Telangana IVF Center Raids | అండాల సేకరణ అక్రమాలపై సర్కారు ఉక్కుపాదం.. 7 ఐవీఎఫ్ కేంద్రాలకు షోకాజ్ నోటీసులు

Telangana IVF Center Raids | త్రినేత్ర న్యూస్ : రాష్ట్రంలో అండాల (Eggs) సేకరణ ముసుగులో సాగుతున్న అక్రమ దందాలపై తెలంగాణ ప్రభుత్వం ఉక్కుపాదం మోపింది. ఈ వ్యవహారంపై సమగ్ర విచారణ జరిపి, నిబంధనలకు తూట్లు పొడుస్తున్న సంస్థలు, వ్యక్తులపై కఠిన చర్యలు తీసుకోవాలని వైద్య ఆరోగ్య, కుటుంబ సంక్షేమ శాఖ మంత్రి దామోదర రాజనర్సింహ అధికారులను ఆదేశించారు. మంత్రి ఆదేశాల మేరకు వైద్య ఆరోగ్య శాఖ రాష్ట్రవ్యాప్తంగా ఉన్న ఐవీఎఫ్ (IVF), ఏఆర్టీ (ART) కేంద్రాలపై ముమ్మర తనిఖీలు చేపట్టింది.

27 కేంద్రాల్లో తనిఖీలు పూర్తి.. 7 ఆసుపత్రుల్లో ఉల్లంఘనలు

రాష్ట్రవ్యాప్తంగా గుర్తించిన మొత్తం 44 ఏఆర్టీ కేంద్రాలకు గాను, ఇప్పటివరకు 27 కేంద్రాల్లో వైద్య అధికారులు క్షేత్రస్థాయి తనిఖీలు పూర్తి చేశారు. ఈ తనిఖీల్లో ఏడు ఆసుపత్రులు ఏకంగా 13 రకాల నిబంధనలను ఉల్లంఘించినట్లు అధికారులు గుర్తించారు. దీనిపై తీవ్రంగా స్పందించిన వైద్య శాఖ, ఆయా ఆసుపత్రుల యాజమాన్యాలకు షోకాజ్ నోటీసులు జారీ చేసింది. మిగిలిన కేంద్రాల్లోనూ తనిఖీలు నిరంతరంగా కొనసాగుతున్నాయి.

ఢిల్లీ కేంద్రంగా ఆరా.. వైద్యులు, మధ్యవర్తుల పాత్రపై విచారణ

పోలీసుల స్వాధీనంలో ఉన్న రికార్డులతో పాటు, నేషనల్ ఏఆర్టీ అండ్ సరోగసీ రిజిస్ట్రీ నుంచి అందే సమగ్ర సమాచారాన్ని పరిశీలించిన తర్వాత తదుపరి కఠిన చర్యలు ఉంటాయని అధికారులు తెలిపారు. ఈ అక్రమ దందాలో ప్రమేయం ఉన్న పలువురు మహిళలను గుర్తించగా.. వైద్యులు, ఐవీఎఫ్ కేంద్రాల నిర్వాహకులు, మధ్యవర్తుల పాత్రపై లోతైన విచారణ సాగుతోంది.

ఈ కేసుకు సంబంధించి మరింత సమాచారం రాబట్టేందుకు నవంబర్ 6న వైద్య అధికారులు నేరుగా న్యూఢిల్లీలోని నేషనల్ ఏఆర్టీ అండ్ సరోగసీ రిజిస్ట్రీని సందర్శించారు. తెలంగాణలో నమోదైన ఏఆర్టీ కేంద్రాలు, బ్యాంకుల పూర్తి వివరాలను కోరగా, నేషనల్ ఇన్ఫర్మాటిక్స్ సెంటర్ (NIC) అధికారులు తగిన సమాచారం అందజేస్తామని హామీ ఇచ్చారు.

మహిళలు అప్రమత్తంగా ఉండాలి: ప్రభుత్వం హెచ్చరిక

అసిస్టెడ్‌ రిప్రొడక్టివ్‌ టెక్నాలజీ (రెగ్యులేషన్‌) చట్టం–2021, దాని నిబంధనలకు విరుద్ధంగా మహిళల నుంచి అండాలు సేకరించడం తీవ్రమైన నేరమని, ఇది శిక్షార్హమని వైద్య ఆరోగ్య శాఖ స్పష్టం చేసింది. ప్రతి ఏఆర్టీ క్లినిక్, ఏఆర్టీ బ్యాంక్ తప్పనిసరిగా చట్టబద్ధమైన రిజిస్ట్రేషన్ కలిగి ఉండాలని తేల్చిచెప్పింది.

మధ్యవర్తుల మాయమాటలు, ఆర్థిక ప్రలోభాలకు లోనై అక్రమ వైద్య విధానాలకు ఏ మాత్రం బలికావద్దని మహిళలకు సూచించింది. రాష్ట్రంలో ఎక్కడైనా ఇలాంటి అక్రమ కార్యకలాపాలు జరుగుతున్నట్లు తెలిస్తే వెంటనే సంబంధిత జిల్లా వైద్య ఆరోగ్య శాఖ అధికారులకు ఫిర్యాదు చేయాలని ప్రజలకు విజ్ఞప్తి చేసింది.