Telangana Govt | సినిమా టికెట్‌ రేట్లు పెంచితే 20శాతం సంక్షేమానికి.. స‌ర్కారు కీల‌క ఆదేశాలు..!

Telangana Govt | సినిమా టికెట్‌ ధరల పెంపు ద్వారా వచ్చే అదనపు ఆదాయంలో 20 శాతాన్ని సంక్షేమ విరాళంగా తెలంగాణ ఫిల్మ్‌ డెవలప్‌మెంట్‌ కార్పొరేషన్‌ (TGFDC)కు చెల్లించాలని సినీ నిర్మాత‌ల‌ను రాష్ట్ర ప్రభుత్వం ఆదేశించింది. ఈ నిధులను తెలుగు చలనచిత్ర పరిశ్రమలో పనిచేస్తున్న ఉద్యోగుల సంక్షేమానికి వినియోగించనున్నట్లు స్పష్టం చేసింది. ప్రభుత్వ ఉత్తర్వుల ప్రకారం.. టికెట్‌ ధరల పెంపుతో లభించే అదనపు రాబడిపై 20 శాతం మొత్తాన్ని సంబంధిత చిత్రాల నిర్మాతలు ఎగ్జిబిటర్ల నుంచి వసూలు చేయాలి. అనంతరం ఆ మొత్తాన్ని తెలుగు చలనచిత్ర పరిశ్రమ ఉద్యోగుల సమాఖ్య సంక్షేమ సంఘం ఖాతాలో జమ చేయాల్సి ఉంటుంది.

ఈ ఖాతాను టీజీఎఫ్‌డీసీ పర్యవేక్షణలో నిర్వహించనున్నారు. ప్రస్తుతం ఈ నిబంధన ‘అఖండ-2’, ‘ది రాజాసాబ్‌’, ‘మన శంకర వర ప్రసాద్‌ గారు వస్తున్నారు’, ‘పెద్ది’ చిత్రాలకు వర్తించనుంది. ఆయా సినిమాల నిర్మాతలు ఎగ్జిబిటర్ల నుంచి 20 శాతం సంక్షేమ విరాళాన్ని సేకరించి ప్రభుత్వం నిర్దేశించిన ఖాతాలో జమ చేయాల్సి ఉంటుంది. ఈ మేరకు 14 రీల్స్‌ ప్లస్‌ ఎల్‌ఎల్‌పీ, పీపుల్‌ మీడియా ఫ్యాక్టరీ, షైన్‌ స్క్రీన్స్‌ ఇండియా, వృద్ధి సినిమాస్‌ సంస్థలకు ప్రభుత్వం లేఖలు పంపింది. టికెట్‌ ధరల పెంపుతో వచ్చిన అదనపు ఆదాయంలో నిర్ణయించిన 20 శాతం మొత్తాన్ని ఎగ్జిబిటర్ల నుంచి సేకరించి, టీజీఎఫ్‌డీసీ ద్వారా నిర్వహించే సంక్షేమ సంఘం ఖాతాలో జమ చేయాలని హోం శాఖ ఆదేశించింది. ఇందుకు అవసరమైన చర్యలు చేపట్టాలని సంబంధిత నిర్మాతలను కోరింది.