Telangana Drought Mandals List 2026 | తెలంగాణలో 365 కరువు మండలాలు: 31 జిల్లాల్లో తీవ్ర వర్షాభావం.. ఇదిగో లిస్ట్

Telangana Drought Mandals List 2026 | త్రినేత్ర న్యూస్ : రాష్ట్రంలో తీవ్ర వర్షాభావ పరిస్థితులు, ఎల్‌నినో ప్రభావంతో అల్లాడుతున్న రైతులకు సంబంధించి తెలంగాణ ప్రభుత్వం అత్యంత కీలక నిర్ణయం తీసుకుంది. 2026 ఖరీఫ్ సీజన్‌కు సంబంధించి రాష్ట్రంలోని 31 జిల్లాల పరిధిలోని 365 మండలాలను కరువు ప్రభావిత ప్రాంతాలుగా అధికారికంగా ప్రకటిస్తూ రెవెన్యూ (విపత్తుల నిర్వహణ) శాఖ ద్వారా రాష్ట్ర ప్రభుత్వ ప్రధాన కార్యదర్శి సంజయ్ జాజు జీవో ఎంఎస్ నెం.03 ఉత్తర్వులు జారీ చేశారు.

శాస్త్రీయ అధ్యయనం, రిమోట్ సెన్సింగ్ డేటా, క్షేత్రస్థాయి పరిశీలనల అనంతరం కేబినెట్ సబ్ కమిటీ చేసిన సిఫార్సుల మేరకు ఈ నోటిఫికేషన్ విడుదలైంది. ఈ కరువు ప్రకటన గెజిట్‌లో ప్రచురితమైన తేదీ నుంచి ఆరు నెలల పాటు అమల్లో ఉంటుందని ఉత్తర్వుల్లో పేర్కొన్నారు.

కరువు తీవ్రత ఇలా..

ప్రభుత్వం ప్రకటించిన మొత్తం 365 మండలాల్లో కరువు తీవ్రతను రెండు విభాగాలుగా విభజించారు.

తీవ్ర కరువు (Severe Drought): 111 మండలాలు

మధ్యస్థ కరువు (Moderate Drought): 254 మండలాలు

అవసరమైతే పరిస్థితులను బట్టి భవిష్యత్తులో అనుబంధ నోటిఫికేషన్ ద్వారా మరికొన్ని మండలాలను కూడా ఈ జాబితాలో చేర్చే అవకాశముందని ప్రభుత్వం తెలిపింది. పురపాలక, పట్టణ ప్రాంతాలను వ్యవసాయ కరువు నుంచి మినహాయించినప్పటికీ.. తాగునీటి సరఫరా అవసరాల పరంగా వాటిని కూడా కరువు ప్రాంతాలతో సమానంగా పరిగణిస్తారు.

ఎల్‌నినో ఎఫెక్ట్.. భారీగా తగ్గిన వరి సాగు

ఈ ఏడాది నైరుతి రుతుపవనాలపై ఎల్‌నినో తీవ్ర ప్రభావం చూపడంతో పాటు, బంగాళాఖాతంలో అల్పపీడనాలు బలహీనపడటమే ప్రస్తుత సంక్షోభానికి ప్రధాన కారణమని నివేదిక స్పష్టం చేసింది.

జూన్ 1 నుంచి సెప్టెంబర్ 30 వరకు రాష్ట్రంలో సాధారణ వర్షపాతం 740.6 మి.మీ కాగా, కేవలం 615.5 మి.మీ మాత్రమే నమోదైంది (17% లోటు).

రాష్ట్రంలోని మొత్తం 33 జిల్లాల్లో 18 జిల్లాలు వర్షాభావ లోటును ఎదుర్కొన్నాయి.

ఖరీఫ్ పంటల సాగు విస్తీర్ణం 139.28 లక్షల ఎకరాల నుంచి 126.06 లక్షల ఎకరాలకు పడిపోయింది.

ప్రత్యేకించి వరి సాగు విస్తీర్ణం ఏకంగా 18 శాతం తగ్గింది (గతంలో 69.19 లక్షల ఎకరాల నుంచి 57.00 లక్షల ఎకరాలకు పడిపోయింది).

ప్రధాన, మధ్యతరహా ప్రాజెక్టుల్లో మొత్తం 585 టీఎంసీల సామర్థ్యానికి గాను ప్రస్తుతం కేవలం 179.63 టీఎంసీల నీటి నిల్వలు మాత్రమే ఉండటం ఆందోళన కలిగిస్తోంది.

