండ్లపై అధిక రాబడి లభిస్తే, పెట్టుబడిదారులు రిస్క్ ఉన్న ఈక్విటీ మార్కెట్ల నుంచి నిధులను అమెరికా ప్రభుత్వ సెక్యూరిటీల వైపు మళ్లించే అవకాశం ఉంటుంది. దీంతో భారత సహా ప్రపంచ స్టాక్ మార్కెట్లపై అమ్మకాల ఒత్తిడి మరింత పెరిగే అవకాశం ఉంటుంది.