లోడ్ అవుతోంది...
Mahesh Kumar Goud | త్రినేత్ర.న్యూస్ : తెలంగాణ జాగృతి అధ్యక్షురాలు, మాజీ ఎమ్మెల్సీ కల్వకుంట్ల కవిత కాంగ్రెస్ పార్టీలో చేరుతారని ఊహాగానాలు వినిపిస్తున్న సంగతి తెలిసిందే. ఈ వార్తలపై టీ పీసీసీ అధ్యక్షుడు మహేశ్ కుమార్ గౌడ్ స్పందించారు. కవిత కాంగ్రెస్ పార్టీలో చేరతారన్న ప్రచారంలో వాస్తవం లేదు అని ఆయన స్పష్టం చేశారు. కవిత చేస్తున్న విమర్శలపై బీఆర్ఎస్ పార్టీ స్పందించాలని ఆయన డిమాండ్ చేశారు. మీడియాతో చిట్ చాట్ సందర్భంగా మహేశ్ కుమార్ గౌడ్ ఈ వ్యాఖ్యలు చేశారు.
బీఆర్ఎస్కు గతం తప్ప భవిష్యత్ లేదు. బీజేపీకి రాష్ట్రంలో ప్రభావం చూపించే స్థితి లేదు. కవిత మాట్లాడే మాటలకు బీఆర్ఎస్ నుంచి సమాధానం లేదు. దీంతో పెద్ద ఎత్తున అవినీతి జరిగినట్లు ప్రజలు నమ్ముతున్నారు. ఈ పరిణామాల నేపథ్యంలో బీఆర్ఎస్ను ప్రజలు ఆదరించే పరిస్థితి లేదు. తెలంగాణ రాష్ట్ర ప్రజలు అవినీతిని, అక్రమాలను అంగీకరించరు అని మహేశ్ కుమార్ గౌడ్ పేర్కొన్నారు.
బీజేపీ హిందూ సెంటిమెంట్తో ఎన్నిసార్లు ప్రజలను మద్దతు పొందగలరు. దేవుళ్లను రాజకీయాల్లోకి లాగి లబ్ది పొందాలని బీజేపీ చూస్తుంది. ఇది మంచి పద్ధతి కాదు. మేము కూడా హిందువులమే.. అదే దేవుళ్లను మేము కూడా పూజిస్తాం. దేవుళ్లను దేవుళ్ళగానే చూడాలి. కాంగ్రెస్ పార్టీలో 90 శాతం హిందువులమే. మేమంతా దేవుళ్లను పూజిస్తాం అని ఆయన పేర్కొన్నారు.
జిల్లాల విభజనను బీఆర్ఎస్ అశాస్త్రీయంగా చేసింది. ఇలా ఎక్కడ జరగలేదు. ఇప్పుడు కమిటీ వేసి శాస్త్రీయంగా మార్పులు చేర్పులు చేయాలని మా సీఎం భావిస్తున్నారు. జిల్లాలను తీసెయ్యాలన్న ఆలోచన మాకు లేదు. భూ భారతిలో అవినీతి జరిగినట్లు ఆధారాలు ఉంటే ఇవ్వండి చర్యలు తీసుకుంటాం. నీటి వాటా విషయంంలో రాజీపడే ప్రసక్తే లేదు. తెలంగాణ అభివృద్ధి విషయంలో వెనక్కి తగ్గే ఆలోచన లేదన్నారు.
మా ప్రభుత్వం అమలు చేస్తున్న సంక్షేమ పథకాలు ఏ రాష్ట్రంలో అమలు చేయడం లేదు. ప్రజల అవసరాలకు తగ్గట్లు మా ప్రజా ప్రభుత్వం పాలన చేస్తుంది. వ్యక్తిగత స్వేచ్ఛకు విఘాతం కలిగించే హక్కు ఎవరికీ లేదు. మహిళా అధికారులపై ఆధారాలు లేకుండా నిరాధార ఆరోపణలు చేయడం సరికాదు. తప్పుడు ప్రచారం చేస్తున్న వారిపై చర్యలు తీసుకుంటాం అని మహేశ్ కుమార్ గౌడ్ తేల్చిచెప్పారు.
Developed & Published by TRINETHRA MEDIA HOUSE PVT. LTD,
Sai Madhu Towers, Plot No. 17, Rohini Layout Rd, Jaihind Enclave, Madhapur, Hyderabad, Telangana 500081.
Copyright © 2025 . All rights reserved. - Powered by : Veegam