రైతులకు ఊరట: తక్షణ సహాయక చర్యలు

కరువు మండలాల్లో తక్షణమే సహాయక చర్యలు చేపట్టాలని అన్ని జిల్లాల కలెక్టర్లను ప్రభుత్వం ఆదేశించింది.

నేరుగా ఖాతాల్లోకి సబ్సిడీ: కేంద్రం నుంచి ఎన్‌డీఆర్‌ఎఫ్ (NDRF) నిధులు అందిన నెల రోజుల్లోగా నష్టపోయిన రైతుల ఖాతాల్లోకి డీబీటీ (DBT) పద్ధతిలో ఇన్‌పుట్ సబ్సిడీ జమ చేస్తారు.

రుణాల రీస్ట్రక్చరింగ్: ఆర్బీఐ నిబంధనల ప్రకారం వ్యవసాయ రుణాల రీస్ట్రక్చరింగ్ చేపట్టాలని, రైతుల నుంచి ఎలాంటి బలవంతపు రికవరీలు చేయకుండా ఎస్‌ఎల్‌బీసీ (SLBC)తో మాట్లాడాలని కలెక్టర్లకు స్పష్టం చేశారు.

ఉపాధి, తాగునీరు: గ్రామీణ ఉపాధి హామీ పథకం కింద అదనంగా 50 పనిదినాలు కల్పించడంతో పాటు తాగునీటి ఎద్దడి తలెత్తకుండా ఏర్పాట్లు చేయడం, అవసరమైన చోట పశుగ్రాసం డిపోలు, పశువుల శిబిరాలు ఏర్పాటు చేయాలని ఆదేశించారు.

కేంద్ర ప్రభుత్వం నుంచి ప్రత్యేక కరువు సాయం (NDRF) పొందేందుకు అవసరమైన పూర్తి మెమోరాండంను ఏడు రోజుల్లోగా కేంద్ర హోం, వ్యవసాయ శాఖలకు సమర్పించాల్సిందిగా ప్రణాళికా విభాగాన్ని ప్రభుత్వం ఆదేశించింది.

ముఖ్యమైన జిల్లాల్లో తీవ్ర కరువు (Severe) మండలాల వివరాలు

జోగులాంబ గద్వాల్ (మొత్తం 13 మండలాలు తీవ్ర కరువు): గద్వాల్, ధరూర్, ఇటిక్యాల, మల్దకల్, ఘట్టు, అయిజ, రాజోలి, వడ్డేపల్లి, మానవపాడు, ఉండవెల్లి, అలంపూర్, ఎర్రవల్లి, కాలూర్ తిమ్మానదొడ్డి.

నారాయణపేట (మొత్తం 13 మండలాలు తీవ్ర కరువు): నారాయణపేట, దామరగిద్ద, మగానూర్, కృష్ణ, మక్తల్, నర్వ, మరికల్, ధన్వాడ, గుండుమాల్, కోస్గి, మద్దూర్, ఉట్కూర్, కొత్తపల్లె.

నల్గొండ: నకిరేకల్, చండూరు, మర్రిగూడ, చింతపల్లి, నాంపల్లి, నిడమనూరు, దామరచర్ల, అడవిదేవులపల్లి, తిరుమలగిరి సాగర్, పెద్దవూర, దేవరకొండ, చందంపేట, మునుగోడు, నార్కట్‌పల్లి, శాలిగౌరారం తదితరాలు.

ఖమ్మం: సింగరేణి, కామేపల్లి, రఘునాథపాలెం, కుసుమంచి, నేలకొండపల్లి, ముదిగొండ, ఖమ్మం అర్బన్, బోనకల్, మధిర, ఎర్రుపాలెం.

వికారాబాద్: మార్పల్లి, నవాబ్‌పేట, కుల్కచర్ల, దోమ, బంట్వారం, పెద్దేముల్, తాండూరు, బషీరాబాద్, యాలాల, కొడంగల్, దౌలతాబాద్.

రంగారెడ్డి: గండిపేట్, రాజేంద్రనగర్, హయత్‌నగర్, అబ్దుల్లాపూర్‌మెట్, కొత్తూరు.

మేడ్చల్-మల్కాజిగిరి: కుత్బుల్లాపూర్, మేడిపల్లి, ఘట్‌కేసర్.