Uttam Kumar Reddy | కాళేశ్వరంపై ఎవరికీ ‘క్లీన్ చిట్’ రాలేదు.. ఆ తీర్పుతో సీబీఐ విచారణ ఆగదు: మంత్రి ఉత్తమ్ కుమార్ రెడ్డి

Uttam Kumar Reddy | త్రినేత్ర.న్యూస్ : కాళేశ్వరం ప్రాజెక్టు (Kaleshwaram Project) అవకతవకలపై దర్యాప్తు చేసేందుకు రాష్ట్ర ప్రభుత్వం ఏర్పాటు చేసిన జస్టిస్ పీసీ ఘోష్ (Justice P.C. Ghose) కమిషన్ విచారణ నివేదికపై హైకోర్టు ఇచ్చిన తీర్పుపై రాష్ట్ర నీటిపారుదల, పౌరసరఫరాల శాఖ మంత్రి ఉత్తమ్ కుమార్ రెడ్డి (Uttam Kumar Reddy) స్పందించారు. ఈ తీర్పుతో ప్రాజెక్టులో జరిగిన అవకతవకలకు బాధ్యులైన వారెవరికీ కోర్టు 'క్లీన్ చిట్' ఇవ్వలేదని ఆయన ఒక ప్రకటనలో స్పష్టం చేశారు. తీర్పు కాపీని పూర్తిగా పరిశీలించిన తర్వాత తదుపరి చర్యలపై ప్రభుత్వం నిర్ణయం తీసుకుంటుందని వెల్లడించారు.

కమిషన్ ఏర్పాటు చట్టబద్ధమేనన్న కోర్టు

హైకోర్టు తీర్పులోని అంశాలను మంత్రి ఉత్తమ్ వివరిస్తూ.. కమిషన్ ఏర్పాటు కోసం ప్రభుత్వం జారీ చేసిన జీవో నెం.6 ను కొట్టివేయాలని పిటిషనర్లు కోరగా, కోర్టు అందుకు నిరాకరించిందని తెలిపారు. జ్యుడిషియల్ కమిషన్ ఏర్పాటును హైకోర్టు తప్పుబట్టలేదని, కమిషన్ ఆఫ్ ఇంక్వయిరీ చట్టం 1952లోని సెక్షన్ 3 ప్రకారం ఇది రాజ్యాంగబద్ధమేనని స్పష్టం చేసిందన్నారు. కమిషన్ ఏర్పాటు అసమంజసం, అక్రమం కాదని కోర్టు తేల్చి చెప్పిందని మంత్రి గుర్తుచేశారు.

అది కేవలం టెక్నికల్ అంశం మాత్రమే..

కొందరు బాధ్యులపై కమిషన్ చేసిన నిర్ధారణల విషయంలో హైకోర్టు తెలిపిన అభ్యంతరం కేవలం "సాంకేతికపరమైనది" (Technical) మాత్రమేనని మంత్రి వివరించారు. "పిటిషనర్లకు నిర్ణీత ఫార్మాట్ ప్రకారం నోటీసులు ఇవ్వలేదనే టెక్నికల్ అంశాన్ని మాత్రమే కోర్టు ప్రస్తావించింది. నోటీసులు ఇవ్వని కారణంగా, ఆ నివేదిక ఆధారంగా వారిపై చర్యలు తీసుకోవద్దని మాత్రమే రిలీఫ్ ఇచ్చింది" అని ఉత్తమ్ కుమార్ రెడ్డి స్పష్టం చేశారు.

సీబీఐ విచారణ ఆగదు.. దోషులకు శిక్ష తప్పదు

కాళేశ్వరం ప్రాజెక్టు కుంగిపోయిందన్నది అక్షర సత్యమని, డిజైన్ల నుంచి నిర్మాణం, నిర్వహణ వరకు అడుగడుగునా లోపాలు ఉన్నాయని మంత్రి ఆరోపించారు. అక్టోబర్ 21, 2023న మేడిగడ్డ బ్యారేజీలోని ఏడో బ్లాక్ ప్రజల కళ్లముందే కుంగిపోయిందని గుర్తుచేశారు. "లక్ష కోట్లతో కట్టిన ప్రాజెక్టు బీఆర్ఎస్ (BRS) ప్రభుత్వ హయాంలోనే, మూడేళ్లకే కుంగిపోయింది. ఈ లోపాలపై ఇప్పటికే విజిలెన్స్, ఎన్డీఎస్ఏ (NDSA), పీసీ ఘోష్ కమిషన్లు నివేదికలు ఇచ్చాయి. వీటి ఆధారంగా గత ఏడాది సెప్టెంబర్ 1వ తేదీనే సీబీఐ (CBI) విచారణకు ఆదేశిస్తూ జీవో ఇచ్చాము. ఇప్పుడు వచ్చిన హైకోర్టు తీర్పు సీబీఐ విచారణకు ఏమాత్రం అడ్డంకి కాదు" అని తేల్చి చెప్పారు.

దేశంలోనే అతిపెద్ద విధ్వంసం

రెండేళ్లుగా ఆ ప్రాజెక్టు నుంచి చుక్క నీరు రాకపోయినా, ఏటా రూ.15 వేల కోట్ల నుంచి రూ.20 వేల కోట్ల వరకు అప్పులు, వడ్డీలు భరిస్తున్నామని మంత్రి ఆవేదన వ్యక్తం చేశారు. కేవలం రెండు పిల్లర్లు మాత్రమే కాదు, మొత్తం మూడు బ్యారేజీల పునాదులు అనుమానాస్పదంగా ఉన్నాయని నిపుణులు తేల్చారన్నారు. ఇది పూర్తిగా మానవ తప్పిదమని, దేశంలోనే అతిపెద్ద విధ్వంసమని అభివర్ణించారు. ఇంతటి ప్రజాధనం వృథా కావడానికి కారణమైన బాధ్యులను ప్రజల ముందు నిలబెడతామని మంత్రి ఉత్తమ్ కుమార్ రెడ్డి స్పష్టం చేశారు.