Telangana Junior Lecturers Sacked | నకిలీ సర్టిఫికెట్లతో కొలువులు: 35 మంది జూనియర్ లెక్చరర్లపై వేటు

• నియామకాలు రద్దు చేస్తూ ఉత్తర్వులు

Telangana Junior Lecturers Sacked | తెలంగాణ విద్యాశాఖలో నకిలీ సర్టిఫికెట్ల గుట్టు రట్టయింది. బోగస్ పీజీ (పోస్ట్ గ్రాడ్యుయేషన్) డిగ్రీలతో ఉద్యోగాలు క్రమబద్ధీకరించుకున్న 35 మంది జూనియర్ లెక్చరర్ల నియామకాలను ఇంటర్మీడియట్ విద్యా డైరెక్టరేట్ రద్దు చేస్తూ సంచలన నిర్ణయం తీసుకుంది. ఈ మేరకు సంబంధిత శాఖ డైరెక్టర్ అధికారిక ప్రొసీడింగ్స్ జారీ చేశారు.

కాంట్రాక్ట్ లెక్చరర్ల సర్వీసులను జీవో నం.16 నిబంధనల ప్రకారం ప్రభుత్వం క్రమబద్ధీకరించిన సమయంలో వీరంతా నకిలీ సర్టిఫికెట్లు సమర్పించినట్లు అధికారిక విచారణలో నిగ్గు తేలింది.

వర్సిటీలకు వెళ్లి పరిశీలిస్తే బట్టబయలైన బాగోతం

గతంలో కాంట్రాక్ట్ ప్రాతిపదికన పనిచేస్తున్న జూనియర్ లెక్చరర్లను ప్రభుత్వం రెగ్యులరైజ్ చేసినప్పటికీ.. వారి ఒరిజినల్ సర్టిఫికెట్ల సమగ్ర పరిశీలన షరతుకు లోబడే నియామక ఉత్తర్వులు జారీ అయ్యాయి. ఇందులో భాగంగా ఇంటర్మీడియట్ విద్యాశాఖ ప్రత్యేక బృందాలను ఏర్పాటు చేసి, లెక్చరర్లు డిగ్రీలు పొందినట్లు పేర్కొన్న విశ్వవిద్యాలయాలకు స్వయంగా పంపించి రికార్డులను క్షేత్రస్థాయిలో వెరిఫై చేయించింది.

ఈ తనిఖీల్లో పలువురు సమర్పించిన పీజీ సర్టిఫికెట్లు పూర్తిగా నకిలీవని (Forged and Fake), ఆయా విశ్వవిద్యాలయాలు తాము ఆ సర్టిఫికెట్లను జారీ చేయలేదని లిఖితపూర్వకంగా స్పష్టం చేశాయి.

రాంచీ యూనివర్సిటీ పేరుతో బోగస్ డిగ్రీ

నాగర్‌కర్నూల్ జిల్లా కల్వకుర్తి ప్రభుత్వ జూనియర్ కళాశాలలో ఎంఈటీ (M.E.T) విభాగంలో జూనియర్ లెక్చరర్‌గా పనిచేస్తున్న ఎం. రమాకాంత్ సమర్పించిన 'రాంచీ యూనివర్సిటీ' పీజీ సర్టిఫికెట్‌ను అధికారులు పరిశీలించగా అది ఫోర్జరీ పత్రమని తేలింది.

దీనిపై శాఖాపరంగా షోకాజ్ నోటీసు జారీ చేసి వివరణ కోరినప్పటికీ.. యూనివర్సిటీ ఇచ్చిన నిర్ధారణ నివేదిక ఆధారంగా ఆయన సమాధానం ఆమోదయోగ్యం కాదని అధికారులు తిరస్కరించారు.

ప్రొబేషన్ ఖరారు కాకపోవడంతో వేటు

సదరు లెక్చరర్లకు సంబంధించిన ప్రొబేషన్ పీరియడ్ ఇంకా అధికారికంగా డిక్లేర్ కాకపోవడంతో పాటు, నిబంధనల ప్రకారం వారు రెగ్యులర్ సర్వీస్ సభ్యులుగా ధ్రువీకరించబడలేదు. దాంతో నకిలీ పత్రాల ద్వారా నియామకం పొందిన వారిని సర్వీస్ నుంచి తప్పిస్తూ నియామక ఉత్తర్వులను పూర్తిగా రద్దు చేశారు.

ఈ వ్యవహారంలో తదుపరి చట్టపరమైన, శాఖాపరమైన చర్యలు తీసుకోవాలని సంబంధిత ఆర్జేడీ (RJD), డీఐఈవో (DIEO), ట్రెజరీ అధికారులకు ఆదేశాలు అందాయి. రాష్ట్రవ్యాప్తంగా ఇదే రీతిలో తప్పుడు పత్రాలతో ఉద్యోగాలు పొందిన మరికొందరిపై కూడా విచారణ కొనసాగుతోంది.